Taniela 1 - Ai Vola Tabu Ena Vakavakadewa Vou

Rawai Jerusalemi O Nepukanesa

¹ Ena i katolu ni yabaki ni tui Juta tiko o Jioiakimi, a lako sobu ki Jerusalemi o Nepukanesa na tui Papiloni, ka sa buku na druadrua ni koro.

² A sa vakatara na Turaga vei Nepukanesa na tui me vesuki Jioiakimi na tui Juta ka me kauta talega vakaitoki ni valu eso na i yaya tabu ni valenisoro. A sa kauti ira lesu talega eso na kaivesu ki na burekalou ni nona kalou eso, ka biuta na i yaya tabu ni valenisoro sa tauri vakavesu mai ki valeniyau ni nona kalou eso.

Digitaki Eso Na Cauravou ni Jiu

³ Sa qai vakarota na tui vei Asipinasi na vakailesilesi liu ni valenitui me digitaka mai eso na bobula mai Isireli era kawa ni tui se ra kawa turaga.

⁴ O ira oqo me ra cauravou rairai vinaka, bulicaki vinaka, yalomatua, i tovo vinaka ka totolo ena vuli, ka me rawa ni ra rawata na cakacaka ni tiko vakavuli me ra na dauvakasala vua na tui. Ia me i tavi sara ga nei Asipinasi me vakatavulici ira ena vosa, na wili i vola kei na volavola vaka-Papiloni.

⁵ A vakarota talega na tui me dau soli vei ira na kakana kei na waini vata sara ga era dau vakayagataka ena veisiga o ira na cakacaka ena valenitui. Ni sa cava na yabaki tolu ni nodra tiko vakavuli, era sa na qai nona vakailesilesi na tui.

⁶ Vei ira na digitaki e ratou sa vakabau kina e lewe va na cauravou ni Jutia, o ya o Taniela, o Ananaia, o Misaeli kei Asaraia.

⁷ A qai vakayacani iratou vou tale na cauravou oqo o Asipinasi ena yaca vaka-Papiloni. O Taniela me yacana o Pelitisasari, o Ananaia me o Setareki, o Misaeli me o Mesake, kei Asaraia me yacana o Apeteniko.

Bese ni Kania na Kakana mai Valelevu

⁸ Ia o Taniela sa bulia oti e lomana me kakua ni vakadukadukalitaki koya ena kakana kei na waini mai na valenitui. Sa mani kerei Asipinasi na vakailesilesi liu me vukei koya.

⁹ Ena kaukauwa ni Kalou, sa kauwaitaki Taniela kina o Asipinasi ka via vukei koya;

¹⁰ ia a mani kaya ga vua, “Au sa rerevaka na turaga na tui. A vakarota oti o koya na ka mo ni kania ka gunuva, ia ke o sega ni rairai bulabula me tautauvata kei ira na vo ni cauravou, sa na rawa ni vakarota me'u vakamatei!”

¹¹ Sa qai la'ki kerekere tale o Taniela vua na i vakatawa a lesia o Asipinasi me dau vakatawai koya kei iratou na kai nona e lewe tolu,

¹² A kaya vua, “Tovolea mada mo vakani keitou ga ena kakana draudrau kei na wai me tini na siga.

¹³ Ni oti oqori mo qai vakatautauvatani keitou kei ira na cauravou era kania tiko na kakana mai Valelevu ka me qai tau na nomu lewa ena duidui ni keimami i rairai.”

¹⁴ A mani vakadonuya o koya na yadra me caka na vakatovotovo oqo me siga tini na kena dede.

¹⁵ Ni oti na gauna oqori, e ratou a bulabula cake ka kaukauwa o iratou oqo mai vei ira era a kania tiko na kakana mai Valelevu.

¹⁶ A qai vakasuka na kedratou kakana kei na medratou waini o koya na i vakatawa, ka solia ga vei iratou na kakana draudrau.

Kau Na Cauravou Vua na Tui

¹⁷ Sa qai solia na vuku kei na kila ka kece vaka-Papiloni na Kalou vei iratou na cauravou e lewe va oqo, ka sa solia talega vei Taniela me dau vakamacalataka na i balebale ni tadra kei na raivotu kecega.

¹⁸ Ni cava na nodra vuli yabaki tolu na cauravou ka vakarota o Nepukanesa me caka, a qai kauti ira yani vua o Asipinasi.

¹⁹ A veivosaki na tui kei ira kecega na cauravou, ka kunea ni ratou vinaka cake o Taniela, Ananaia, o Misaeli kei Asaraia mai vei ira kecega na kena vo. E ratou a mani curu me ratou dauvakasala vua na tui.

²⁰ Ia a veitalia ga se taro cava a taroga na tui, se ka dredre cava a vakavotuya mai me veivosakitaki, a kunea o koya ni ratou vinaka cake vakatini na lewe va oqo mai vei ira kecega na daukilakila kei ira na daucaka mana ena nona matanitu taucoko.

²¹ Sa mani tiko ga o Taniela ena valenitui ka yacova na i tekivu ni gauna e tui kina e Papiloni o Tui Sairusi.