Vakatekivu 4 - Ai Vola Tabu Ena Vakavakadewa Vou

O Keni kei Epeli

¹ Erau sa veiyacovi o Atama kei na watina, ka sa bukete o Ivi ka vakasucuma e dua na gonetagane, ka sa kaya, “Au sa rawata e dua na gonetagane mai vei Jiova.” A sa vakatoka kina o Ivi me yacana o Keni.

² A sa vakasucu tale o Ivi ka vakasucuma e dua na gonetagane ka vakatoka me yacana o Epeli. A sa qai yaco me dauvakana manumanu o Epeli, ka dauvakayagataki qele o Keni.

³ Ni oti e dua na gauna, a sa kauta eso na vua ni qele o Keni ka vakacabora me nona i madrali ni vakavinavinaka vei Jiova.

⁴ A sa kauta talega mai eso na ulumatua ni nona manumanu urouro vinaka o Epeli ka vakacabora vei Jiova me nona i madrali ni vakavinavinaka. A sa vakadonui Epeli ko Jiova kei na nona madrali,

⁵ ia sa sega ni vakadonui o Keni kei na nona i madrali. A sa cudru vakalevu o Keni ena ka oqo, ka sa rarawa vakalevu sara na matana.

⁶ A sa kaya vei Keni ko Jiova, “A cava o sa cudru kina? A cava sa rai vakaca kina na matamu?

⁷ Kevaka sa vinaka na nomu i madrali, o na mata mamarau tiko; ia me vaka na nomu sa caka cala, sa wawa koto na i valavala ca e mata ni nomu katuba me vakacacani iko. Sa vinakata me lewai iko, ia mo vakamalumalumutaka ga.”

⁸ A sa kaya o Keni vei Epeli na tacina, “Me daru lako mada ki veikau.” Ia ni rau tiko mai veikau, sa qai tucake o Keni ka vakamatei Epeli na tacina.

⁹ A sa tarogi Keni ko Jiova ka kaya, “Sa evei o Epeli na tacimu?” Sa qai sauma o Keni ka kaya, “Au sega ni kila, oi au beka na i vakatawa kei taciqu?”

¹⁰ A sa qai kaya ko Jiova, “A cava o sa vakayacora kina na ka oqo? Na dra i tacimu sa tagici au mai na qele, me vaka na domona e dua sa via sauma lesu na ka sa vakayacori vua.

¹¹ O iko o sa cudruvi, ka vakasavi tani mai na vanua, ka kena qele sa gunuva na dra i tacimu ena nomu a vakamatei koya.

¹² Ena gauna o teivaka kina na qele, ena sega ni vuavuai vinaka. Ia o na dauveidroyaki ka veilakoyaki voli ga ena dela i vuravura.”

¹³ A sa kaya o Keni vei Jiova, “Sa rui bibi na kequ i totogi, ka'u na sega ni colata rawa.

¹⁴ O ni sa vakasavi au edaidai mai na matamuni kei na vanua oqo. Au na tiko vuni talega e matamuni. Au na veidroyaki ka veilakoyaki voli ga ena dela i vuravura, kevaka talega e dua e kunei au, ena vakamatei au.”

¹⁵ Ia sa kaya lesu vua ko Jiova, “E sega. Kevaka e dua sa vakamatei iko, ena saumi lesu vakavitu vua na nona cala.” Ena ka oqo, a sa biuta kina vei Keni ko Jiova e dua na i vakatakilakila me kakua kina ni dua e vakamatei koya kevaka sa kunei koya.

¹⁶ A sa lako tani yani o Keni mai na mata i Jiova, ka la'ki tiko ena vanua o Noti, [a kena i balebale, “Veilakoyaki”] ena tokalau kei Iteni.

Na Kawa i Keni

¹⁷ E rau sa tiko vata o Keni kei na watina, a bukete ka vakasucuma e dua na gonetagane, a sa vakatoka me yacana o Inoke, a sa tara e dua na koro me rau veiyacani kei na luvena tagane.

¹⁸ A sa sucu o Erati na luve i Inoke, ka sa sucu o Mejueli na luve i Erati: a sa sucu o Mecuseeli na luve i Mejueli: a sa sucu o Lemeki na luve i Mecuseeli.

¹⁹ E rua na wati Lemeki; e dua vei rau na yacana o Eta, ka kena i karua o Sila.

²⁰ Na luve i Eta o Jepali, na nodra qase na dauvakana manumanu ka ra dau tiko ena valelaca.

²¹ Na yaca i tacina o Jupali, na nodra qase na dauvakatagi api kei na dauniuvu i vakatagi.

²² Na luve i Sila o Tubali Keni, o koya sa cakava na i yaya kece vakamatai mai na parasa kei na kaukamea. Na yaca i ganei Tubali Keni o Neama.

²³ A sa kaya o Lemeki vei rau na watina, “I Eta kei Sila, mo drau rogoci au mada: Au a vakamatea e dua na tamata baleta ni a vakamavoataki au.

²⁴ O koya ena mokuti Keni, ena saumi vua vakavitu; Ia o koya ena mokuti au, ena saumi vakavitusagavulu kavitu vua.”

O Seci kei Inosi

²⁵ A sa sucu tale e dua na luvedrau tagane o Atama kei na watina. A sa kaya o Ivi, “Na Kalou e sa solia e dua na gonetagane me i sosomi kei Epeli, o koya ka sa vakamatea o Keni.” A sa vakatoka kina me yacana o Seci.

²⁶ Sa sucu e dua na gonetagane na luve i Seci, ka vakatoka me yacana o Inosi. Mai na gauna o ya, era sa tekivu vakayagataka kina na yaca tabu i Jiova na tamata ena nodra sokalou.