Vakatekivu 5 - Ai Vola Tabu Ena Vakavakadewa Vou

Na Kawa i Atama

¹ Oqo na i vola ni kawa i Atama. (Ena gauna sa bulia kina na tamata na Kalou, a sa bulia me veiucui kei na Kalou.

² E a bulia na tagane kei na yalewa, a sa vosa vakalougatataka, ka vakatoka me “Kawa Tamata”.)

³ Ena gauna sa 130 kina na yabaki i Atama, a sa sucu e dua tale na luvena tagane, ka ucui koya vinaka; a sa vakatoka me yacana o Seci.

⁴ Ni sucu oti o Seci, a sa bula voli o Atama me 800 tale na yabaki. Ena loma ni gauna o ya era sa sucu tale kina eso na luvena tagane kei na yalewa.

⁵ Ia na balavu ni gauna kece sa bula kina o Atama e 930 na yabaki; a sa qai mate.

⁶ Ni sa yabaki 105 o Seci, sa qai sucu e dua na luvena tagane, o Inosi na yacana.

⁷ Ia ni sa sucu oti o Inosi, a sa bula voli o Seci me 807 tale na yabaki. Ena loma ni gauna o ya, sa sucu tale kina eso na luvena tagane kei na yalewa.

⁸ Na balavu ni gauna a bula kina o Seci e 912 na yabaki; a sa qai mate.

⁹ Ni sa yabaki 90 o Inosi, sa qai sucu na luvena tagane, o Keinana na yacana.

¹⁰ Ia ni sa sucu oti o Keinana, a sa bula voli o Inosi me 815 tale na yabaki. Ena loma ni gauna o ya, sa sucu tale kina eso na luvena tagane kei na yalewa.

¹¹ Na balavu ni gauna sa bula kina o Inosi e 905 na yabaki; a sa qai mate.

¹² Ni sa yabaki 70 o Keinana, sa qai sucu na luvena tagane, o Malelieli na yacana.

¹³ Ia ni sa sucu oti o Malelieli, a sa bula voli o Keinana me 840 tale na yabaki. Ena loma ni gauna o ya, sa sucu tale kina eso na luvena tagane kei na yalewa.

¹⁴ Na balavu ni gauna sa bula kina o Keinana e 910 na yabaki; a sa qai mate.

¹⁵ Ni sa yabaki 65 o Malelieli, sa qai sucu na luvena tagane, o Joreti na yacana.

¹⁶ Ia ni sa sucu oti o Joreti, a sa bula voli o Malelieli me 830 tale na yabaki. Ena loma ni gauna o ya, sa sucu tale kina eso na luvena tagane kei na yalewa.

¹⁷ Na balavu ni gauna sa bula kina o Malelieli e 895 na yabaki; a sa qai mate.

¹⁸ Ni sa yabaki 162 o Joreti, a sa sucu na luvena tagane, o Inoke na yacana.

¹⁹ Ia ni sa sucu oti o Inoke, a sa bula voli o Joreti me 800 tale na yabaki. Ena loma ni gauna o ya, sa sucu tale kina eso na luvena tagane kei na yalewa.

²⁰ Na balavu ni gauna sa bula kina o Joreti e 962 na yabaki; a sa qai mate.

²¹ Ni sa yabaki 65 o Inoke, a sa sucu na luvena tagane, o Meciusela na yacana.

²² Ni oti o ya, erau sa daulako vata o Inoke kei na Kalou me 300 na yabaki. Ena loma ni gauna o ya, era a sucu tale kina eso na luvena tagane kei na yalewa.

²³ A bula voli me 365 na yabaki o Inoke.

²⁴ E rau sa daulako vata o Inoke kei na Kalou me yacova ni sa yali, baleta ni sa kauti koya yani na Kalou.

²⁵ Ni sa yabaki 187 o Meciusela, a sa sucu na luvena tagane, o Lemeki na yacana.

²⁶ Ia ni sa sucu oti o Lemeki, a sa bula voli o Meciusela me 782 tale na yabaki. Ena loma ni gauna o ya, era a sucu tale kina eso na luvena tagane kei na yalewa.

²⁷ Na balavu ni gauna sa bula kina o Meciusela e 969 na yabaki, a sa qai mate.

²⁸ Ni sa yabaki 182 o Lemeki, a sa sucu na luvena tagane.

²⁹ A sa vakatoka me yacana o Noa ni a kaya, “O koya oqo ena solia vei keda na veivakacegui mai na noda oca kei na cakacaka ni ligada mai na qele ka sa cudruva ko Jiova.”

³⁰ Ia ni sa sucu oti o Noa, a sa bula voli o Lemeki me 595 tale na yabaki. Ena loma ni gauna o ya, a sa sucu tale kina eso na luvena tagane kei na yalewa.

³¹ Na balavu ni gauna sa bula kina o Lemeki e 777 na yabaki; a sa qai mate.

³² Ni oti na nona yabaki 500 o Noa, e ratou sa lewe tolu na luvena tagane, o Semi, kei Ame, vata kei Jefeca.