Sakaraia 14 - Ai Vola Tabu Ena Vakavakadewa Vou

Jerusalemi kei na Veimatanitu

¹ Sa voleka mai na siga ni lewa i Jiova. Ena siga oqori, ena kovei vakaukauwa kina na i yau kei Jerusalemi ka sa veivotayaki e matamuni.

² Ena kauti ira kece vata mai na veimatanitu ko Jiova me ra valuti Jerusalemi. Ena vesuki na koro, ena butakoci na i yau ni veivale, ka ra kucuvi na yalewa. Era na kau vakabobula e veimama na lewe ni koro, ia o ira na kena vo era na sega ni kau tani.

³ Ena qai lako yani ko Jiova me vala kei ira na veimatanitu oqori me vaka ga na nona a dau vala ena veigauna eliu.

⁴ Ena gauna o ya ena qai tucake tu o koya ena ulunivanua ni Veiolive, ki na tokalau kei Jerusalemi. Ena qai kavida rua na Ulunivanua ni Veiolive, ka wasea e dua na qakilo bucabuca vakaitamera e tadola tu mai na tokalau ki na ra. Ena qai toso vaka ki na vualiku e dua na veimama ni ulunivanua, ka toso vaka ki na ceva na kena veimama ka dua.

⁵ O ni na dro yani e loma ni qakilo bucabuca oqo, o koya ka basika sara yani ki na yasa ni ulunivanua ka dua. O ni na dro me vaka era a cakava na nomuni qase ni yaco na uneune ena gauna i Usaia na Tui Juta. Ena qai lako mai ko Jiova na noqu Kalou ka kauti ira vata mai na agilosi taucoko sara.

⁶ Ni yaco mai na gauna o ya, ena basika na rarama ka na sega kina na liliwa se uca cevata,

⁷ ka sega na butobuto. Ena siga kei na bogi, ena rarama tu ga vakadua na vanua. Ia na gauna ena yaco kina na veika oqo sa kila duadua ga ko Jiova.

⁸ Ni sa yaco mai na siga o ya, ena drodro mai Jerusalemi na wai ni bula, e dua na kena veimama ena drodro ki na Waitui Mate, ka drodro na kena i wase kadua ki na Meditereni. Ena drodro tu ga na wai oqo ena loma ni yabaki taucoko.

⁹ Ena qai yaco ko Jiova me tui ni vuravura taucoko; era na sokalou vua na tamata kecega ni sa Kalou o koya ka ra kilai koya ena yaca e duabau ga.

¹⁰ Na vanua taucoko, mai Kipa ena vualiku ki Rimoni mai na ceva, ena yaco me dua ga na vanua bucabuca levu. O Jerusalemi ga ena qai dabe duadua toka ena vanua cecere; ena tete yani na koro me tekivu mai na Matamata i Penijamini ki na Matamata e Tutuna, ena vanua a tiko taumada kina e liu e dua na matamata, ka vakakina mai na Vale cere-i-cake i Ananeli me yaco sara ki na vale ni qaqiwaini ni tui.

¹¹ Era na qai tiko vakaruru na tamata mai Jerusalemi ka na sega ni yacovi ira yani na veivakarusai.

¹² Ena qai vakatauva ko Jiova e dua na mate vakarerevaki vei ira na matanitu kecega era valuti Jerusalemi. Ena vuca laivi na lewedra ni ra se bula tikoga ka veilakoyaki voli; ena vuca talega na yaloka ni matadra kei na yamedra.

¹³ Ena gauna o ya, ena vakayacora ko Jiova me ra veilecayaki vakalevu ka rere na tamata, ka na vakavuna oqo me ra dui vesuki ira vakaukauwa na tamata eso era tu tikivi ira ka vakayacora vei ira na i vakarau kaukauwa.

¹⁴ Era na vala na Juta me ra taqomaki Jerusalemi kina. Era na qai kauta na nodra i yau kece na veimatanitu me vaka na i tokinivalu — na koula, na siliva kei na levu sara na i sulu voli dredre.

¹⁵ E dua talega na mate ca rerevaki ena tauvi ira na ose, na meuli, na kameli, kei na asa — na manumanu kecega ena nodra veitikotiko ni valu na meca.

¹⁶ Ia o ira vakayadua kece sa vo vei ira na veimatanitu kece sara era sa mai valuti Jerusalemi, era na lako cake ena veiyabaki me ra la'ki sokalou vua na Tui, ko Jiova ni lewevuqa, ka me ra la'ki qarava talega na Solevu ni Valetabanikau.

¹⁷ Ia kevaka e dua na matanitu e bese ni la'ki cuva vei Jiova ni lewevuqa me vaka ni sa Tui, ena qai sega ni tau na uca ena nona vanua.

¹⁸ Kevaka era besetaka na kai Ijipita me ra la'ki qarava na Solevu ni Valetabanikau, ena qai tauvi ira na mataqali mate vata ga sa dautauvi ira na veimatanitu yadua era bese ni lako.

¹⁹ Oqo na i totogi kei Ijipita ka vakakina na veimatanitu tale eso kevaka era sega ni qarava na Solevu ni Valetabanikau.

²⁰ Ena gauna o ya, ena bau ceuti talega ena kedra lali na ose na i tukutuku oqo, “Sa Tabu me nei Jiova.” Na kuro ni vakasaqa ena Valenisoro era na tabu talega me vaka ga na bilo era tu ena mata ni cabocabonisoro.

²¹ Na kuro ni vakasaqa kece sara e Jerusalemi kei Juta era na vakatabui me ra vakayagataki ga ena sokalou vei Jiova ni lewevuqa. O ira era dau ia na vakacaboisoro era na mai vakayagataka eso na kuro me saqa na lewe ni manumanu me i soro. Ni sa yaco mai na gauna o ya, ena sega tale na dauveivoli ena Valenisoro i Jiova ni lewevuqa.