Vunau ni Soro 1 - Ai Vola Tabu Ena Vakavakadewa Vou

Na i Soro Kama

¹ A sa kacivi Mosese ko Jiova ka vosa vua mai na Vale ni Veitavaki, ka sa kaya vua,

² Mo vosa vei ira na Isireli ka tukuna vei ira oqo: Kevaka e dua vei kemuni sa kauta mai e dua na manumanu me i madrali vei Jiova, ia mo kauta mai e dua na nomu bulumakau, se na sipi, se na me.

³ Kevaka e sa madrali me i soro kama na bulumakau, mo qai vakacabora na ka tagane sa sega ni dua na tikina e ca: mo cabora ena katuba ni Vale ni Veitavaki, me rawa ni ciqomi iko kina ko Jiova.

⁴ Mo tabaka na ulu ni soro kama ena ligamu, ena qai vakadonui me i soro ni nomu i valavala ca.

⁵ Mo vakamatea na luve ni bulumakau tagane ena mata i Jiova; ka me ratou kauta na dra o ira na bete ena kawa i Eroni ka kureitaka wavoki ena tutu vava ni cabocabonisoro ka toka ena katuba ni Vale ni Veitavaki.

⁶ Mo qai drudruga na i soro kama, ka musumusulaka na veitikina.

⁷ O ira na bete na luve i Eroni me ra tuva vakavinaka na buka ena dela ni cabocabonisoro ka vakawaqara.

⁸ Ni oti o ya, me ra qai tuva vakavinaka ena dela ni buka na veitiki ni madrali sa musu tu, ka okati vakakina na uluna kei na kena uro.

⁹ E dodonu mo savata na kena gacagaca kei na yavana, ia na bete me qai vakama kece ena dela ni cabocabonisoro. Na i soro kama sa cabori ena bukawaqa oqo sa ka boi vinaka vei Jiova.

¹⁰ Kevaka sai madrali ni soro kama na sipi se na me, ia me vakacabori na ka tagane sa sega ni dua na tikina e ca.

¹¹ Mo vakamatea ena yasa ni cabocabonisoro sa donuya na vualiku, ena mata i Jiova. O ira na bete me ra qai kureitaka na kena dra ena tutu vava ni cabocabonisoro.

¹² Ni o sa musumusuka oti, me qai vakama ena i cabocabonisoro o koya na bete na veitikina kece sara, e okati talega kina na uluna kei na kena uro.

¹³ E dodonu mo savata na kena gacagaca kei na yavana, ia na bete me qai vakama kece ena dela ni cabocabonisoro. Na i soro kama sa cabori ena bukawaqa oqo sa ka boi vinaka vei Jiova.

¹⁴ Kevaka sa nona i madrali na manumanu vuka me i soro kama vei Jiova, me qai vakacabora o koya na soqe, se na luve ni ruve me nona i madrali.

¹⁵ Na bete me qai kauta ki na i cabocabonisoro, ka muloca na domona me mate, ka vakama na uluna ena i cabocabonisoro. A kena dra me na qai vakadrodroi tani yani ena yasa ni cabocabonisoro.

¹⁶ E dodonu me qai kauta laivi na kato ni kena kei na vutina, ka biuta ki na yasa ni cabocabonisoro sa donuya na tokalau, ena tikina sa biu kina na dravusa.

¹⁷ Me qai taura na bete na tabana ruarua ka basuka me dolava na lewe ni manumanu, ia me kakua ga ni basuka laivi na tabana ni bera ni qai vakama ena i cabocabonisoro. Na i soro kama sa cabori ena bukawaqa oqo sa ka boi vinaka vei Jiova.