Vakatekivu 35 - Ai Vola Tabu Ena Vakavakadewa Vou

Sa Vakalougatataki Jekope na Kalou e Peceli

¹ A sa qai kaya na Kalou vei Jekope, “Mo lako i Peceli, ka la'ki tiko mai kina. Mo tara mai kea e dua na i cabocabonisoro vua na Kalou, o koya sa rairai vei iko ena nomu a dro tani mai vua na tuakamu o Iso.”

² A sa tukutuku yani o Jekope vei ira na nona lewenivale kei ira kece sa tiko kaya, “Mo ni biuta laivi kece na veikalou tani e tu vei kemuni; mo ni vakasavasavataki kemuni ka daramaka na i sulu savasava.

³ Eda sa na biuta na vanua oqo ka lako ki Peceli, ka me'u na tara mai kea e dua na i cabocabonisoro vua na Kalou, o koya ka vukei au ena gauna ni noqu rarawa, ka sa tiko ga kei au ena vanua kece sara au sa lakova.”

⁴ Era sa qai solia vei Jekope na kalou tani kece sara sa tu vei ira, kei na sau mai na daligadra. Sa mani buluti ira ena ruku ni vuni oki volekati Sikemi.

⁵ Ena gauna era sa lako yani kina, a sa qai yacovi ira na veikorokoro sa voliti ira na rere, ka ra mani sega kina ni vakasavi ira.

⁶ A sa lako o Jekope kei ira kecega na nona tamata ki Lusa, ka sa kilai ena yaca o Peceli ena gauna oqo, ena vanua o Kenani.

⁷ A sa tara kina e dua na i cabocabonisoro ka vakatoka me yaca ni vanua o ya na “Kalou i Peceli”, baleta ni vanua o ya sa vakaraitaki koya kina na Kalou vua ena nona a dro tani kina mai vei tuakana.

⁸ Sa qai mate e kea o Tepora na daumeimei i Repeka, ka mani bulu ena ruku ni vuni oki ena yasa i Peceli ki ra, ka sa vakatoka me yacana “Na Oki sa Dautagi”.

⁹ Ni sa lesu mai Mesopotemia o Jekope, a sa rairai tale vua na Kalou ka vosa vakalougatataki koya.

¹⁰ A sa kaya na Kalou “Na yacamu o Jekope, ia mai na gauna oqo ka lako yani, sa na yacamu o Isireli.”

¹¹ Sa kaya vua na Kalou, “Oi au na Kalou Kaukauwa; mo vakaluveni ka tubu me lewe vuqa. O na yaco me dua na matanitu, ena tubu mai vei iko na veimatanitu, ka ra na tubu mai ena nomu kawa na tui eso.

¹² Na vanua au sa solia vei Epara-ama kei Aisake au sa solia vei iko kei ira na nomu kawa era na muri mai.”

¹³ Sa qai biuti koya na Kalou ena vanua sa vosa kina vua ka lako cake yani.

¹⁴ Sa mai vakaduria yani o Jekope e dua na vatu ni vakananumi ena vanua o ya, ka livia e delana na waini kei na waiwai olive.

¹⁵ A vakatoka me yaca ni vanua o ya o Peceli.

Na Sucu nei Penijamini kei na Mate nei Raijeli

¹⁶ Era sa biuti Peceli; ka sa yawa sara yani o Efiraca, sa yaco mai na gauna me taratara kina o Raijeli, ka dredre sara na nona vakasucu.

¹⁷ Ia ni sa mosi vakalevu sara, sa qai kaya vua na nasi, “Kakua ni rere, sa dua tale na luvemu tagane.”

¹⁸ Ia ni tekivu me solia na i otioti ni nona i cegu ni voleka ni mate, sa qai vakatoka me yaca ni luvena o Penioni, ia sa vakatoka o tamana me yacana o Penijamini.

¹⁹ A sa ciba o Raijeli ka bulu ena sala ki Efiraca, (o ya o Peceliema).

²⁰ Sa qai vakaduria o Jekope e dua na vatu ni vakananumi ena kena i bulubulu, ka se tu ga e kea me yacova na siga edaidai.

²¹ A sa lako yani o Jekope ki na yasana kadua ni vale cere i cake mai Eteri, ka birika kina na nona valelaca.

O Ira na Luve i Jekope Tagane

²² Ia ni se tiko ga ena vanua o ya o Jekope, a sa lako o Rupeni ka moceri Pila, e dua vei ira na watina lailai o Jekope. Ni sa rogoca oqo o Jekope, sa ka levu sara na nona cudru. E ratou sa lewe tinikarua na luve i Jekope tagane.

²³ O iratou na luvena tagane vei Lia: o Rupeni na nona ulumatua, kei Simione, kei Livai, kei Juta, kei Isakari, vata kei Sevuloni.

²⁴ O Josefa kei Penijamini erau luvena vei Raijeli.

²⁵ O Tani kei Navitalai erau luvena vei Pila na bobula i Raijeli.

²⁶ O Kata kei Aseri erau luvena vei Silipa na bobula i Lia. Sai iratou o ya na luve i Jekope tagane ka ra sucu mai Mesopotemia.

Na Mate nei Aisake

²⁷ Sa qai lako mai o Jekope vei tamana o Aisake ki Mamire, ka voleka i Kiriaci Arapa (o ya o Epironi), na vanua erau a tiko kina o Epara-ama kei Aisake.

²⁸ A sa bula voli o Aisake me 180 na yabaki,

²⁹ a sa qai mate yani ka rau a buluti koya na luvena tagane o Iso kei Jekope.