Taniela 7 - Ai Vola Tabu Ena Vakavakadewa Vou

Raivotu ni Manumanu

¹ Ena i matai ni yabaki ni tui Papiloni i Pelisasari, a tadra ka raica na raivotu o Taniela, ka sa vola na kena i tukutuku, vakaoqo: Oi au o Taniela, oqo na i tukutuku:

² ni ka au a raica ena noqu tadra ena bogi o ya. A veiliwayaki vakaukauwa tiko na cagi mai na veimatanicagi e va ka tadrava kaukauwa na dela ni wasawasa.

³ E ratou a qai basika cake mai na loma ni wasawasa e va na manumanu rerevaki; sa duidui na kedratou i bulibuli yadua.

⁴ Na i matai ni manumanu rerevaki sa vaka na i rairai ni laione, ia sa vakatabana me vaka na taba ni ikeli. Ni'u a vakaraica tiko, e rau a qai vudolo ka cavuka tani na tabana. A votu mamaca mai matasawa na manumanu rerevaki oqo ka duri tu me vaka na tamata; a yaco me tiko vua na vakasama vakatamata.

⁵ Au a qai raica tale na i karua ni manumanu. O koya oqo sa vaka na i rairai ni dua na bea ka sa tucake tu ena yavana ruarua. Sa katia tiko na bea oqo e tolu na sui ni sarisari, ka dua na rorogo ni domo sa tukuna tiko vua, “Mo kana, tiloma na lewe ni manumanu.”

⁶ Au a rai tu ga, ka'u a raica e dua tale na manumanu rerevaki. Na manumanu rerevaki oqo sa vaka na i rairai ni dua na lepate. Ia, e toka e dakuna e va na tabana e ratou tautauvata kei na taba ni manumanu vuka. E va na uluna! Sa tu vua na kaukauwa me lewa na ka.

⁷ Ni'u vakararai tu, au a raica na i kava ni manumanu rerevaki. A sa kaukauwa sara, ka rui vakadomobula, ka vakarise kete. Sa lelevu na batina ka ra kaukamea; a sa kana ka buturaka sobu na vo ni veika kecega a kania. A duatani na manumanu oqo mai vei iratou na manumanu tale e tolu. A tini na nona i leu;

⁸ ia, ni'u sa vakasarava tiko na i leu, au a qai raica ni a tubu mai e dua tale na i leu lailai ena kedratou maliwa na i leu e tini, ka vakabalea sara e tolu vei iratou. Na i leu oqo a vakamatana ka vakagusuna me vaka na tamata, a vosavosa tiko vakadokadoka ka vosa vakaviavialevu.

Raivotutaki o Koya sa Bula Tawa Mudu

⁹ Ni'u vakararai tu, au a raica ni ra mai biu eso na i dabedabe vakatui. Sa qai mai dabe ena dua vei ira na i dabedabe vakatui oqo o koya sa bula ka sega ni mudu. Sa vulavula na nona i sulu me vaka na uca cevata, ka sa vaka na vutinisipi uasivi sara na drau-ni-uluna. Na nona i dabedabe vakaturaga ka sa semati ki na qiqi bukawaqa, a sa waqa tu

¹⁰ ka veisebayaki tiko mai kina na yameyame ni buka. Era lewe udolu vakaudolu na tamata era tiko e kea me ra qaravi koya, ka ra milioni vakamilioni era sa tu e matana. A qai tekivutaki na veilewai, ka ra sa cegai tu na kena i vola.

¹¹ Au a vakararai ena vuku ni vosa dokadoka kei na vosa vakaviavialevu ni i leu o ya. Au sa rai tu ga sa vakamatei na i kava ni manumanu ka viritaki na yagona ki na bukawaqa, me vakarusai kina.

¹² Ia o iratou na vo ni manumanu, sa kau tani mai vei iratou na nodratou kaukauwa, ia e ratou a sereki ga me ratou bula voli tale mada vakalailai.

