Taniela 5 - Ai Vola Tabu Ena Vakavakadewa Vou

¹ Ena gauna a tui tiko kina o Pelisasari na tui, e a sureti ira e lewe 1000 na turaga ki na dua na solevu ni kana magiti, ka sa tiko sobu ka gunu waini vata kei ira.

² Ni ra gunu waini tiko, a qai vakarota o Pelisasari me ra la'ki kau mai na bilo koula kei na bilo siliva ka a kauta vakaitokinivalu mai na vale tabu mai Jerusalemi o Nepukanesa na tamana. A sa vinakata na tui me mai gunu waini kina o koya, o ira na turaga sureti, o ira na watina kei ira na watina lalai.

³ Era a qai la'ki kauta mai na bilo koula, ka ra mai vakayagataka me ra gunu kina.

⁴ Era a gunu waini ka vakavinavinaka vei ira na kalou koula, na kalou siliva, na kalou parasa, na kalou kaukamea, na kalou kau, kei na kalou vatu.

⁵ E qai vakasauri ni sa basika e dua na liga ni tamata ka sa volavola ena lalaga boro lase e loma ni valenitui, ena vanua ka lauta vakavinaka tiko na rarama ni cina ni loma ni vale. Sa raica rawa sara ga na tui na liga o ya ni volavola tiko.

⁶ A sa vulaci na yago ni tui ka sautaninini na duruna ena levu ni nona rere.

⁷ A qai kacikaci na tui me dua e la'ki kauti ira mai na daucaka mana, o ira na vuku kei ira na dautukuna na kalougata. Ni ra curu mai, sa qai kaya vei ira na tui, “O koya ga vei kemuni e wilika rawa na volavola oqo ka tukuna vei au na kena i balebale, sa na tokara o koya na kote lokaloka balavu vakatui ka taubena na i taube sinucodo koula ni veidokai; ia sa na i katolu o koya vei keitou na liu ena matanitu oqo.”

⁸ Era a yaco kece yani na dauvakasala ni tui, ia e a sega sara ni dua vei ira e wilika rawa na volavola se tukuna na kena i balebale vua na tui.

⁹ E kea, a qai taqaya vakalevu ga na tui ka vulaci vakalevu cake na yagona, ka ra veilecayaki na nona tamata turaga ena ka me ra cakava.

¹⁰ Ia a sa rogoca na ranadi na nodra maue na tui kei ira na nona vakailesilesi turaga, ka mani curu yani vei ira ki na loma ni olo ni veivakamarautaki. A sa kaya o koya, “Mo ni bula na tui ka sega ni mudu! Ni kakua ni kidroa se rairai malumalumu.

¹¹ E tiko voli ena nomu matanitu e dua na tamata ka tiko vua na yalodra na kalou tabu. Ni a tui tiko na tamamu, a kunei na tamata oqo ni sa yalomatua ka kila-ka, ka vuku sara me vaka na nodra vuku na kalou. Sa qai lesi koya na tamamu o Nepukanesa na tui, me nodra i liuliu na daukilakila, na daucaka mana, na vuku kei ira na dautukuna na kalougata.

¹² Na ka e rawata sa kunekune vakavudua na tamata e yacova. Sa vuku ka matai sara ena vakamacalataka na tadra, sa kila na serelaka na iba ka vakamacalataka na veika vuni. E dodonu mo veitalai mada me la'ki lako mai na tamata oqo o Taniela, o koya ka sa vakayacana na tamamu na tui me o Pelitisasari, ka me mai vakamacalataka vei iko na i balebale ni ka oqo.”

Vakamacalataki na Volavola

¹³ Sa qai la'ki kau mai o Taniela ki vua na tui. A sa qai tarogi koya na tui, “O iko li o Taniela, e dua vei ira na Jiu kaivesu a kauti ira mai Jutia ko tamaqu na tui?

¹⁴ Au rogoca ni tiko vei iko na yalodra na kalou tabu, ka o sa matai sara, ka kila-ka, ka yalomatua.

¹⁵ Era a la'ki kacivi mai na dauvakasala kei ira na daucaka mana me ra mai wilika na volavola oqo ka tukuna vei au na kena i balebale, ia era a sega ni kila rawa na kena i balebale.

