Sakaraia 9 - Ai Vola Tabu Ena Vakavakadewa Vou

Tau na Lewa ki na Veimatanitu

¹ Oqo na vosa i Jiova: Sa lewa oti o koya me totogitaki na vanua o Aterata, kei na koro levu o Tamasiko. E sega wale ga ni o ira na veimataqali e Isireli, ia sa nei Jiova talega na koro turaga kei Siria.

² O Emaci, na vanua e rau veiyala kei Aterata, e nona talega, ka vakakina oi rau na koro lelevu o Taia kei Saitoni, vata kei ira taucoko sara na liga maqosa ni cakacaka.

³ Sa viria oti tu o Taia na nona bai ni valu, a sa binia talega na siliva kei na koula ka sa vakaitamera na kena levu.

⁴ Ia ena qai kauta tani na Turaga na nona i yau kece oqori. Ena viritaka yani ki wasawasa, ka na vakamai na koro me qeyavu vakadua.

⁵ Ena raica na ka oqo na koro o Asikiloni ka na rere kina. Ena raica oqo na koro o Qasa ka tuburi koya e dua na rarawa levu. Ena vakakina na koro o Ekironi, ni na vakaleqai na veika sa dau vakanuinui kina. Ena vakayalia na nona tui o Qasa, ka na biu lala tu o Asikiloni.

⁶ Era na tawani Asitoti na duikaikai. Sa kaya vakaoqo ko Jiova, “Au na muduka na nodra viavialevu na kai Filisitia oqo.

⁷ Ena muduki na nodra daukania na lewe ni manumanu sa tiko vata kei na dra, se na kakana vakatabui eso. O ira kece sara na vo-ni-bula era na okati me ra sa noqu tamata ka vaka e dua na mataqali ena yavusa o Juta. O Ekironi talega ena yaco me dua na i wase ni noqu tamata, me vaka era a cakava na Jepusaiti.

⁸ Au na yadrava na noqu vanua me kakua na mataivalu tani e takosova. Au na sega ni vakatarai ira tale vakadua na tui dauveivakararawataki me ra vakasaurarataki ira tale vakadua na noqu tamata.”

Na Tui me Namaki

⁹ Ni reki ka marau Oi kemuni na kai Saioni! Ni kaila ena marau levu Oi kemuni na kai Jerusalemi! Raica, sa lako tiko mai vei kemuni o koya na nomuni tui! Sa lako mai ena lagilagi kei na qaqa, Ia sa yalo malumalumu ga Ka vodoka voli na luve ni asa.

¹⁰ Sa kaya vakaoqo ko Jiova, “Au na kauta laivi na qiqinivalu mai Isireli, Ka kauta tani na ose mai Jerusalemi; Ena vakarusai na dakaititi Era a vakayagataki ena i valu. Ena cakava na nomuni tui Na nodra veivinakati na veimatanitu; Ena lewa o koya na wasawasa e dua ki na wasawasa kadua. Mai na uciwai na Uferetisi ki na i yalayala kei vuravura.”

Vakabau Tale na Tamata ni Kalou

¹¹ A sa kaya ko Jiova, “Ena vuku ni noqu veiyalayalati kei kemuni, O koya sa dregati ena dra ni soro, Au na sereki ira kina na kai nomu Me ra sereki mai na i keliwai maca ni tiko vakabobula.

¹² Ni lesu mai, Oi kemuni ka a tiko vakabobula Ka sa tiko oqo na nomuni nuinui. Lesu mai ki na nomuni i vakavakaruru. Au sa tukuna oqo vei kemuni, Ni'u na vakaruataka vei kemuni na kalougata Me i sau ni ka rarawa kecega O ni a sota kaya.

¹³ Au na vakayagataki Juta Me vaka na dakaititi ni sotia, Kei Isireli me vaka na moto saisai. Au na vakayagataki ira na tagane ni Saioni Me vaka e dua na i seleiwau, Ka me'u vala kina kei ira na kai Kirisi.”

¹⁴ Ena qai basika ko Jiova mai deladra na nona tamata; Ka na vaka na tatibi ni liva na nona vanataka na nona gasau. Ena uvuca na davui ko Jiova na Kalou; Ka na butuka yani na cagilaba mai na ceva.

¹⁵ Ena taqomaki ira na nona tamata ko Jiova ni lewevuqa Ka ra na vakarusai ira na kedra meca; O koya ena drodro yani Me vaka na dra ni dua na i soro; Ka sovaraki mai na dua na bilo Ki na dela ni cabocabonisoro.

¹⁶ Ni yaco mai na siga o ya, Ena qai vakabulai ira na nona tamata o Jiiova, Me vaka na nona taqomaki ira na sipi mai na leqa O koya na kedra i vakatawa. Era na caudre ena nona vanua Me vaka na caucaudre ni vatu talei ni dua na i sala vakatui.

¹⁷ Sa na qai totoka tu Ka rairai vinaka na vanua! Era na tubu cake ka kaukauwa sara Na i tabagone ena vuku ni sila kei na waini.