Taniela 3 - Ai Vola Tabu Ena Vakavakadewa Vou

Vakarokorokotaki na Matakau Koula

¹ Sa qai lewa o Nepukanesa na tui me buli e dua na matakau koula me 27 na mita na kena cere ka tolu na mita na kena raba, ka sa la'ki vakaduri tu mai na ena buca o Tura, ena yasana o Papiloni.

² Ena lewa ni tui, era a qai soqo vata kece mai na vakailesilesi vakamatanitu o ira na turaga ni vanua, na kovana, na sosomi ni kovana, na dauvakasala, na dauniyau, na turaganilewa levu, na turaga ni lewa kei ira kecega na vakailesilesi tale eso mai na veiyasana. O ira oqo me ra na mai tiko ena soqo ni vakatabui ni matakau sa vakaduria na tui o Nepukanesa.

³ Ena kena gauna, era a qai soqo vata kece yani na vakailesilesi oqo ki na soqo ni vakatabui ni matakau ka ra la'ki veiqaravi tu kei na matakau.

⁴ A qai kaci e dua na matanivanua ni tui, ka vaka, “Oi kemuni na duikaikai ka duivosavosa mai na veivanua kecega!

⁵ O ni na rogoca na domo ni davui, ka tarava yani na bitu ni vakatagi, na laya, na tisita, na api ka ra qai solevaka vata kei na veimataqali vakatagi kecega. Ena gauna sa tekivu kina na vakatagi, mo ni cuva sobu kecega ki na qele ka vakarokoroko ki na matakau sa vakaduria tu oqo o Nepukanesa na tui.

⁶ Ke dua ena sega ni cuva sobu ka vakarokoroko, ena biu o koya ena siga ga edaidai ki na lovo ni bukawaqa.”

⁷ O koya oqo, ni tekivu ga na vakatagi, era sa cuva sobu kece sara na duikaikai kei na duivosavosa mai na veivanua me ra vakarokoroko ki na matakau koula.

Beitaki e Lewe Tolu na Jiu

⁸ Ia eso vei ira na kai Papiloni era a vakayagataka na soqo oqo me rawa kina ni ra beitaki ira na Jiu.

⁹ Era a kaya vei Nepukanesa na tui, “Mo ni bula na tui ka sega ni mudu.

¹⁰ Oi kemuni na tui o ni a vakarota me ra cuva sobu na tamata kecega ka vakarokoroko ki na matakau koula ena gauna sara ga a tekivu kina na vakatagi.

¹¹ Ia kevaka e dua e sega ni cuva ka vakarokoroko ki na matakau, sa na biu o koya ki na lovo bukawaqa.

¹² Ia e lewe vica saka vei ira na Jiu o Setareki, o Mesake kei Apeteniko, o ni a lesi iratou me ratou liutaka na yasana o Papiloni. O iratou oqo e ratou sa talaidredre tiko ki na nomuni vakaro. E ratou sa sega ni vakarokoroko ki na nomuni kalou, se bau cuva sobu ki na matakau koula ni sa vakaduria tu oqo!”

¹³ Sa qai waqa me vaka na buka na cudru ni tui ena ka oqo, ka vakarota me ratou kau mai ki vua na lewe tolu oqo.

¹⁴ Sa qai tarogi iratou o koya, ka kaya, “I Setareki, Mesake, kei Apeteniko, e dina li ni o dou bese ni vakarokoroko ki na noqu kalou, ka bese talega ni cuva ki na matakau koula au sa vakaduria tu oqo?

¹⁵ Ia oqo, ena gauna sara ga o dou rogoca kina na domo ni davui, na bitu ni vakatagi, na laya, na tisita, na api kei na i vakatagi tale eso, dou cuva sobu sara ka vakarokoroko ki na matakau. Ia ke sega o dou na viritaki sara ga oqo ki na lovo bukawaqa. Ia o cei na kalou me na vakabula i kemudou rawa mai na ligaqu?

¹⁶ E ratou a qai sauma na vosa ni tui o Setareki, o Mesake kei Apeteniko, ka kaya, “Oi Kemuni Nepukanesa na tui, keitou na sega ni tovolea me keitou taqomaki keitou mai na veika oqo.

