Vunau ni Soro 13 - Ai Vola Tabu Ena Vakavakadewa Vou

Lawa e Vauca na Mate ni Kuli

¹ A vosa vei Mosese kei Eroni ko Jiova, ka kaya:

² Kevaka e dua na tamata e vuvuce na yagona, se tauvi bo, se rama na yagona, ka rawa ni dewa yani me la'ki yaco me dua na mate ni kuli rerevaki se vukavuka, e dodonu me kau o koya vei Eroni na bete se dua vei rau na luvena sa bete.

³ Me dikeva na bete na mate ni kuli oqo, ia kevaka sa vulavula mai na vutina ena tikina sa tu kina na mate, ka sa tete yani vakatitobu na mate me sivia yani na kuli ni yagona, sai koya oqori na mate ni kuli rerevaki; ia ni sa raici koya oti na bete, me qai vakarota ni sa sega ni savasava o koya.

⁴ Ia kevaka sa vulavula na rama sa tu ena kuli ni yagona, ka toka wale ga e dela ni kuli, ka sa sega ni vulavula mai na vutina; me qai biuti koya vakatikitiki na tauvi mate na bete me siga vitu;

⁵ ia me raici koya tale ena i kavitu ni siga, ia kevaka sa raica o koya ni sa sega ni tete na mate ena kulina, me qai biuti koya vakatikitiki me vitu tale na siga.

⁶ Me raici koya tale na bete ena i kavitu ni siga, ia kevaka sa seyavu yani na mate, ka sa sega ni teteva na kulina, me qai vakarota na bete ni sa savasava; ni sa kakaca ni kuli wale ga; me savata o koya na nona i sulu, ka sa na savasava.

⁷ Ia kevaka sa mani tete tale na mate ni kuli e kulina, ni sa raici koya oti na bete, ka tukuni koya ni sa savasava, me na qai raici koya tale na bete.

⁸ Ia me dikevi koya na bete, kevaka sa tete na kakaca ki loma ni kulina, me qai vakarota ni sa sega ni savasava; ni sa vukavuka dina ga o ya.

⁹ Kevaka e dua na tamata sa tauvi koya na vukavuka dina, me qai kau yani o koya vua na bete.

¹⁰ Me dikevi koya na bete, ia kevaka sa tu na vuvuce vulavula ena kulina, ka sa vuki kina me vulavula na vutina, ka sa rairai na viciko ena loma ni vuvuce,

¹¹ na vukavuka dina o ya sa bibi ni sa tu makawa ga ena kuli ni yagona oqo, ia me vakarota na bete me sega ni savasava. Me kakua ni biuti koya vakatikitiki, ni sa sega ni savasava o koya.

¹² Ia kevaka sa tete sara yani na mate ca ni kuli ena kulina, ka sa robota kecega na yagona, mai na uluna ka cavaraka ki yavana, ena tikina kecega sa rai kina na bete;

¹³ me qai dikevi koya na bete, ia kevaka sa robota na yagona taucoko na mate, me qai vakarota ni sa savasava mai na mate o koya; ni sa vulavula kece mai, sa savasava kina o koya.

¹⁴ Ia mai na gauna e sa tadola kina e dua na mata ni mavoa ka basika na viciko, ena sega ni savasava kina.

¹⁵ Me qai dikeva na viciko na bete, ka vakarota me sega ni savasava o koya; sa na sega ni savasava ni sa basika na viciko; sa tauvi koya na vukavuka dina.

¹⁶ Ia kevaka sa mamaca na mavoa ka sa vulavula tale na mate, me qai lako o koya vua na bete.

¹⁷ Me dikevi koya na bete; ia kevaka sa vulavula mai na mate; me qai vakarota na bete ni sa savasava mai na mate; sa savasava o koya.

¹⁸ Ni sa tauvi bo e dua, ka sa mavo,

¹⁹ ia, ena kena i mavomavo sa tubu mai kina e dua na vuvuce vula, se sa rairai mai kina na bubuta vula-damu, ia me vakatakilai sara oqo vua na bete.

²⁰ Me qai dikevi koya na bete; ia kevaka sa tete yani ki na lewena ka sa vulavula mai na vutina, me qai vakaroti koya na bete ni sa sega ni savasava; ni sa vukavuka dina o ya sa tubu mai na bo.

