Vakarua 21 - Ai Vola Tabu Ena Vakavakadewa Vou

Baleta na Laba Tawa Kilai

¹ Kevaka e laurai e dua na yago ni tamata ka labati, ena dua na loma ni vanua sa solia vei kemuni ko Jiova na nomuni Kalou, ka sega ga ni kilai o koya e vakamatea;

² me ra qai lako o ira na qase kei na turaganilewa ka la'ki vakarautaka na veiyawaki ni vanua sa kune kina na yago ni tamata labati kei na veikoro yadua sara ka voleka kina.

³ Ia o ira na qase ni koro, ka voleka duadua ki na vanua a kune kina na yago ni mate, me ra digitaka e dua na bulumakau yalewa ka sa sega ni vakacakacakataki, se taqa vua na i vua ni siviyara;

⁴ me ra qai kauta yani na bulumakau yalewa o ira na qase ki na yasa ni dua na uciwai lailai e sega ni bau mamaca rawa ka kena qele e sa bera ni bau siviyara se teivaki, ka me na musuki mai kea na domo ni bulumakau.

⁵ Me ra lako talega ki kea o ira na bete na luve i Livai ni sa lesi ira ko Jiova na nomuni Kalou me ra qaravi koya ka cavuta na vosa ni veivakalougatataki ena vuku ni yacana, ka sa nodra i tavi talega me ra vakatauca na lewa me i wali ni veileti kei na veitovo kaukauwa kece ka sa vakayacori.

⁶ Me ra qai vuluvulu ena dela ni bulumakau o ira na qase kecega mai na koro sa voleka duadua ki na vanua sa kune kina na yago ni tamata labati,

⁷ Me ra qai kacivaka, “Keimami sega ni labata na tamata oqo, keimami sega talega ni kilai koya ka vakayacora.

⁸ Kemuni Jiova, mo ni vosoti ira na nomuni tamata na Isireli o ira o ni a sereka mai Ijipita. Ni vosoti keimami ka mo ni kakua ni beitaki keimami ena nona labati e dua na tamata dodonu.”

⁹ Ia ni o ni sa vakayacora na ka sa vinakata ko Jiova o ni na sega kina ni beitaki ena vuku ni laba oqo.

Baleta na Yalewa Vesu mai na i Valu

¹⁰ “Ena gauna sa solia kina vei kemuni ko Jiova na qaqa ena i valu ka ra sa kau mai vakavesu o ira na meca,

¹¹ ena rawa ni tiko maliwai ira na vesu e dua na yalewa rairai totoka o ni gadreva me watimuni.

¹² Mo kauti koya ki na nomu vale, ia me tasia vakadua na uluna o koya, ka kotiva na nona i taukuku ni liga,

¹³ ka veisautaka na nona i sulu. Me na qai tiko mada o koya me vula dua ena nomu vale me tagicaki tamana kei tinana kina; ni sa oti o ya, sa rawa ni o tauri koya me watimu.

¹⁴ Ia e muri, kevaka sa oti na nomu vinakati koya, mo qai laivi koya me lako ena galala baleta ni o a vakaukauwataka mo veiyacovi kaya. Mo kakua ni volitaki koya me vaka e dau vakayacori vei ira na bobula.

Baleta na i Votavota ni Ulumatua

¹⁵ Kevaka e dua na tagane sa lewe rua na watina, dua vei rau e lomana vakalevu ka dua e lomana vakalailai, ia kevaka e rau vakasucuma vata e yadua na luvena tagane, ia na gone ka sucu e liu vei rau e luve i koya ka lomana vakalailai.

¹⁶ Ia, na tamata o ya ni sa vinakata me wasea na veika e taukena, vei rau na luvena tagane, sa sega ni dodonu vua me solia na i votavota, vua na luvena ka vakasucuma na watina ka dau lomana vakalevu cake, vei koya na luvena tagane ka lomana vakalailai o koya, ka a sucu e liu.

¹⁷ Sa dodonu vua me okata me nona ulumatua o koya na luvena ka lomana vakalailai na tinana, me solia vua e rua na i votavota ni yau kece e taukena; me vaka ni o koya na ulumatua sa dodonu me taukena na i yau o ya.

Baleta na Gonetagane Talaidredre

¹⁸ Kevaka e dua na tamata e dua tiko na luvena tagane yalo kaukauwa, dau vakadrecike, dau talaidredre vei rau na nona i tubutubu ka dina ga ni rau dau totogitaki koya,

¹⁹ Me rau kauti koya na nona i tubutubu vei ira na qase ena nodratou koro, me ra vakatarogi koya kina vakamatailalai.

²⁰ Me qai vosa vakaoqo o rau na nona i tubutubu vei ira na qase ni koro, Na luve i keirau tagane oqo sa yalo kaukauwa, vakadrecike, talaidredre, dau vakaoti lavo ka dau mateni.

²¹ Ni oti o ya, me ra qai tucake na tagane kece ena koro o ya ka vakaviriki koya ena vatu me yacova sara ni sa mate; me kawaboko kina mai vei kemuni na ca oqo. Era sa qai rogoca kecega na Isireli na ka sa yaco, ka vakasinaiti ena rere.

Na Veilawa Eso

²² Kevaka me vakamatei e dua na tamata ena vuku ni dua na cala, me qai vakaliligi na tamata o ya ena dua na kau,

²³ me kakua ni lili tu ga e kea na yagona me bogi. Me bulu ga ena siga o ya, ka ni sa tu ga na cudru i Jiova vua sa rube toka ena kau. Mo ni buluta na yagona me kakua kina ni vakadukadukalitaka na vanua sa solia vei kemuni ko Jiova na nomuni Kalou.