Vunau ni Soro 11 - Ai Vola Tabu Ena Vakavakadewa Vou

Kakana Savasava kei na Tawa Savasava

¹ A sa vosa vei Mosese kei Eroni ko Jiova ka kaya vei rau:

² Drau vosa vei ira na Isireli, ka kaya: Oqo na veika bula ka rawa ni o kania ena kedra maliwa na manumanu kecega ni vuravura.

³ Na manumanu kecega sa wase rua na kena ququ, ka mama vakarua na kena ena kedra maliwa na manumanu, oqo ga mo ni kania.

⁴ Ia ena kedra maliwa na manumanu era mama vakarua na kedra ka wase rua na kedra ququ, o ira oqo mo ni kakua ni kania: Na kameli, baleta ni sega ni wase na kena ququ, ka dina ga ni dau mama vakarua na kena; sa sega ni savasava.

⁵ Na koni, e dina ga ni sa mama vakarua na kena, ia sa sega ni wase rua na yavana; sa sega ni savasava vei kemuni.

⁶ Na ravete, e dina ga ni sa mama vakarua na kena, ia sa sega ni wase rua na yavana; sa sega ni savasava vei kemuni.

⁷ Na vuaka, e dina ga ni sa wase rua na kena ququ, ia sa sega ni mama vakarua na kena; sa sega ni savasava vei kemuni.

⁸ Mo ni kakua ni kania na lewedra, mo ni kakua talega ni tara na yagodra ni ra sa mate; era sa sega ni savasava vei kemuni.

⁹ Na veika oqo sa tara mo ni kania, mai vei ira na ka bula kecega e loma ni wai. Na veimataqali ika kecega ni waitui se uciwai e vakalaca ka vakavarina mo ni kania.

¹⁰ Ia na ka bula kecega ena waitui kei na uciwai sa sega ni vakalaca ka sega na varina, mo ni kakua ni kania.

¹¹ Na veimataqali ika se manumanu bula e loma ni wai vakaoqo era okati me tawa savasava. Mo kakua ni kania se tara na yagodra ni sa mate.

¹² Mo kakua ni kania na ka bula kecega mai wai sa sega ni vakalaca ka sega ni vakavarina.

¹³ Mo ni kakua ni kania e dua vei ira na mataqali manumanu vuka me vakaoqo: na ikeli, na vulituri,

¹⁴ na osipere, na kaite, na falikoni ena kena mataqali kecega;

¹⁵ na veimataqali reveni kecega;

¹⁶ na ositeriji, na manumanu ni bogi, na dre, na manulevu ena kena mataqali kecega;

¹⁷ na lulu lalai, na komorati, na lulu levu,

¹⁸ na toa ni wai, na lulu ni vanua lala, na osiperi,

¹⁹ na belo ena kena veimataqali kecega, na upoe, kei na beka.

²⁰ Sa tawa savasava na manumanu vuka lalai kecega sa dau qasi, ka vakatabana, ka yava i va;

²¹ ia e vakavo ga na kena era dau lade me vaka na vodre.

²² Sa rawa kina me laukana na veimataqali vodre kece sara.

²³ Ia na veimanumanu tale eso era vakatabana ka qasi voli e yavadra sa tawa savasava.

Manumanu Tawa Savasava

²⁴ Ia na veika oqo ena vakadukadukalitaki kemuni; kevaka e dua e tara na yago ni manumanu mate, ena sega ni savasava me yacova na yakavi.

²⁵ Vua e dua sa tara e dua na tiki ni yagomate, e dodonu me savata na nona i sulu, ia ena sega ni savasava o koya me yacova na yakavi.

²⁶ Na manumanu kecega sa wase na kena ququ, ia sa sega ni basika na kena wase, se sega ni dau mama vakarua na kena, sa sega ni savasava vei kemuni; o koya sa tara ena sega ni savasava.

