1 Cesalonaika 3 - Vakavakadewa Vou kei na iVola tale eso

Sa Talai Timoci o Paula ki Cesalonaika

¹ Ia ni keitou sa sega ni vosota rawa na neitou via raici kemuni, keitou sa mani nakita kina me keirau sa tikoga mai Aceni,

² ka talai Timoci yani, na wekada ka i tokani dauveiqaravi ni kena vakatetei na i Tukutuku Vinaka kei Karisito. Keirau talai koya yani me la'ki vakayaloqaqataki kemuni ka vakaukauwataka na nomuni vakabauta,

³ me kakua kina ni dua me vakayavalati ena vuku ni veivakacacani oqo. O ni sa kila tiko vakai kemuni ni veivakacacani oqo era sa tiki ni nona lewa na Kalou me baleti keda.

⁴ Ni keitou a se tiko vata kei kemuni, keitou a tukuna rawa tiko kina ni keitou na vakacacani ena vuku ni vakabauta; ia me vaka o ni sa kila, a mani yaco dina me vakakina.

⁵ Oqori na vuna ka'u a talai Timoci yani kina. Au a sa sega ni vosota rawa, ka talai Timoci yani me rawa ni'u kila na i tuvaki ni nomuni vakabauta; ni'u a taqayataka de mani a veretaki kemuni na tevoro ka sa vakavuna me ka walega kina na neitou cakacaka.

⁶ Ia sa lesu tale mai oqo o Timoci ka sa lako vata mai kei na i tukutuku rogorogo vinaka ni nomuni vakabauta kei na nomuni loloma. Sa mai tukuna vei keitou o koya na nomuni dau vakanuinui vinaka tiko mai ka o ni sa gadreva mo ni raici keitou me vaka ga na levu ni neitou gadreva me keitou raici kemuni.

⁷ Kemuni na veiwekani, ena gauna keitou sotava kina na veivakacacani kei na ka rarawa, keitou sa vakayaloqaqataki ga ena vukumuni. Sa vakayaloqaqataki keitou na nomuni vakabauta,

⁸ baleta ni keitou sa qai bula vakaidina oqo kevaka o ni sa tudei tiko vua na Turaga.

⁹ A cava me keitou kaya rawa me vakaraitaka vakavinaka na levu ni neitou vakavinavinaka vua na Kalou me baleti kemuni, kei na levu ni reki sa mai yaco vei keitou ena vukumuni, ena neitou tu oqo ena mata ni noda Kalou?

¹⁰ Keitou sa masulaka vagumatua ena siga kei na bogi me da na sota, ka me keitou vakarautaka na veika eso o ni gadreva me baleta na nomuni vakabauta.

¹¹ Me qai vakarautaka na Kalou na Tamada kei na noda Turaga o Jisu na sala me keitou yaco rawa yani kina vei kemuni!

¹² Me qai vakatuburi kemuni cake na Turaga ka vakasinaiti kemuni ena loloma vei ira na veiwekani, ka me vuabale yani na loloma oqo vei ira na tamata kecega me vaka na levu ni neitou lomani kemuni.

¹³ Ia me qai vakataudeitaka o koya na lomamuni me tawa cala ka savasava ena mata ni Kalou o Tamada ena gauna sa lesu tale mai kina na noda Turaga o Jisu Karisito kei ira kece na nona tamata yalosavasava.