Vakarua 23 - Ai Vola Tabu Ena Vakavakadewa Vou

O Ira sa Vakuai mai na Tamata i Jiova

¹ “Me kakua ni dua na tagane sa sele na vua ni nona soresore se sa cavuka na nona ka vakatagane me vakabau me wili vata kei ira na tamata i Jiova.

² Ena sega ni dua na gone ni sala, se dua na nona kawa me yacova sara na i katini ni taba tamata me wili vata kei ira na tamata i Jiova.

³ “Ena sega ni dua vei ira na luve i Amoni se luve i Moapi, se dua vei ira na nodrau kawa, ka me la'ki yacova sara na i katini ni i tabatamata, me na okati ena kedra maliwa na tamata i Jiova.

⁴ Era a sega ni solia vei kemuni na kakana kei na wai ena gauna o ni a lako mai kina mai Ijipita. Era a saumi Balami na luve i Piori ena koro o Pecori mai Mesopotemia me vakatauca na vosa-ni-cudru vei kemuni.

⁵ E a sega ni via rogoci Balami ko Jiova na nomuni Kalou, ka sa qai veisautaka na veika ca me ka ni veivakalougatataki baleta ni sa rui lomani kemuni.

⁶ Ni kakua sara ni cakava vei ira e dua na ka me ra sautu, se tiko vinaka kina ena veigauna kece ni nomuni bula.

⁷ “Mo ni kakua ni beci ira na kai Itomi ni ra sa wekamuni. Ni kakua talega ni beca e dua na kai Ijipita baleta ni o ni a tiko ena nodra vanua ena dua na gauna.

⁸ Sa rawa me ra wili vata kei ira na tamata i Jiova o ira na luvedra ena i katolu ni nodra tabatamata.

Maroroi ni Savasava ni Keba ni Valu

⁹ “Ena gauna ni valu ni o ni tiko ena keba, ni qarauna mo ni kakua ni cakava e dua na ka ca.

¹⁰ Kevaka sa dua na tagane e yaco me tawa savasava baleta ni bura wale na nona wai ena gauna e tadra kina ena bogi me na la'ki tiko ena taudaku ni keba.

¹¹ Ni sa yakavi mai, me qai sisili ka lesu tale ki na loma ni keba ni sa dromu na siga.

¹² Me tiko e dua na tikina vakarautaki ena taudaku ni keba mo ni dau la'ki vakacegui kemuni kina.

¹³ Mo ni kauta voli e dua na kau me tiki ni nomuni i yaya vakarautaki; ka me veigauna o ni via vakacegu kina, mo ni qai kelia e dua na qara ka buluta kina na nomuni benu.

¹⁴ Mo ni qarauna me savasava ka rokovi tu ga na nomuni keba, ka ni tiko kei kemuni ko Jiova na nomuni Kalou me taqomaki kemuni ka solia vei kemuni na qaqa vei ira na kemuni meca. Mo ni kakua sara ni cakava e dua na ka dukadukali me vakavuna me vakanadakui kemuni kina ko Jiova.

Na Veilawa Tale Eso

¹⁵ Kevaka e dua na bobula sa dro mai vua na kena i taukei, ka lako vua e dua tale vei kemuni me vakaruru kina, mo ni kakua ni vakatalai koya lesu tale.

¹⁶ Sa rawa vua me tiko ena dua ga na koro e vinakata, ka mo ni kakua sara ni vakasaurarataki koya.

¹⁷ Me kakua sara ni dua na Isireli, na tagane se yalewa, me volitaki koya ena valenisoro ni qaravi kalou tani.

¹⁸ Me kakua talega ni dua na i lavo e rawati mai na cakacaka vakasisila oqo me kau mai ki na vale i Jiova na nomudou Kalou me saumi kina na i solisoli sa bubuluitaki. Sa ka vakasisila vei Jiova o ira era dau volitaka na yagodra ena valenisoro.

¹⁹ “Ni o ni solia vakadinau na i lavo, se kakana, se dua tale na ka vua e dua na nomuni tokani Isireli, ni kakua ni lavaka vua e dua na kena tubu.

²⁰ E rawa mo ni lavaka na tubu ni ka o ni solia vakadinau vua e dua na kai tani. Ia me kakua na tubu ni ka o ni soli vakadinau vua e dua na nomuni tokani Isireli. Ni muria na i vakaro oqo, ena qai vakalougatataka na veika o ni cakava ko Jiova na nomuni Kalou ena vanua o ni la'ki taukena.

²¹ “Ni o ni sa bubului vei Jiova ena dua na ka, ni kakua ni weletaka, ia mo ni vakayacora sara na ka o ya. Ena vauci kemuni ko Jiova ena ka o ni sa yalataka, ia o ni sai valavala ca kevaka o ni sega ni cakava.

²² O ni na sega ni valavala ca kevaka o ni sega ni cakava e dua na bubului vei Jiova,

²³ ia kevaka o ni sa bolea ga mo ni bubuluitaka e dua na ka, ni qarauna mo ni vakayacora vakakina.

²⁴ “Kevaka o ni lako ena dua na gaunisala ka takosova na nona loganivaini e dua tani tale, e rawa mo ni kania na levu ga ni qerepi o ni vinakata, ia mo ni kakua ga ni tawana eso ena nomuni kato ka kauta tani yani.

²⁵ Kevaka o ni sa lako tiko ena dua na sala ena loma ni nona veisila, sa na rawa mo ni kania na sila ga o ni doloka rawa ena ligamuni, ia ni kakua ga ni taya e dua na sila ena i sele.