1 Cesalonaika 4 - Vakavakadewa Vou kei na iVola tale eso

Na Bula e Vinakata na Karisito

¹ Keitou a sa vakaraitaka vei kemuni na veiwekani na i tovo ni bula sa vinaka vua na Kalou; sa dina o ni sa vakayacora tiko, ia keitou kerea ka vakamasuti kemuni mo ni vakayacora vakavinaka cake sara.

² Me vaka ni o ni sa kila tu na veivakaro keitou a vakarota vei kemuni ena vuku ni Turaga o Jisu,

³ ka ni vinakata na Kalou mo ni savasava vakayalo; ka mo ni kakua ni dau veibutakoci.

⁴ Na tagane yadua me kila na sala savasava ka dokai me taura kina na yalewa me watina.

⁵ Me kakua ena garogaro ca me vakataki ira na tawa lotu, era sega ni kila na Kalou.

⁶ Ena vuku ni ka oqo me kakua ni dua na tagane me caka cala kina se via la'ki siova na ka e nona na wekana, ni sa dau veivakatotogitaki na Turaga ena veika oqo. Keitou a sa tukuna oti na ka oqo ka vakaroti kemuni kina vakabibi e liu.

⁷ Ni sa sega ni kacivi keda na Kalou me da vakayacora na i valavala dukadukali eso, ia me da yalosavasava ga.

⁸ Ia o koya sa cata oqo sa sega ni cata walega na lewa ni tamata, ia sa cata ga na Kalou, o koya sa solia vei kemuni na nona Yalo Tabu.

⁹ Ena vuku ni veilomani vakaveitacini, sa sega ni yaga me dua e vola tale yani oqo vei kemuni. O ni sa vakavulici kece mai vua na Kalou ena ka oqo mo ni dauveilomani.

¹⁰ Sa dina sara ni o ni sa daulomani ira na veiwekani kece mai Masitonia raraba. Ia keitou sa vakamasuti kemuni na veiwekani mo ni vakayacora vakalevu cake sara.

¹¹ Me nomuni i naki dei mo ni tiko vinaka kei ira na tani, mo ni dui qarava ga na ka e nomuni yadua ka cakacaka ena ligamuni mo ni rawata kina na nomuni bula me vaka keitou a vakarota vei kemuni.

¹² Ena sala oqo, era na vakarokorokotaki kemuni kina na tawa lotu, ka o ni na sega talega ni vakararavi kina vua e dua tale na tamata me baleta na veika mo ni bula kina.

Na Lesu Tale Mai ni Turaga

¹³ Kemuni na veiwekani, keitou sa sega ni vinakata mo ni sega tu ni kila na veika e baleti ira era sa mate, ka mo ni kakua kina ni rarawa, me vakataki ira sa sega na nodra i nuinui.

¹⁴ Ia me vaka ni da sa vakabauta ni sa mate o Jisu ka sa tucake tale mai na mate, ena vaka talega kina o ira era sa mate ka ra sa tu vata kei Karisito ena nodra vakabauta; na Kalou ena kauti ira vata mai kei Jisu.

¹⁵ Keitou sa tukuna vei kemuni na ka oqo me vaka na vosa ni Turaga, o ya ni da na sega ni liu vei ira era sa mate oi keda eda se bula tiko ena gauna sa lako tale mai kina na Turaga.

¹⁶ Ni na rogovaki taumada na domo ni kaila, a domo i koya na agilosi turaga, kei na domo ni davui ni Kalou, ena qai lako sobu mai lomalagi na Turaga. O ira era sa mate oti ka ra sa vakabauti Karisito era na tucake taumada;

¹⁷ emuri oi keda eda bula donumaka na gauna o ya, ka vakasoqoni vata yani kei ira ena veio me da sota kei na Turaga ena maliwa lala. Eda na qai tiko vata vakakina kei na Turaga ka sega ni mudu.

¹⁸ O koya oqo mo ni qai ia na veivakayaloqaqataki vakai kemuni ena veivosa oqo.