Vakarua 26 - Ai Vola Tabu Ena Vakavakadewa Vou

Na i Sevu kei na i Katini

¹ Ni o ni sa yaco yani ki na vanua sa solia ko Jiova na nomuni Kalou mo ni taukena ka o ni sa vakaitikotiko kina,

² mo ni qai kauta e dua na basikete i sevu ni veimataqali vua ni qele kece o ni tamusuka mai na vanua sa solia vei kemuni ko Jiova na nomuni Kalou, ka kauta ki na vanua sa digitaka na Kalou me dau qaravi kina.

³ Mo ni lako vua na bete ka vakailesilesi tiko ena gauna o ya, ka kaya vua, ‘Au sa mai tusanaka edaidai vei Jiova na noda Kalou ni'u sa yaco mai ki na vanua sa yalataka vei ira na noda qase me solia vei keda.’

⁴ Ena qai taura na i basikete mai na ligamuni na bete ka biuta ena mata ni cabocabonisoro i Jiova na noda Kalou.

⁵ Mo ni qai cavuta na vosa oqo ena mata i Jiova: Na tamaqu e dua na kai Arami dauveilakoyaki. E ratou a lewe lalai sara ni ratou lako ki kea, ia e ratou a qai mani yaco me dua na matanitu levu ka qaqa.

⁶ Era a vakacacani keimami na kai Ijipita ka vakasaurarataki keimami me keimami bobula.

⁷ Ia keimami a qai tagica na veivuke i Jiova na nodra Kalou na neimami qase. Sa rogoca na neimami tagi ko Jiova ka raica na neimami rarawa, na cakacaka kaukauwa, kei na vakalolomataki.

⁸ A qai sereki keimami mai Ijipita ko Jiova ena nona qaqa kei na nona kaukauwa levu. A cakava eso na cakacaka mana kei na ka e veivakurabuitaki, ka vakavuna talega me yaco eso na veika rerevaki;

⁹ a kauti keimami mai ki ke ka solia vei keimami na vanua sa dave kina na sucu kei na oni.

¹⁰ Ia oqo au sa kauta mai vei Jiova na i sevu ni vua ni qele sa solia vei au o koya. Mo ni qai tauca na basikete ena mata i Jiova ka qaravi koya e kea.

¹¹ Mo ni marau ena vuku ni veika vinaka sa solia vei kemuni kei na nomuni vuvale ko Jiova na nomuni Kalou; me ra marau vata kei kemuni na Livai kei ira na vulagi era tiko kei kemuni.

¹² Ena i katolu kece ni veiyabaki, mo ni dau solia na i katini ni nomuni vua ni qele vei ira na Livai, na vulagi, na luveniyali kei ira na yada, ka me ra kana ena nomuni veikoro ka mamau; ni o ni sa cakava na ka oqo,

¹³ mo ni qai kaya vei Jiova vakaoqo, ‘Sa sega tale ni dua na i wasewase ni dua na i katini e vo ena noqu vale, au sa solia vei ira na Livai, na vulagi, na luveniyali kei ira na yada me vaka na ka o ni sa vakarota vei au me'u vakayacora. Au sa sega ni talaidredre se me'u guilecava e dua vei ira na nomuni vunau me baleta na soli i katini.

¹⁴ Au sa sega ni kania e dua na kena i wase ena gauna ka'u a vakaloloku tiko kina; ka'u sa sega ni kauta tani e dua na kena i wase mai na noqu vale ena gauna ka'u a tawasavasava voli kina; ka'u sa sega talega ni solia e dua na kena wase ena vukudra na mate. Au sa talairawarawa ga vei kemuni Jiova na noqu Kalou, ka vakayacora na veika kece sara o ni sa vakarota me baleta na dua na i katini.

¹⁵ Ni rai sobu mai ena nomuni i tikotiko tabu mai lomalagi ka vakalougatataki ira na nomuni tamata na Isireli; ni vakalougatataka talega na vanua sa dave kina na sucu kei na oni, na vanua bulabula vinaka o ni sa solia vei keimami, me vaka o ni sa yalataka vei ira na neimami qase.’

Nona Tamata Digitaki ko Jiova

¹⁶ E daidai sa vakaroti kemuni ko Jiova na nomuni Kalou mo ni muria taucoko na nona lawa kece kei na i vakaro. Mo ni qarauna mo ni muria ena lomamuni kei na yalomuni taucoko.

¹⁷ Edaidai o ni sa vakadeitaka kina ni sa nomuni Kalou ko Jiova; ka o ni na lako ena nona sala, ka muria na nona lawa, ka vakayacora na veika kece sara sa vakarota.

¹⁸ Edaidai sa ciqoma kina ko Jiova na nomuni veivakadonui mo ni sa nona tamata digitaki, me vaka sa yalataka vei kemuni, ka mo ni talairawarawa ki na nona i vunau.

¹⁹ Ena vakayacori kemuni mo ni cecere mai vei ira na veimatanitu kecega sa vakatubura o koya, ka o ni na vakacerecerei koya, ka vakalagilagia na yacana. O ni na nona tamata vakatabui, me vaka na veika sa yalataka.”