Vosavakaibalebale 18 - Ai Vola Tabu Ena Vakavakadewa Vou

¹ Na tamata e sega ni bula veilasamaki kei ira na tani sa taleitaki koya taudua voli ga; ena sega ni duavata kei na veika era sa kaya na tamata kece ni sa dodonu.

² Na tamata yalowai sa sega ni bau kauwaitaka se sa bau kila e dua na ka se segai; na ka ga e gadreva sai koya me vakaraitaka na levu ni vuku sa tiko vua.

³ E rau sa dau salavata voli ga na i valavala ca kei na madua. Ni o vakayalia na nomu dokai, ena kena i sosomi na beci.

⁴ Na vosa ni gusu ni tamata sa vaka na wai titobu, ka sai vurevure ni vuku me vaka na wai drodro.

⁵ E sega ni dodonu me da totaka na tamata cala, ka tarova na dodonu e nona na tamata yalododonu.

⁶ Ni tekivutaka na veileti e dua na tamata lialia, sa vaqara tikoga me kanakuita.

⁷ Ni vosa e dua na tamata yalowai, sa vakacacani koya ga vakai koya, ka sa na coko talega ena nona vosa.

⁸ Sa ka kamikamica dina na kakase sa dua na ka na levu ni noda dau via tiloma!

⁹ Na tamata vucesa e tautauvata ga kei na tamata sa dau vakarusa na ka.

¹⁰ Na yaca i Jiova sa vaka na i drodro kaukauwa; era cici kina na yalododonu ka ra sa vakabulai.

¹¹ Ia o ira na tamata vutuniyau era sa nanuma ni sa taqomaki ira na nodra i yau, me vaka e dua na bai kaukauwa ka cere sa wavokita e dua na koro.

¹² Ena sega ni rawa ni dua e dokai ka vakavo ga kevaka sa yalo malumalumu taumada; na tamata dokadoka sa lako tikoga ki na sala ni rusa.

¹³ Dau vakarorogo taumada ni o bera ni sauma na vosa. Kevaka e sega, o sa qai yalowai dina ga ka dau veivakacudrui.

¹⁴ Na dei ni lomana se na nona lewa-e-loma na tamata ena vakabulai koya tiko ni sa tauvi mate; ia kevaka sa yali oqo, sa qai vakayalia vakadua kina na i otioti ni nona i nuinui.

¹⁵ Na tamata vuku sa gadreva ka vakarau tu ga me vulica na ka.

¹⁶ O gadreva li mo sota kei na dua na turaga dokai? Kauta vua e dua na i loloma, ni na vakarawarawataki kina.

¹⁷ Sa dau rairai dodonu na tamata e dauvosa vakailiu ena mataveilewai me yacova ni sa tarogi koya e dua mai na i to kadua.

¹⁸ Kevaka e rau sa veileti tiko e rua na tamata kaukauwa ena mataveilewai, ena rawa ni walia na nodrau leqa na vakawiri madigi.

¹⁹ Vukea na tacimu ka na taqomaki iko o koya me vaka e dua na bainikoro kaukauwa, ia kevaka o veivala kaya, sa na sogota vei iko na nona katuba.

²⁰ E dodonu mo na lako curuma ena vosota na i sau ni veika kece o sa tukuna.

²¹ Na veika o kaya ena rawa ni taqomaka na bula se vakarusa; sa dodonu kina mo ciqoma na veika cava ga o na sotava ena vuku ni veivosa eso o sa tukuna.

²² O koya sa kunea na watina sa kunea na ka vinaka; sa vakaraitaki kina ni sa lomavinaka ko Jiova ki vua.

²³ Ni sa vosa na tamata dravudravua, sa ia ga ena vakamamasu; ia ni vosa e dua na vutuniyau, sa vosa kaukauwa ga.

²⁴ Eso na veitokani se veitau era dau sega soti sara ni dede, ia eso na i tokani era sa yalodina cake mai vei ira na mataveitacini.