¹⁶ Au rogoca ni sa rawa vei iko mo kunea na ka sa vunitaki na kena i balebale, ka vakamacalataka na veika vuni. Kevaka o wilika rawa na volavola oqo ka tukuna vei au na kena i balebale, o sa na tokara na kote lokaloka balavu vakatui ka taubena na i taube sinucodo koula ni veidokai, ka vakayacori mo i katolu ena i tutu ni veiliutaki ena matanitu.”

¹⁷ Sa qai kaya o Taniela, “Na nomuni solisoli loloma me sa nomuni ga, se mo ni solia vua e dua tale. Ia au na wilika ga vei kemuni na tui na ka sa volai tu, ka tukuna na kena i balebale.

¹⁸ “Na Kalou Cecere a vakayacori tamamuni o Nepukanesa na tui me dua na tui kaukauwa, ka qaqa, ka solia vua na dokai kei na lagilagi.

¹⁹ Sa ka levu na nona kaukauwa kei na qaqa, ka ra sa rere ka sautaninini vua o ira na duikaikai kei na duivosavosa mai na veivanua kecega. Kevaka e via vakamatea e dua na tamata, ena vakayacora ga; kevaka e via vakabula e dua na tamata, ena vakayacora ga. Sa vakalevulevuya se vakalolomataka e dua ga me vaka sa lomana vakakina.

²⁰ Ia ni sa dokadokai koya ka qaciqacia ka viavialevu e lomana, a sa qai vakasivoi kina mai na nona i tutu vakatui ka sa kau tani mai vua na nona lagilagi.

²¹ A vakasevi tani mai na bula veimaliwai vakatamata, ka sa yaco na nona vakasama me tautauvata kei na vakasama ni manumanu. Sa la'ki bulavata kina kei ira na ose, a sa kana co me vaka na bulumakau, ka sa moce e tautuba ka sega na ka me taqomaki koya mai na tegu ni lomalagi. Ia, a sa qai vulica e muri ni Kalou levu ni lomalagi sa lewa na veimatanitu kecega ka sa rawa talega ni solia na kena veiliutaki vua ga e dua ka sa digitaka.

²² “Ia oi kemuni, na luvena tagane, e dina ga ni o ni sa kila oti tu na veika oqo, ia o ni sa sega ga ni vakayalomalumalumutaki kemuni.

²³ O ni sa vakacerecerei kemuni cake mai vua na Turaga ni lomalagi ka vakacuruma mai ki na vale oqo na bilo era a kau mai na nona Valenisoro. Oi kemuni, o ira na nomuni turaga, o ira na watimuni kei ira na watimuni lailai o ni sa gunu waini ena bilo kecega oqo ka vakavinavinaka vei ira na kalou era buli ena koula, siliva, parasa, kaukamea, kau, kei na vatu — na veikalou era sa sega ni rai se rogo, ka sega na ka era kila. Ia oi kemuni sa sega ni doka na Kalou ka vakatulewataka se mo ni bula se mate, ka lewa na veika kecega o ni vakayacora.

²⁴ Sai koya o ya vuna sa tala mai kina na Kalou na liga oqo me mai vola na veivosa oqo.

²⁵ Oqo na ka sa volai tu: ‘Mini, Mini, Tikeli Ufasini.’

²⁶ Ia oqo na kena i balebale: Mini: Sa wilika na siga ni nomu matanitu na Kalou, ka sa na mai yalana.

²⁷ Tikeli: O sa vakarautaki oti na kemu bibi ena i vakarau bibi ka kunei ni o sa rui mamada;

²⁸ Piresi: sa wasewasei na nomu matanitu ka soli vei ira na kai Mitia kei na kai Perisia.”

²⁹ Sa qai vakarota sara o Pelisasari me ra vakaisulutaki Taniela ena kote lokaloka balavu vakatui ka vakataubeni koya ena i taube sinucodo koula ni veidokai; ka vakatikori koya me i katolu vei iratou na lewa na matanitu.

³⁰ Ena bogi ga ni siga o ya, a labati kina o Pelisasari, na tui Papiloni:

³¹ ka kovea na kaukauwa vakatui o Taraiasi na kai Mitia, ni sa 62 na nona yabaki.