Vosavakaibalebale 23 - Ai Vola Tabu Ena Vakavakadewa Vou

Na i Kaono ni Vosa ni Vuku

¹ Ni o dabe mo kana vata kei na dua na turaga, mo nanuma matua se o cei o koya.

² Kevaka o tamata kana levu, tovolea mo tarovi iko.

³ Kakua ni kocova na kakana vinaka e vakarautaka; de rairai vinakata me coriti iko.

Na Kena i Kavitu

⁴ Mo yalomatua ka kakua ni vakaocai iko wale ga ena nomu saga na vutuniyau.

⁵ Sa na rawa me takali yani vakasauri na nomu i lavo, me vaka era sa vakatabana ka vuka tani yani me vaka na ikeli.

Na Kena i Kawalu

⁶ Kakua ni la'ki kana ena nona teveli na tamata buroburogo, se kocova na kakana vinaka sa vakarautaka o koya.

⁷ Ena kaya beka vei iko, Mai, mo kana sara vakalevu, ia e sega ga ni vosa ena yalona dina. Na nona i vakarau ena vakavuna mo tauvi mate kina,

⁸ o na luaraka tale na ka o sa kania ka na maumau wale na nomu vosa vinaka.

Na Kena i Kaciwa

⁹ Kakua ni vosa vakayalomatua vua e dua na yalowai; ena sega ni taleitaka o koya.

Na i Katini ni Vosa ni Vuku

¹⁰ Kakua sara ni tosoya e dua na i yalayala ni vanua makawa se taura na vanua era sa taukena na luveniyali.

¹¹ Sa nodra dauveitaqomaki qaqa ko Jiova, ka na valataka na ka e baleti ira me saqati iko.

Na Kena i Katinikadua

¹² Vakarorogo vinaka vua na nomu qasenivuli ka vulica na veika kece o rawa ni vulica.

Na Kena i Katinikarua

¹³ Kakua ni lokuyara ni vakanakuitataka na gone. Era na sega ni mate ena i kuita.

¹⁴ Na kena dina oqo, ni o na vakabula kina na yalodra mai eli.

Na Kena i Katinikatolu

¹⁵ Na luvequ, kevaka o na yaco mo tamata yalomatua, ena reki kina na yaloqu.

¹⁶ Au na cibi ni'u rogoca ni o vosataka na veivosa yalomatua.

Na Kena i Katinikava

¹⁷ Kakua ni vuvutaki ira na tamata i valavala ca; ia mo rerevaki Jiova tikoga ena veisiga kece.

¹⁸ Kevaka e vakakina, sa na dua na gauna uasivi na nomu gauna mai muri.

Na Kena i Katinikalima

¹⁹ Vakarorogo mada na luvequ, ka mo vuku, ka vakasamataka sara vaka yalomatua na nomu i vakarau.

²⁰ Kakua ni vakailala vata kei ira era dau gunuva na waini kei ira era dau taleitaka na kana lewe ni manumanu,

²¹ E rau sa dau veivakadravudravuataki na daumateni kei na daukana. Kevaka e sega na ka o cakava mo kana ga ka moce, o na vakaisulu ena i sulu kakadresudresu.

Na Kena i Katinikaono

²² Vakarorogo vua na tamamu, kevaka a sega o koya o a sega ni bula. Ni sa qase mai o tinamu mo vakaraitaka vua na nomu vakavinavinaka.

²³ Volia na dina ka kakua ni volitaka. Volia na vuku, na i vakavuvuli kei na yalomatua.

²⁴ Sa rauta me marau na tamana na tamata yalododonu. O koya e dua na luvena tagane vuku ena marautaki koya.

²⁵ Laiva me rau marautaki iko o tamamu kei tinamu; solia vei tinamu na marau o ya.

Na Kena i Katinikavitu

²⁶ Vakarorogo vinaka sara na luvequ, ka muria na noqu i vakarau.

²⁷ Sa rerevaki na yalewa dautagane kei na yalewa i vakarau vakasisila.

²⁸ Era sa waraki iko me vaka na daubutako ka vakavuna me ra sega ni yalodina vei watidra e vuqa na tagane.

Na Kena i Katinikawalu

²⁹ O cei e nona na vakaloloma? O cei e nona na rarawa? O cei sa veivala? O cei sa vosa kudrukudru? O cei sa mavoa tu vakasakasaka? O cei sa damudamu tu na matana?

³⁰ O ira ga era sa gunu waini tiko vakabalavu, kei ira era sa gunuva na waini sa veiwaki.

³¹ Me kakua ni temaki iko na damudamu ni waini e rawa ni o raica kina na kemu i yaloyalo, ka malumu ni tilomi sobu.

³² E muri sa kata me vaka na gata, ka gaga me vaka na gaga ni gata bati gaga.

³³ Na matamu ena raica na veika veivakurabuitaki; o na sega ni rawa ni vakasama, ka sega ni matata na veika o vosataka.

³⁴ O na vaka e dua sa davo koto ena dela ni wasawasa, ka loloa tu, ka tauwalili me vaka na dali ni waqa sa suaigelegele.

³⁵ O na kaya, Era a vacuki au, ia ka'u a sega ni mavoa; era a mokuti au, ia ka'u a sega ni vakila. Me'u na qai yadra li ni naica? Au sa vinakata tale e dua na gunu.