1 Joni 1 - Vakavakadewa Vou kei na iVola tale eso

Na Vosa ni Bula

¹ Keitou sa volavola yani oqo vei kemuni me baleta na Vosa ni Bula, o koya sa bula tu mai na i vakatekivu, o koya keitou a rogoca, o koya keitou a raica ena mata i keitou; io, o koya keitou sa raica ka sa tara na liga i keitou.

² A sa yaco me rairai mai na bula oqo, ka keitou sa raica; keitou sa dautukuna kina ka vakatakila vei kemuni na bula tawamudu ka sa tu vua na Tamana ka sa qai vakaraitaki mai vei keda.

³ Keitou sa tukuna talega vei kemuni na veika keitou sa raica ka rogoca, me rawa kina ni o ni duavata kei keitou ena veitokani keitou sa vakayacora tiko kei na Tamana vata kei na Luvena o Jisu Karisito.

⁴ Keitou sa vola yani na veika oqo me vakataucokotaki kina na nomuni marau.

Sa Rarama na Kalou

⁵ Sa i koya oqo na i tukutuku keitou sa rogoca mai vua na Luvena, ka keitou sa tukuna yani oqo vei kemuni: ni sa rarama na Kalou, ka sa sega sara vua na butobuto.

⁶ Ni kevaka eda sa kaya ni da sa veitokani tiko kei na Kalou, ka da qai vakayacora tiko na i valavala butobuto, eda sa lasu ga ena vuku ni noda vosa kei na ka eda cakava.

⁷ Ia kevaka eda sa bula ga ena rarama, me vaka sa tiko o koya ena rarama, eda sa qai veitokani vata kaya, ka sa vakasavasavataki keda mai na i valavala ca kecega na dra i Jisu na Luvena.

⁸ Kevaka eda sa kaya ni sa sega na noda i valavala ca, eda sa vakaisini keda ga, ka sa sega kina vei keda na dina.

⁹ Kevaka eda sa vakatusa na noda i valavala ca vua na Kalou, sa yalodina ga o koya ki na nona vosa ni yalayala me vakayacora na ka dodonu: ena vosota kece sara o koya na noda i valavala ca ka vakasavasavataki keda mai na veika kecega sa sega ni dodonu.

¹⁰ Kevaka eda sa kaya ni da a sega ni valavala ca, eda sa vakalasui koya, ka sa sega ni tu vei keda na nona vosa.