¹³ Ena raivotu ena bogi o ya, au a raica kina e dua sa vaka na i rairai ni luve ni tamata. Sa lako voleka mai o koya, ia a vakavolivoliti koya ga na o, ka sa lako yani vua sa bula vakadede sara, me la'ki vakaveikilaitaki vua.

¹⁴ E kea, a sa la'ki soli kina vua na lewa, na dokai kei na kaukauwa vakatui ka rawa kina ni ra qaravi koya o ira na duikaikai kei na duivosavosa mai na veiyasana kecega. Na nona kaukauwa ena sega ni oti rawa, kei na nona matanitu ena bula tikoga ka sega ni mudu.

Vakamacalataki na Raivotu

¹⁵ A vakidroataki au sara ga na raivotu au a raica, ka sa taqaya vakalevu kina na lomaqu.

¹⁶ Au sa torova ka taroga e dua vei ira ka tu voli e kea, ka kerei koya me vakamacalataka vei au na i balebale ni veika kecega a yaco tiko. Sa qai vakamacalataka vei au o koya na kena i balebale, ka sa vakaoqo:

¹⁷ Na manumanu rerevaki e va, sa va na matanitu e ratou na tubu mai e vuravura.

¹⁸ Sa na soli vei ira na tamata ni Kalou Cecere na kaukauwa kei na lewa me nodra tikoga ka sega ni mudu.

¹⁹ Au a via kila talega eso na ka me baleta na i kava ni manumanu, o koya ka duatani duadua mai vei iratou na kena vo, ni vakarerevaki, e bati kaukamea ka parasa na nona i qaso. Na manumanu ka a kanalaka ka buturaka sobu na vo ni veika kecega a kania.

²⁰ Au sa via kila na veika e baleta na nona i leu e tini, kei koya a qai cadra mai e muri ka vakabalea tani e tolu vei iratou na i leu e tini kei na i leu lailai sa vakamatana ka vagusuna sa vosa vakaviavialevu ka vosa dokadoka. E levu ka rerevaki cake na i leu oqo mai vei ira na kena vo.

²¹ Au a rai tu ga, sa veivala na i leu oqo kei ira na tamata ni Kalou ka mani rawai ira.

²² Ia a lako mai o koya sa dede sara na nona bula ka tauca na lewa ni ra dodonu o ira na tamata ni Kalou Cecere. Sa yaco mai na gauna me ra taukena kina na tamata ni Kalou na matanitu.

²³ Oqo na i vakamacala a tukuni vei au: “Na i kava ni manumanu rerevaki sai koya na i kava ni matanitu ena qai tubu mai e vuravura ka na duatani mai vei ira na veimatanitu kecega sa liu vua. Ena kania na vuravura taucoko na matanitu oqo ka na buturaka sobu.

²⁴ Na i leu e tini sa tini na tui era na tubu mai na matanitu vou oqo. Oti o ya ena qai tubu tale mai e dua na tui; ena duatani o koya mai vei ira na lewe tini ka na ravuta mate o koya e lewe tolu vei ira.

²⁵ Na tui oqo ena vosa vakacacataka na Kalou Cecere ka na tabaki ira sobu na tamata ni Kalou. Ena tovolea o koya me veisautaka na lawa eso kei na gauna ni solevu vakalotu eso. Era na qai bula voli na tamata ni Kalou ena lewa ni nona kaukauwa ka yabaki tolu veimama na kena dede.

²⁶ Ni oti oqo, sa na qai tekivutaki na veilewai, ena qai kau tani na nona kaukauwa na tui o ya ka vakarusai vakadua.

²⁷ Ena qai soli vei ira na tamata ni Kalou Cecere na nodra kaukauwa kei na veika cecere ni veimatanitu kecega e vuravura. Ia na nodra kaukauwa sa na sega ni oti rawa, ia o ira na veituraga kecega era na talairawarawa me qaravi ira na tamata ni Kalou cecere.”

²⁸ Sa oti eke na i tukutuku oqo. Oi au o Taniela, au a rere vakalevu ka vulaci na yagoqu, ia, au a katona me noqu duadua ga na veika kecega oqo.”