Vunau ni Soro 18 - Ai Vola Tabu Ena Vakavakadewa Vou

Valavala ni Veimoceri e Vakatabui

¹ Sa tukuna vei Mosese ko Jiova

² me tukuna vei ira na Isireli na vosa oqo, “Ni sai au ko Jiova na nomuni Kalou.

³ Mo ni kakua ni muria na i valavala ni vanua o Ijipita, na vanua o ni a tiko taumada mai kina, ia mo ni kakua talega ni kitaka na i valavala ni vanua o Kenani, na vanua au sa kauti kemuni tiko kina oqo.

⁴ Mo ni cakava ga na noqu lewa, kei na noqu i lesilesi mo ni vakabauta ka muria. Ni sai au ko Jiova na nomuni Kalou.

⁵ Mo ni vakamuria na i vakarau ni bula kei na noqu lawa au sa solia vei kemuni, ka o ni na maroroya kina na nomuni bula. Sai au ko Jiova.”

⁶ Sa vakarota ko Jiova na veivakaro oqo. Me kakua ni dua vei kemuni me veiyacovi kei na dua vei ira na wekana voleka.

⁷ Mo kakua ni vakamaduataki tamamu ni o mocera na tinamu. E sega ni dodonu mo vakamadualaka na tinamu dina.

⁸ Mo kakua ni vakamadualaki tamamu ni o mocera e dua vei ira na watina lalai; ena beci kina o tamamu.

⁹ Mo kakua ni mocera na ganemu, na luve i tamamu, se luve i tinamu sa sucu mai na nomudou vale, se sucu tani.

¹⁰ Mo kakua ni mocera na makubumu yalewa; o na beci kina.

¹¹ Mo kakua ni mocera na luvena yalewa na wati tamamu, na luve i tamamu vakacabecabe ni sa ganemu o koya.

¹² Mo kakua ni mocera na ganei tamamu; ni sa weka i tamamu dina o koya.

¹³ Mo kakua ni mocera na taci tinamu, se tuakana; ni sa weka i tinamu dina o koya.

¹⁴ Mo kakua ni mocera na wati tamamu lailai; ni sa tinamu lailai o koya.

¹⁵ Mo kakua ni mocera na watina na luvemu tagane; ni sa vugomu dina o koya;

¹⁶ Mo kakua ni mocera na watina na tuakamu, se tacimu; ena beci kina o koya.

¹⁷ Mo kakua ni mocera na luvena yalewa se makubuna yalewa e dua na yalewa o sa mocera oti; ni ratou sa veiwekani dina ga, ka sai valavala veibeci oqo.

¹⁸ Mo kakua ni taura me watimu talega e dua na tacina se tuakana na watimu, ni sa bula tiko o koya.

¹⁹ Mo kakua talega ni mocera e dua na yalewa ni yacovi koya tiko na nona matenivula, baleta ni sa tawa savasava.

²⁰ Mo kakua ni mocera na watina na kai nomu, ka vakadukadukalitaki iko ena vukuna.

²¹ Mo kakua ni vakacabora ena bukawaqa e dua na luvemu vei Moloke, ka vakacacana kina na yaca i Jiova na nomu Kalou: Ni sai au ko Jiova.

²² Me kakua na veimoceri vakatagane, se veimoceri vakayalewa; oqo sa ka vakasisila.

²³ Mo kakua talega ni veiyacovi kaya e dua na manumanu, ka vakadukadukalitaki iko kina; me kakua talega ni dua na yalewa me soli koya vua e dua na manumanu me rau veiyacovi; oqo sa ka e veivakamadualaki.

²⁴ Mo ni kakua ni vakadukadukalitaki kemuni ena dua vei ira na veika oqo, ni ra sa vakadukadukalitaki ira vakaoqo o ira na veimatanitu ka'u na vagalalataki ira tani e matamuni.

²⁵ Ena ka oqo e sa vakadukadukalitaki kina na vanua; ka'u sa cudruva kina na vanua ena vuku ni nona i valavala ca, ka sa luaraki ira tani na vakaitikotiko kina.

²⁶ Mo ni vakabauta na noqu i vunau kei na noqu lewa, ka mo ni kakua ni kitaka e dua vei ira na veika vakasisila oqo; se o ni taukei se tamata vulagi sa tiko vei kemuni;

²⁷ ni ra sa cakava na veika vakasisila oqo o ira na tamata ka ra a tiko e liu vei kemuni, ka ra sa vakadukadukalitaka na vanua;

²⁸ de na qai luaraki kemuni talega na vanua, ni o ni sa vakadukadukalitaka, me vaka a luaraka na matanitu era a tiko kina e liu vei kemuni.

²⁹ Ia o ira kecega era kitaka na veika vakasisila oqo era na muduki tani ka sega ni okati me ra tamata ni Kalou.

³⁰ Mo ni vakabauta na noqu vunau, mo ni kakua ni kitaka na i valavala vakasisila oqo a caka e liu ni bera ni o ni yaco kina, mo ni kakua ni vakadukadukalitaki kemuni kina: Sai au oqo ko Jiova na nomuni Kalou.