²¹ Ia kevaka sa dikeva na bete, ka sa sega kina na vutina e vula, ka tiko wale ga ena kulina, ka sa seyavu tiko mai, me qai vakatikori koya vakatikitiki na bete me bogi vitu.

²² Ia kevaka sa tete e loma ni kulina, me qai vakaroti koya na bete ni sa sega ni savasava; sa tauvi koya na vukavuka dina.

²³ Ia kevaka sa sega ni dua na veisau e yaco kina, ka sa sega ni tete, me qai vakarota na bete ni sa savasava o koya, ni sai mavomavo ni bo wale ga na ka o ya.

²⁴ Me baleta e dua na tamata e kama na yagona ka sa vuki me vula-damu se vulavula mai na viciko ena we ni kama,

²⁵ me qai dikeva na bete. Ia kevaka sa vuki me vulavula na vutina ena tikina o ya, ka rairai me vaka ni sa tete yani ki na lewena, sa vukavuka dina o ya ka sa tubu mai ena i mavomavo ni kama, ia me qai vakaroti koya na bete ni sa sega ni savasava.

²⁶ Ia kevaka sa dikeva na bete, ka sa sega na vutina vulavula ena tikina o ya, ka sa toka ga e dela ni kulina, ka sa seyavu mai, me qai biuti koya vakatikitiki na bete ka siga vitu.

²⁷ Ia me dikevi koya tale ena kena i kavitu ni siga; kevaka sa tete vakalevu ena kulina, me qai vakaroti koya na bete ni sa sega ni savasava; sa vukavuka dina oqo.

²⁸ Ia kevaka sa tu ga ena dua na tikina, na tikina sa rama, ka sa sega ni tete ena kulina, ka sa seyavu mai; oqo na vuvuce wale ga ni tikina sa kama, ia me vakaroti koya na bete ni sa savasava baleta ni sa we wale ga ni kama.

²⁹ Ni sa tauva e dua na tagane se yalewa na mate vuce e uluna se kumina,

³⁰ me qai la'ki dikeva na bete na mate o ya. Kevaka e dikevi ni sa tete yani ki na lewena, ka sa dromodromoa ka mamare mai na vutina era tu kina, me qai vakarota na bete ni sa sega ni savasava: oqo na milamila, na vukavuka ni ulu se kumi.

³¹ Ia kevaka sa dikeva na mate ni milamila oqo na bete, ka kunea ni sega ni tete ka tiko wale ga ena kulina, ka sega na vutina loaloa, me qai biuti koya vakatikitiki sa tauvi mate na bete me bogi vitu.

³² Me qai dikeva tale na bete ena i kavitu ni siga. Ia kevaka sa sega ni tete na milamila, ka sega ni dromodromoa na vutina, ka kunei ni toka ga ena kuli ni yago,

³³ me qai toroi koya se tasia na uluna vakataki koya sa tauvi milamila ka vakavo ga na tikina e milamila. Me qai biuti koya vakatikitiki na bete me bogi vitu tale.

³⁴ Ena i kavitu ni siga me dikeva tale na milamila na bete; ia, kevaka sa sega ni tete ena kulina, ka sega ni tete yani ki na lewena, me qai vakaroti koya na bete ni sa savasava. Me savata o koya na nona i sulu, ka sa na qai savasava.

³⁵ Ia kevaka sa tete tale na milamila e kulina ni sa vakaroti oti me savasava,

³⁶ me qai dikevi koya tale na bete. Ia kevaka sa tete na milamila e kulina, me kakua tale ni vakasaqara na vutina dromodromoa na bete; sa sega ni savasava o koya.

³⁷ Ia kevaka e vakatulewataka na bete ni sega ni tete na milamila ka sa tubu tikoga kina na vutina bulabula, sa qai mavo sara na milamila, ka sa savasava o koya; ena tukuna na bete ni sa savasava.

³⁸ Ia kevaka e dua na tagane se yalewa e tu eso na mate ni kuli vulavula e yagodra,

³⁹ e dodonu me dikevi koya na bete. Kevaka e sega soti sara ni vulaci na tikina sa rama ena kulina, oqo e dua ga na tavukadiridiri ni kuli ni yago; sa savasava o koya.