¹⁷ Ia kevaka sa rawa vua na Kalou keitou sa qarava me vakabulai keitou mai na lovo bukawaqa, ka mai ligamuni talega na tui, ena vakabulai keitou dina ga.

¹⁸ Kevaka e sega ni cakava vaka kina, ia mo ni kila deivaki ga na tui ni keitou na sega ni vakarokoroko ki na nomuni kalou, ka keitou na sega talega ni cuva sobu ki na matakau koula o ni sa vakaduria tu.”

Biu na Jiu ki na Lovo Bukawaqa

¹⁹ Sa qai duatani sara na cudru i Nepukanesa, ka sa damudamu na matana ena nona katakatataki iratou o Setareki, o Mesake kei Apeteniko; ka vakaroti ira na nona tamata me ra la'ki vakatakatataki na lovo bukawaqa ka me vakavitutaki na kena katakata mai na kena i vakarau dodonu.

²⁰ A qai vakaroti ira na tamata kaukauwa duadua ena nona mataivalu me ra vesuki iratou yadudua na lewe tolu oqo ka viritaki iratou ki na bukawaqa e loma ni lovo.

²¹ Era a qai vesuki iratou yadudua ni ratou sa vakaisulu vinaka tu — na sote, kote balavu, na i sala, na ka kece — ka viritaki iratou yani ki na loma ni lovo.

²² Ia me vaka ni rui kaukauwa na lewa ni tui, ka sivia sara na katakata ni lovo, a mani yameci ira kina na tamata era a colati iratou yani ki na lovo na yameyame ni buka.

²³ Ia o Setareki, o Mesake kei Apeteniko e ratou sa qai tau yani ki na loma ni bukawaqa ni ratou se vesu tu ga ena i vau.

²⁴ A qai lade cake na tui ka duri tu. A tarogi ira na nona daunivakasala, ka vaka, “E sega li ni lewe tolu ga na tamata e da a biuta yani ki na lovo bukawaqa?” Era a sauma, ka kaya, “E vaka saka kina, kemuni na tui.”

²⁵ A tarogi ira tale na tui, ka vaka, “Ia a cava ga na vuna au sa raica kina ni sa lewe va na tamata e ratou lako wavoki tiko ena loma ni bukawaqa? E ratou sa sega ni vesu tu, ka sega ni bau dua na i vakatakilakila ni kama e kune vei iratou. Na kedratou i kava sa vaka na luve ni Kalou.”

Sereki na Jiu

²⁶ Sa qai toro voleka ki na gusu ni lovo bukawaqa o Nepukanesa, ka kaci yani: I Setareki! Mesake! Apeteniko! Kemudou na tamata ni Kalou Cecere! Dou lako mai ki tautuba!” E ratou a qai lako mai ki tautuba.

²⁷ Era a qai soqoni yani vei iratou o ira na tui ni vanua, na kovana, na i sosomi ni kovana kei ira na daunivakasala ni tui me ra saravi iratou na tamata oqo ni ratou sa sega ni kama ena buka. E sega ni tavucorocoro se boi kamakama na drau ni uludratou, e sega ni kama na nodratou i sulu ka sega ni boi kubou na yagodratou.

²⁸ A qai kaya na tui, “Me vakarokorokotaki na Kalou i Setareki, Mesake kei Apeteniko. A tala mai o koya na nona agilosi ka mai vakabulai iratou na tamata oqo, baleta ni ratou a dau qaravi koya ka vakabauti koya. E ratou a talaidredre ki na noqu i vakaro ka bolea na mate ena nodratou bese ni cuva ka vakarokoroko ki na dua tani tale na kalou, ia vua duaduaga na nodratou Kalou.

²⁹ Ia oqo, au sa vakaroti kemuni na duikaikai kei na duivosavosa mai na veivanua, ni kevaka e dua e vosa beca na nodratou Kalou o Setareki, Mesake kei Apeteniko, sa na basuraki bulabula o koya ka basuraki talega na nona vale me rusa vakadua. Sa segasega sara ni dua tale na kalou e rawa ni veivakabulai me vakaoqo.”

³⁰ Sa qai solia na tui na i tutu cecere cake ena yasana o Papiloni me nodratou o Setareki, o Mesake kei Apeteniko.