1 Korinica 3 - Vakavakadewa Vou kei na iVola tale eso

O Ira na i Talai ni Kalou

¹ Kemuni na veiwekani, au na sega ni rawa ni vosa vei kemuni me vaka au vosa tiko vei ira na tamata sa tiko vei ira na Yalo Tabu; au sa vosa ga vei kemuni me vaka ni o ni se tamata vakavuravura tikoga, me vaka na gone lalai ena vakabauta Vakarisito.

² Au sa vagunuvi kemuni ena sucu, ka sega ni vakani kemuni ena kakana dina, baleta ni o ni sega ni rawata. Ia oqo, o ni se sega tikoga ni rawata

³ baleta ni o ni se bula tikoga me vakataki ira na tamata vakavuravura. Me vaka ni kune tiko ena kemuni maliwa na veivuvutaki kei na veileti, e sega li ni dusimaka o ya ni o ni se tamata vakavuravura tikoga, ka bula voli ena kena i tovo?

⁴ Ni sa kaya tiko e dua vei kemuni, “Oi au sa muri Paula,” ka dua tale, “Oi au sa muri Apolosa,” e sega li ni o ni se vakarautaka tikoga na i vakarau vakavuravura?

⁵ O cei sara mada o Apolosa? Se o cei o Paula? Keirau sa nona dauveiqaravi walega na Kalou, ka keirau a vakayagataki mo ni vakabauta kina, me vaka sa lesi keirau kina na Turaga.

⁶ Au sa tea oi au na i tei, a sa vakasuasuataka o Apolosa, ia na Kalou ga sa qai vakatubura.

⁷ Sa ka walega kina o koya sa tea kei koya sa vakasuasuataka, ia sa ka bibi duadua ga na Kalou, o koya sa vakatubura.

⁸ Sa tautauvata ga na nodrau i naki o koya sa tea kei koya sa vakasuasuataka, ka rau na dui taura na kedrau i sau me vaka na nodrau dui cakacaka.

⁹ Ni da sa dau cakacaka vata kei na Kalou, ka o ni sa nona i teitei na Kalou. O ni sa vale ni Kalou vakakina.

¹⁰ Ena noqu vakayagataka na i solisoli sa solia vei au na Kalou, au sa vakayacora kina na nona cakacaka e dua na daunitaravale maqosa ni ka'u sa virikotora kina na yavu ni vale, ka sa dua tale na tamata sa qai tara cake na vale. Ia na tamata yadua e dodonu me qarauna vinaka na i valavala ni nona tara vale.

¹¹ Ni sai Jisu Karisito ga na yavu e duabulu sa virikotora oti tu na Kalou, ka sa sega tale ni dua na yavu e rawa ni virikotori.

¹² Eso era na tara cake na yavu ena koula, se na siliva, se na vatu talei; eso tale era na vakayagataka na kau, se na co malai, se na vu ni witi.

¹³ Ena qai vakaraitaki ga mai na cakacaka ni tamata yadua ni sa vakatakilai ena Siga i Karisito. Ena vakatakila na bukawaqa ena siga o ya na cakacaka ni tamata yadua; ena vakatovolea na bukawaqa ka vakatakila na kena dina.

¹⁴ Kevaka sa curuma rawa na bukawaqa na ka sa tara e dua na tamata ena yavu o ya, ena qai soli vua na kena i sau.

¹⁵ Ia kevaka sa kama yavu na nona cakacaka, sa qai vakayalia sara kina o koya; ena vakabulai ga o koya, ia ena vaka ga ni sa dro bula mai na kama.

¹⁶ O ni sega beka ni kila ni o ni sa vale tabu ni Kalou ka sa bula tiko e lomamuni na Yalo ni Kalou?

¹⁷ Kevaka e dua na tamata sa vakarusa na vale tabu ni Kalou, ena vakarusai koya na Kalou. Ni sa savasava na vale ni Kalou, ka sai kemuni sara ga na vale o ya.

¹⁸ Me kakua ni dua me vakaisini koya vakai koya. Kevaka e dua vei kemuni sa nanuma ni sa vuku ena vuravura oqo, e dodonu me lialia taumada, me rawa kina vua me qai vuku dina.

¹⁹ Ni sa ka lialia vua na Kalou na vuku ni vuravura oqo. Ni sa volai ena i Vola Tabu, “Sa vesuki ira na vuku o koya ena nodra i lawaki.”

²⁰ Sa volai talega vakaoqo ena i Vola Tabu, “Sa kila na Kalou ni sa tawayaga walega na nodra vakasama na vuku.”

²¹ Me kakua kina ni dua me sakitaka na veika sa rawata na tamata. Ni sa nomuni na ka kecega,

²² o Paula, kei Apolosa, kei Pita; na vuravura oqo, na bula kei na mate, na gauna oqo kei na gauna sa bera mai — a veika kece oqo sa nomuni,

²³ ka o ni sa nei Karisito, ka sa nona na Kalou na Karisito.