Taniela 8 - Ai Vola Tabu Ena Vakavakadewa Vou

Raivotu ni Sipi kei na Me

¹ Oi au o Taniela. Ena i ka tolu ni yabaki ni tui i Pelisasari, au a raica kina na i karua ni noqu raivotu.

² Ena raivotu o ya, au sa raica vakasauri ni'u a tu ena loma ni koro levu ka vakabai o Susa, ena yasana o Ilama. Au sa tu ena bati ni uciwai na Ulai.

³ Au sa rai cake ka raica e dua na sipi tagane ni tucake tu ena bati ni uciwai. E rua na nona i leu, e rau balavu ruarua na i leu oqo ka dua vei rau e balavu sara. Ia o koya sa muri mai sa balavu sara.

⁴ Au a vakaraica tu na sipi tagane ni sa cumucumuraka na nona i leu vaka ki na ra, ka vaka ki na vualiku kei na ceva. E sega na manumanu e torovi koya rawa se me dro bula rawa mai vua, se dro rawa mai na nona kaukauwa. Sa cakava o koya na ka ga e vinakata ka yaco me qaciqacia mai.

⁵ Ni'u sa vakasamataka tiko se cava na i balebale ni ka oqo a qai cici mai ena yasayasa vakara e dua na me tagane; na totolo ni nona cici a sega kina ni tara na qele na yavana. E dua wale ga na nona i leu levu ka toka ena veimama ni matana ruarua.

⁶ Ni yaco mai na me vua na sipi tagane e rua na nona i leu au sa raica tiko e liu ni tu ena bati ni uciwai, a qai cicivi koya na sipi na me ena nona kaukauwa taucoko.

⁷ Au sa vakaraici koya ni sa cumuta na sipi tagane. Sa rui levu na nona cudru na me ka veicumuyaka na sipi tagane ka mani musuka ruarua na nona i leu. E sega na nona kaukauwa na sipi me vorati koya na me, ia na me sa butubuturaka na sipi ka davo ki na qele. E a sega ni dua me vakabulai koya rawa mai na kaukauwa ni me.

⁸ A tubu cake tikoga na nona qaciqacia na me, ia ena gauna sara ga a tu donu kina na i leu a ramusu, a qai cadra tale mai kina e va na i leu vovou e ratou dui golegole me yadua ki na matanicagi vava.

⁹ A qai tubu mai e dua na basoga ni i leu lailai ena tolo ni dua vei iratou na i leu e va. A vakaraitaka na nona kaukauwa na i leu vou oqo vaka ki na ceva kei na tokalau, ka vaka talega ki na Vanua Yalataki.

¹⁰ Sa tubu cake ka kaukauwa vinaka na i leu lailai oqo me valuta na mataivalu ni lomalagi o ira na kalokalo ka viritaka sobu mai eso ki na qele ka buturaki ira.

¹¹ Sa viavialevu vua na tui ni mataivalu ni lomalagi o koya, ka kauta tani mai vua na tui na i soro ni veisiga, ka vakadukadukalitaka na vale tabu.

¹² Ena vuku ni valavala ca era sa soli na i vavakoso vei koya ka vaka kina na i soro ni veisiga ka sa buturaki sobu ki na qele, ia na veika kecega sa cakava na i leu o ya, sa rawata vakavinaka.

¹³ Au a qai rogoca e dua na yalosavasava ni taroga e dua tale na yalosavasava, ka vaka, “A cava beka na dede ni gauna ena yaco tiko kina na veika e raici ena raivotu me baleta na i Soro ni Veisiga, na i valavala ca vakasisila, na vakacacani kei na buturaki ni valenisoro kei na i vavakoso?

¹⁴ Sa sauma o koya, ka kaya vei au, “Ena qai oti ni sa sivi e 2,300 na gauna ni vakacaboisoro ni mataka kei na yakavi, ena qai vakavoui tale na vale tabu ena kena i tutu dodonu.”

Vakamacalataka na Raivotu o Kaverieli

¹⁵ Oi au o Taniela, au a tovolea tiko me'u kila rawa na i balebale ni raivotu. Ia, au sa qai raica vakasauri e dua na ka e vaka na tamata ni keirau veiqaravi tu.

¹⁶ Au sa rogoca sara na domo ni kaci mai na uciwai na Ulai, ka vaka, “I Kaverieli, mo vakamacalataka vua na i balebale ni nona raivotu.”

¹⁷ Sa qai lako mai o Kaverieli ka mai tu e yasaqu, ia ena levu ni noqu rere, au a cuva sobu vakatoboicu ki na qele. A qai kaya vei au o koya, “O iko na kai vuravura, oqo na kena i balebale mo kila. Na raivotu oqo sa baleta na i vakataotioti ni veika kecega.”

¹⁸ Ni se vosa tikoga o koya, au a qai bale sobu ki na qele ni'u sa sega ni vakilai au. Ia sa qai tauri au o koya, ka vakaduri au cake tale ki yavaqu,

¹⁹ ka kaya, “Mo rogoca, au na vakaraitaka vei iko na veika ena yaco ena veicudruvi ni gauna mai muri, ka ni na yaco oqo ena gauna sa lokuci ena i vakataotioti ni gauna.

²⁰ Na sipi tagane e rua na nona i leu o a raica sai rau na matanitu o Mitia kei Peresia.

²¹ Na me, na matanitu o Kirisi. Na kena i leu ka toka ena maliwa ni matana ruarua sai koya na i matai ni kena tui.

²² Na i leu e va e ratou a qai cadra ni a ramusu na i matai ni i leu sa va na matanitu e ratou na tubu mai na nona matanitu, ia e ratou na sega ni kaukauwa me vaka na nona kaukauwa.

²³ Ena voleka ni oti na nodratou lewa na veimatanitu oqori, o ya ni ra sai valavala ca vakalevu sara ka sa yacova na kena i yacoyaco, sa na qai tubu e dua na tui yalokaukauwa, ka matai sara ena vere ni ca.

²⁴ Ena tubu me kaukauwa o koya, ka ni vakavuna na veivakarusai e rerevaki, ia na veika kecega e rawata vakavinaka sara. Ena vakarusai ira na kaukauwa kei ira na tamata ni Kalou.

²⁵ Ena cakacaka vaqaseqase o koya me veirawai sara vakalevu na nona vere ca; ena nona nanuma, sa tamata yaco ka levu talega o koya, ka na vakarusa e lewe vuqa na tamata ni sega ni bau vakasala taumada vei ira. Ena vakalevulevui koya sara talega vua na Turaga ni veituraga kecega. Ia, ena qai muduki ga o koya, ka sega ena kaukauwa vakatamata.

²⁶ Na raivotu ni vakacaboisoro ena mataka kei na yakavi sa vakamacalataki oti vei iko, e ka dina sara ga. Ia, mo maroroya sara ka vunia, baleta ni sa rui yawa na gauna me na qai yaco kina na dina ni raivotu oqo.”

²⁷ Oi au, o Taniela, a yaco vei au e dua na malumalumu levu, ka'u mani tauvimate sara ka siga vica. Au a qai duri ka lesu tale ki na cakacaka sa lesia vei au na tui. Sa vakalomaleqataka na noqu vakasama na raivotu o ya ka'u sega kina ni kila rawa na kena i balebale dina.