²⁷ O ira na manumanu kecega sa lako voli ena nodra i taukuku ena kedra maliwa na yavaiva, era sa sega ni savasava vei kemuni; o koya sa tara na yagodra mate ena sega ni savasava me yacova na yakavi;

²⁸ O koya talega sa colata na yagodra mate me savata na nona i sulu, ia ena sega ni savasava me yacova na yakavi; era sa ka dukadukali vei kemuni.

²⁹ O ira na manumanu dauqasi oqo ka ra robota na dela i vuravura sa sega ni savasava vei kemuni: na wiseli, na kalavo, na moko lelevu ena kena veimataqali

³⁰ me vaka na vokai, na korokotaile ni vanua, na moko, na moko ni nuku, kei na moko dauveiveisau na roka ni dagona.

³¹ Kevaka e dua e tarai ira se tara na yagodra mate ena sega ni savasava me yacova na yakavi.

³² Na ka kecega e lutuka se tara na yagodra mate, ena sega ni savasava. Oqo e okati kina na i yaya kau, na i sulu, na kuli-ni-manumanu se na taga, se dua ga na i yaya e vakayagataki ena dua na ka. E dodonu me toni ena wai, ia ena sega ni savasava ka yacova na yakavi.

³³ Kevaka e dua vei ira sa lutu ena kuro qele, na ka kece sa tu kina ena sega ni savasava; ia na i yaya qele o ya me vorolaki.

³⁴ Kevaka e dua na kakana daulaukana e sa tiriva na wai ka tiko ena loma ni kuro qele tawa savasava oqo, sa sega ni savasava na kakana o ya kei na wai ena loma ni kuro.

³⁵ Na ka kecega sa lutuka na tiki ni yagomate sa sega ni savasava; kevaka e lutuka na ovani se na kuro ni vakasaqa, ia me ra vorolaki oqo; era sa sega ni savasava oqo vei kemuni.

³⁶ A mataniwai se na taqe ni wai ena savasava tu ga; ia na ka cava ga sa tara na yagomate ena sega ni savasava.

³⁷ Kevaka sa lutuka na yagomate e dua na sore ni kau sa vakarau kaburaki me tei, ena savasava tu ga na sore ni kau.

³⁸ Ia kevaka sa vakasuasuataki na sore ni kau, ka qai lutuma e dua na tiki ni yagomate, sa sega ni savasava na sore ni kau.

³⁹ Kevaka sa mate e dua na manumanu e dau laukana, o koya ena tara na yagona ena sega ni savasava me yacova na yakavi.

⁴⁰ Ia vei koya e kania e dua na tiki ni yagona, e dodonu me savata na nona i sulu, ia ena sega ni savasava me yacova na yakavi; o koya talega sa colata na yago ni manumanu mate e dodonu me savata na nona i sulu, ka na sega talega ni savasava ka yacova na yakavi.

⁴¹ Mo kakua ni kania na veimataqali manumanu lalai era dau qasi voli ena dela ni qele,

⁴² se ra dolo e ketedra, se lako voli ena yavadra vava, se sa vuqa na yavadra.

⁴³ Kakua ni o ni vakadukadukalitaki kemuni mai na nomuni vakayagataki ira me kakana.

⁴⁴ Ni sai au ko Jiova na nomuni Kalou: ia mo ni vakasavasavataki kemuni, ka mo ni yalosavasava, ni'u sa Kalou yalosavasava oi au.

⁴⁵ Ni sai au ko Jiova, o koya ka kauti kemuni tani mai na vanua o Ijipita, me'u nomuni Kalou; ia oqo mo ni yalosavasava, ni'u sa yalosavasava oi au.”

⁴⁶ A sa vakaoqo na i vakaro ena vuku ni manumanu yava i va, na manumanu vuka, na ka kecega sa bula voli e wai, kei na ka kecega sa qasi voli ena dela i vuravura.

⁴⁷ Mo ni qarauna vinaka na kena vakatakilai na veika sa sega ni savasava mai na kena e savasava, kei na manumanu e rawa ni laukana mai na kena e vakatabui.