Vunau ni Soro 21 - Ai Vola Tabu Ena Vakavakadewa Vou

Na i Vakaro e Baleti Ira na Bete

¹ A sa kaya vei Mosese ko Jiova, “Mo vosa vei iratou na bete na luve i Eroni, ka kaya vei iratou, me kakua ni vakadukadukalitaki koya e dua na bete ena vuku ni tamata ka mate ena kedra maliwa na kai nona,

² vakavo ga, o koya sa wekana voleka sara, me vakataki tinana, se tamana, se na luvena tagane, se na luvena yalewa, se na tuakana, se na tacina,

³ se na ganena sa goneyalewa ga ka sa sega ni vakawati, ia sa vakararavi ga vua ka sega na watina; ena vukuna, e rawa me vakadukadukalitaki koya kina.

⁴ Me kakua ni vakadukadukalitaki koya ena vukudra na wekana ni vakamau.

⁵ Me ra kakua ni tasia na uludra, se tasia na tutu ni kumidra, se tavatava na yagodra.

⁶ Me ra savasava na bete vei koya ko Jiova na nodra Kalou, ka kakua ni vosavakacacataka na yaca ni nodra Kalou; ni ra sa vakacabora tiko na ka sa cabo ena bukawaqa vei Jiova, me kena kakana na nodra Kalou; sa kilikili kina me ra savasava sara.

⁷ Me ra kakua ni vakawati kei na dua na yalewa sa veibiu, se dautagane; ni sa savasava na bete vei koya na nona Kalou.

⁸ Mo ni okati ira me savasava ni ra sa vakacabora na kakana me kena na nomuni Kalou; wiliki ira me ra savasava. Ni sai au ko Jiova, na yalododonu, ka'u sa vakasavasavataki kemuni.

⁹ Ia na luvena yalewa e dua na bete sa vakacacani koya ni sa dautagane, sa vakacacana talega na tamana; ena vakamai o koya ena bukawaqa.

¹⁰ “O koya na Bete Levu ka sa liu vei ira na wekana, sa livi oti ki uluna na waiwai ni veilumuti, ka sa buli me sulumaka na i sulu tabu, me kakua ni biuta tu ga na uluna me sega ni seruti, se me dresulaka na nona i sulu.

¹¹ Me kakua talega ni torova na vanua e koto kina na yagomate. Oqo me kakua ni vakadukadukalitaki koya kina, se mani yagomate i tamana se o tinana;

¹² me kakua talega ni curu tani mai na vale tabu, se vakacacana na vale tabu ni Kalou. Ni sa vakatabui oti ena waiwai ni veilumuti ni nona Kalou: Ni sai au ko Jiova.

¹³ Ia me vakawati o koya na bete kei na dua na goneyalewa ka sa sega ni mocera na tagane.

¹⁴ Me kakua ni vakawati o koya kei na dua na yada, se na yalewa sa veibiu mai na nona vakamau, se na yalewa sa vaqaseni oti, se na yalewa sa dautagane. Ia me vakawati ga kei na yalewa sa sega ni se mocera na tagane mai na nona mataqali.

¹⁵ Ena ka oqo e sega kina ni vakacacana na nona kawa vei ira na kai nona. Ni sai au ko Jiova ka'u sa vakasavasavataki koya me Bete Levu.”

¹⁶ A sa vosa talega vei Mosese ko Jiova ka kaya,

¹⁷ “Mo vosa vei Eroni ka kaya, Me kakua ni dua vei ira na nomu kawa e vakaleqai tu e dua na tiki ni yagona me toro voleka yani me vakacabora na kakana vua na nona Kalou.

¹⁸ Me kakua ni toro voleka mai ka vakacacabo e dua na tagane e vakaleqai tu e dua na tiki ni yagona: me kakua ni mataboko, se lokiloki, se vakaleqai na i rairai ni matana, se bulicaki vakaca;

¹⁹ se vakaleqai tu na yavana, se ligana;

²⁰ me kakua na dakuvusi, se na leka; me kakua ni dua e leqa na matana se tauvi mate ni kuli; me kakua na enuki.

²¹ Me kakua sara ni dua vei ira na kawa i Eroni na bete sa vakaleqai e dua na tiki ni yagona, me toro voleka mai me vakacabora na veika sa cabo vei Jiova ena bukawaqa. Me vaka ni sa tiko na kena ca, me kakua sara ni toro voleka mai me vakacabora na kakana vei koya na nona Kalou.

²² Sa rawa me kania o koya na kakana sa cabori vua na Kalou; oqori na kakana tabu vata kei na kakana tabu sara.

²³ Ia me kakua ga ni toro volekata na i lati, se torova yani na i cabocabonisoro, ni sa vakaleqai tiko na yagona de vakadukadukalitaka na noqu vale tabu: Ni sai au ko Jiova, o koya sa vakasavasavataki ira.”

²⁴ A sa tukuna vakakina o Mosese vei Eroni kei iratou na luvena, kei ira kece na Isireli.