⁴⁰ Kevaka e dua na tagane sa mira na drau-ni-uluna, sa ulu cou o koya; ia sa savasava ga.

⁴¹ Kevaka e mira na drau-ni-uluna e yadrena kei na babana, sa ulu cou o koya ia sa savasava ga.

⁴² Ia kevaka e toka ena dela ni cou e uluna se yadrena e dua na mate ni kuli vula-damu, o ya na mate ni kuli rerevaki.

⁴³ Me qai dikevi koya na bete, ka kevaka sa vulavula ka via damu mai na tutubu e uluna se yadrena,

⁴⁴ ena vakarota na bete ni sa sega ni savasava, baleta ni sa tiko e uluna na mate ni kuli rerevaki.

⁴⁵ Ia o koya sa tauvi koya na mate ni kuli rerevaki vaka o ya me na tokara na i sulu kakadresudresu, ka me kakua ni seruta na drau-ni-uluna, ka me ubia na ruku ni matana, ka qai kacivaka voli, “Tawa savasava, tawa savasava!”

⁴⁶ Ena tawa savasava tikoga o koya ena gauna kece sara e tauvi mate tiko kina, ka dodonu me vakatikitikitaki koya mai vei ira na tamata; me tiko ga ena i bili ni koro.

Lawa e Vauca na Tavukadiridiri ni Sulu

⁴⁷ Ni sa basika na tavukadiridiri ena dua na i sulu, se i sulu vutinisipi, se i sulu lineni,

⁴⁸ se ena dua ga na i sulu sa cula, se tali ena vutinisipi se kuli-ni-manumanu, se dua na ka sa caka mai na kuli-ni-manumanu,

⁴⁹ ia kevaka sa via drokadroka se damudamu mai, sa tete tiko na tavukadiridiri ena i sulu ka dodonu me la'ki vakaraitaki vua na bete.

⁵⁰ Me dikeva mada na bete ka biuta vakatikitiki na i sulu sa tauvi mate me siga vitu.

⁵¹ Me qai dikeva tale na bete ena i kavitu ni siga ka raica ni kevaka sa teteva na i sulu na tavukadiridiri, ia sa sega ga ni savasava.

⁵² Me vakama na bete na i sulu o ya baleta ni sa tete na tavukadiridiri ena i sulu, ka dodonu me vakarusai ena kena vakamai ena bukawaqa.

⁵³ Kevaka sa dikeva na bete ni sega ni se tete na tavukadiridiri ena i sulu, se na wa talitalicula, se dua na ka sa caka ena kuli-ni-manumanu,

⁵⁴ ia me qai vakarota ga na bete me ra savata na ka sa tu kina na mate, ka me qai biuta vakatikitiki me siga vitu tale.

⁵⁵ Ni sa sava oti na i sulu ka tauvi tavukadiridiri, me qai dikeva tale na bete. Kevaka sa sega ni veisau mai na roka ni tikina sa tauvi tavukadiridiri, ia e dina ga ni sega ni tete na tavukadiridiri, sa sega ga ni savasava. Me vakama o koya ena bukawaqa, veitalia ga kevaka e tauva wale ga na dakuna se na mata ni sulu.

⁵⁶ Ia kevaka sa dikeva na bete, ka sa seyavu na tavukadiridiri ni sa sava oti, me qai dresuka tani na tikina sa tu kina na rama ni tavukadiridiri mai na i sulu, se kuli-ni-manumanu, se na ka e cula, se ka tali.

⁵⁷ Ia kevaka e rairai tale mai na tavukadiridiri ena i sulu, se ena i yaya cula, se tali, se dua na ka sa caka ena kuli-ni-manumanu, ka sa tete tiko; me qai vakama o koya na kena i taukei ni yaya oqo ena bukawaqa.

⁵⁸ Ia na i sulu, na ka cula, se tali, se dua na ka sa caka ena kuli-ni-manumanu ni sa savati oti, kevaka sa takali kina na tavukadiridiri, me qai sava tale vakarua, ena qai savasava.

⁵⁹ Oqo na i vakaro me baleta na tavukadiridiri e tauva na i sulu, se vuti ni sipi, se i sulu lineni, se na ka sa cula, se tali, se dua na ka sa caka ena kuli-ni-manumanu, me kilai kina ni sa savasava, se sa sega ni savasava.