1 Cesalonaika 5 - Vakavakadewa Vou kei na iVola tale eso

Mo ni Vakarau ni sa Voleka mai na Turaga

¹ Kemuni na veiwekani, sa sega ni yaga me'u vola yani vei kemuni na ka me baleta na gauna kei na siga eso ena vakayacori kina na veika oqo.

² Ni o ni sa kila vinaka tu ni na yaco na Siga ni Turaga me vaka na nona lako voli e dua na daubutako ena bogi.

³ Ena gauna era na kaya kina na tamata, “Eda sa qai vakacegu ka tiko vinaka,” ena qai yaco vakidacala vei ira na rusa me vaka na kena yaco na mosi ni kete vua e dua na yalewa bukete sa taratara, ka na sega ni dua e dro tani rawa kina.

⁴ Ia vei kemuni na veiwekani, o ni sa sega ni tiko ena butobuto, ka sa sega kina ni dodonu me na yaco yani vakidacala vei kemuni me vaka na daubutako na Siga o ya.

⁵ O ni sa gone ni rarama kece sara, ka gone ni siga; eda sa sega ni gone ni bogi, se gone ni butobuto.

⁶ O koya oqo me da sa kakua kina ni moce tiko me vakataki ira na kena vo; ia me da yadra tikoga ka yalomatua.

⁷ Ni o ira era daumoce era sa moce ena bogi, kei ira era daumateni era sa mateni ena bogi.

⁸ Ia me vaka ni da sa gone ni siga, sa dodonu kina me yalomatua. E dodonu me da tokara na vakabauta kei na loloma me i sasabai ni lomasereda, kei na noda nuitaka na veivakabulai me i vakaruru ni uluda.

⁹ Ni a sega ni lesi keda na Kalou me da rusa, ia me da taukena ga na veivakabulai ena vuku i Jisu Karisito na noda Turaga.

¹⁰ Sa i koya ka a mate ena vukuda me rawa ni da na bula vata kaya ena gauna ena lesu tale mai kina, se da bula tiko se da sa mate ena gauna o ya.

¹¹ O koya oqo mo ni veivakacegui ka veivakayaloqaqataki kina vakai kemuni, me vaka o ni sa vakayacora tiko.

Na i Otioti ni Veivakasalataki kei na Vakanuinui Vinaka

¹² Ia keitou sa vakamasuti kemuni na veiwekani mo ni dokai ira era sa veiqaravi voli ena kemuni maliwa, o ira sa digitaka na Turaga me ra liutaki kemuni ka vakatavulici kemuni.

¹³ Mo ni vakarokorokotaki ira ka lomani ira ena vuku ni cakacaka era sa dau vakayacora. Mo ni veilomani tiko vakai kemuni.

¹⁴ Keitou sa vakamasuti kemuni na veiwekani mo ni vunauci ira era sa vucesa, ni vakayaloqaqataki ira era sa yalolailai, ni vukei ira era sa malumalumu, ka dauvosoti ira na tamata kecega.

¹⁵ Ni raica me kakua ni dua me veisausaumitaka na ca vua e dua tale, ia ni nakita tikoga mo ni caka vinaka ena kemuni maliwa ka vakakina vei ira na tamata kecega.

¹⁶ Ni reki tikoga.

¹⁷ Ni masu tikoga me kua ni mudu.

¹⁸ Ni vakavinavinaka ena vuku ni veika kecega ena veigauna kecega, ni sai koya oqo na loma ni Kalou vei kemuni ena vuku i Karisito Jisu.

¹⁹ Ni kakua ni tarova na cakacaka ni Yalo Tabu;

²⁰ ni kakua ni beca na nodra i tukutuku na parofita.

²¹ Ni vakatovolea na ka kecega; taura matua ga na ka e vinaka;

²² ni tarovi kemuni mai na ka kecega e ca.

²³ Me qai vakasavasavataki kemuni sara na Kalou dauveivakacegui; ka me qai maroroi vinaka me taucoko sara vakaoti na yalomuni kei na lomamuni kei na yagomuni me yacova na siga ena lako tale mai kina na Turaga o Jisu Karisito.

²⁴ Sa yalodina o koya sa kacivi kemuni, ka na vakayacora na veika oqo.

²⁵ Kemuni na veiwekani, ni masulaki keitou talega.

²⁶ Ni kidavaki ira na veiwekani kecega ena i regu savasava.

²⁷ Au sa vakarota vei kemuni, ena yaca ni Turaga, me qai wiliki na i vola oqo vei ira kece sara na veiwekani.

²⁸ Me tiko vata ga kei kemuni na loloma-savu ni noda Turaga o Jisu Karisito.