Vakarua 7 - Ai Vola Tabu Ena Vakavakadewa Vou

O Ira na Tamata Digitaki ni Kalou

¹ Ena kauti kemuni ko Jiova na nomuni Kalou ki na vanua mo ni la'ki taukena ka tawana, ia ena vakasavi ira yani e vuqa sara na matanitu e matamuni, o ira na Itaiti, na Kakesaiti, na Amoraiti, na kai Kenani, na Perisaiti, na Ivaiti vata kei ira na Jepusaiti, e vitu na matanitu era lewe levu ka kaukauwa cake mai vei kemuni.

² Ni sa soli ira yani ko Jiova na nomuni Kalou ki na ligamuni ka o ni sa vakadrukai ira, mo ni qai vakamatei ira taucoko sara. Me kakua sara ni caka e dua na veiyalayalati vata kei ira se mo ni lomani ira.

³ Ni kakua sara ni vakawati kei ira se soli ira na luvemuni me watidra,

⁴ de ra na vagolei ira tani na luvemuni mai vei Jiova ka qarava na veikalou tani. Ena qai cudruvi kemuni ko Jiova ka vakarusai kemuni vakasauri.

⁵ Sai koya oqo na ka mo ni cakava vei ira na tamata oqori; mo ni talaraka sobu na nodra i cabocabonisoro, ka vorolaka vakamatailalai na nodra veiduru vatu tabu, ka taya sobu na i vakatakarakara ni nodra kalou yalewa o Asera, ka vakama na nodra kalou matakau.

⁶ Mo ni cakava na ka oqo baleta ni o ni sa nei Jiova na nomuni Kalou. Sa digitaki kemuni o koya mai vei ira na veimatatamata kecega e vuravura mo ni nona i yau talei.

⁷ “A sega ni vu ni nona lomani kemuni ka digitaki kemuni ko Jiova baleta ni o ni sa lewe levu cake mai vei ira na veimatatamata tani tale eso; sai kemuni na matanitu lailai duadua e vuravura.

⁸ Ia sa lomani kemuni ko Jiova ka gadreva me maroroya na nona vosa ni yalayala ka vakayacora vei ira na nomuni qase. Sai koya oqo sa vakabulai kemuni kina ena ligana qaqa levu ka sereki kemuni kina mai na nomuni vakabobulataki vua na tui Ijipita.

⁹ O koya oqo mo ni kila ni sa Kalou duadua ga ko Jiova na nomuni Kalou, ka sa yalodina o koya. Sa dau maroroya na nona veiyalayalati ka vakaraitaka na nona loloma tawa yalani vei ira sa lomani koya ka muria na nona i vakaro me yacova na udolu na nodra i tabatamata.

¹⁰ Ia sa sega ni dau berabera na nona totogitaki ira era sa cati koya.

¹¹ O koya gona mo ni talairawarawa ki na i vunau o ni a vakavulici kina; ka muria na i vakaro kecega au sa solia vei kemuni edaidai.

Na Veivakalougatataki ena Vuku ni Talairawarawa

¹² “Kevaka o ni rogoca na i vunau kece oqo ka talairawarawa kina, ena qai maroroya tikoga ko Jiova na nomuni Kalou na nona veiyalayalati kei kemuni ka vakaraitaka na nona loloma tawa yalani me vaka sa yalataka vei ira na nomuni qase.

¹³ Ena lomani kemuni ka na vakalougatataki kemuni mo ni lewe vuqa. Ena vakalougatataka na vua ni ketemuni, kei na vua ni nomuni qele, na waini vou kei na waiwai. Ena vakalevutaka na nomuni bulumakau kei na sipi. Ena solia vei kemuni na veivakalougatataki kece ni vanua ka yalataka vei ira na nomuni qase ni na solia vei kemuni.

¹⁴ O ni na vakalougatataki vakalevu cake mai vei ira na veimatanitu kecega. Ena sega ni dua na tagane se yalewa me na sega ni vakaluveni vei kemuni, ka na vaka talega kina na nomuni manumanu.

¹⁵ Ena maroroi kemuni mai na veimate kecega ko Jiova. Ena sega ni vakatauva vei kemuni na veimate ca ka rerevaki o ni a raica mai Ijipita, ia ena vakatauva ga vei ira na kemuni meca.

¹⁶ Ni vakarusa sara vakadua na veimatanitu kece sa solia vei kemuni ko Jiova na nomuni Kalou ka mo ni kakua sara ni lomani ira. Ni kakua ni qarava na nodra kalou matakau, baleta ni na vakaleqai kemuni.

¹⁷ “Mo ni kakua ni nanuma ni ra lewe levu cake mai vei kemuni, ka o ni na qai vakasavi ira tani vakacava?

¹⁸ Ni kakua sara ni rerevaki ira; ni nanuma na ka sa cakava ko Jiova na nomuni Kalou vua na tui Ijipita kei ira kece na nona tamata.

¹⁹ Ni nanuma na veika rerevaki o ni a raica e matamuni, na veicakacaka mana kei na veika veivakurabuitaki; na kaukauwa levu kei na i gu sa sereki kemuni kina ko Jiova na nomuni Kalou. Ena vakarusai ira kece na veimatanitu o ni rerevaki ira tiko oqo ko Jiova.

²⁰ Me kena i kuri ena vakatauva vei ira na mate ca ko Jiova me yacova ni ra sa vakarusai kece o ira na dro bula.

²¹ Ni kakua sara ni rerevaki ira na tamata oqo. Sa tiko kei kemuni ko Jiova na nomuni Kalou, na Kalou levu sa dodonu me rerevaki.

²² Ena vakasavi ira tani yani vakalalai na veimatanitu oqo ko Jiova, ia o ni na sega ni vakarusai ira taucoko ena dua ga na gauna, ia kevaka kina, ena tubu me levu na i wiliwili ni manumanu kila ka ra na qai vakatubu leqa vei kemuni.

²³ Ena soli ira na kemuni meca ki na ligamuni ko Jiova, ka na vakavuna na nodra veilecayaki me yacova ni ra sa vakarusai.

²⁴ Ena soli ira na nodra tui ki na ligamuni; o ni na vakamatei ira ka ra na guilecavi sara yani vakadua. Ena sega ni dua me na rawa ni tarovi kemuni; me yacova ni o ni sa vakarusai ira kece sara.

²⁵ Mo ni vakama na nodra matakau ena buka. Kakua ni domona na siliva se na koula era kabi tu kina; ni kakua ni kauta me nomuni de yaco me vu ni leqa vei kemuni ka ni sa cata sara na qaravi kalou matakau ko Jiova.

²⁶ Mo ni kakua ni kauta e dua vei ira na veimatakau oqo ki na nomuni veivale de yaco vei kemuni na ka ca ka dodonu me yacovi ira. Mo ni cata ka vakasisilataka na veimatakau oqori ka ni sa tu kina na cudru i Jiova.