Niemaia 3 - Ai Vola Tabu Ena Vakavakadewa Vou

Tara Vakavinaka Tale na Bai

¹ A sa la'ki cakacaka o Ilaiasipi na bete levu kei ira na i lawalawa bete ka tara vou tale na Matamata ni Sipi. Era a cabora ka vakatabuya, ka vakaduria na kena i sogo, ka vakakina na i wase ni bai me yaco yani ki na Vale cere-i-cake ni lewe Duanadrau, ka yaco sara ki na Vale cere-i-cake i Ananeli.

² E a taravi koya yani na nodra cakacaka ni viri bai na kai Jeriko; ka taravi ira yani o Sakuri, na luve i Imiri.

³ O ira na luve i Asena era a tara cake na Matamata ni Ika. Era a vakaduria na isa kei na matamata kece ni bai, ka ra vakacokotaka na kena i sogo-lawalawa kei na kena i qaso kaukamea me lokataki kina na matamata.

⁴ E tarava yani oqo na cakacaka ni viri bai i Meremoce na luve i Uraia, na luve i Akose. A sa tara cake na tikina e tarava o Mesulame na luve i Berekaia, na luve i Mesesapeli. A sa tara cake na tikina e tarava o Setoki na luve i Pana.

⁵ E taravi koya na nodra cakacaka na kai Tikoa. Ia o ira na nodra turaga era a sega ni via vakayacora na cakacaka sa lesia vei ira na nodra i liuliu vakacakacaka.

⁶ O rau o Jioiata na luve i Pasea kei Mesulame na luve i Pisotaia e rau a vakavinakataka na Matamata Makawa. Era a virikotora na kau kece ni matamata, ka ra vakaisogotaka, ka vakabira na kena bai lawalawa kaukamea kei na i vakadei ni katuba me lokataka na matamata.

⁷ E tarava yani na nodrau cakacaka ni vakavinakataki bai nei Melataia na kai Kipioni kei Jatoni na kai Meronoci, oqo oi rau na kai Kipioni kei Misipa. O ira oqo era lewai mai vua na kovana ni veivanua ena Ra ni Uferetisi.

⁸ O Usieli na luve i Ariea, e dua na daucaka i yaya koula sa vakavinakataka na tikina e tarava. E tarava yani na cakacaka i Ananaia, e dua vei ira na daucaka ka boi vinaka. Oi rau oqo e rau vakavinakataki Jerusalemi me yaco yani ki na Lalaga Raraba.

⁹ A sa tara cake na tikina e tarava o Rifaia na luve i Uri, ni a veiliutaki voli o koya ena veimama ni tikina o Jerusalemi.

¹⁰ Sa tara cake na tikina e tarava o Jitaia na luve i Erumafi, ka toka volekata ga na nona vale. E vakavinakataka na tikina e tarava o Atusi na luve i Esapinaia.

¹¹ O Malikaia na luve i Arimi kei Asupi na luve i Peacimoapi e rau a vakavinakataka na tikina e tarava me yaco ki na Vale cere-i-cake ni Lovo.

¹² O Salumi na luve i Aloesi, o koya na dauveiliutaki ena i karua ni veimama ni tikina o Jerusalemi, sa tara cake na tikina e tarava ka veivuke vua o iratou na luvena yalewa.

¹³ O Anuni kei ira na kai Sanoa era a vakavinakataka na Matamata ni Buca. Era a cakava vou tale, ka vakaisogotaka, ka vakabira na bai lawalawa kaukamea ni katuba kei na kena i vakadei me lokataki kina. Era a vakavinakataka talega e rauta ni 440 na mita na balavu ni bai me yaco sara ki na Matamata ni Benu.

¹⁴ E a vakavinakataka na Matamata ni Benu o Malikaia na luve i Rekapi, o koya ka veiliutaki ena tikina o Peci Akerimi. A cakava vinaka tale na bai, ka vakabira vinaka na kena katuba kei na i vakadei kaukamea me lokataki kina.

¹⁵ Ia o Salumi na luve i Kolosea, o koya ka veiliutaki ena tikina o Misipa, sa vakavinakataka na Matamata ni Waivure. E a tara cake tale, ka ubia, ka cakava vinaka na kena katuba, kei na kena i qaso, kei na kena bai lawalawa kaukamea. A vakavinakataka talega na bai ni Drano o Sailoama ka toka volekata na nona tikinivanua na tui, me la'ki yaco sara ki na i kabakaba e lako sobu mai na koro i Tevita.

¹⁶ E tarava yani na cakacaka ni viri bai nei Niemaia na luve i Asipuki, e dua ka veiliutaki ena veimama ni vanua o Pecisuri. E a tara cake na tikina e tarava me yacova e dua na vanua taudonuya na i bulubulu i Tevita, kei na drano, kei na nodra vale na bati.

O Ira na Livai era Tara Bai

¹⁷ Era taravi koya yani ena cakacaka ni viri bai o ira na Livai: E a vakavinakataka na tikina e tarava o Riumi na luve i Bani. E tarava yani o Esapaia, o koya ka veiliutaki ena veimama ni yasana o Keila, ka vakavinakataka na tikina e tarava ena vuku ni nona yasana.

¹⁸ E taravi koya ena viri bai o Bavai, o koya sa liutaka na veimama ni vanua o Keila.

¹⁹ E taravi koya ena viri bai o Esa na luve i Jesua, o koya sa liutaka na vanua o Misipa. A sa viria na tolo ni bai sa taudonuya na i cabecabe ki na vale ni yaragi me yaco yani ki na i takelo ni bai.

²⁰ E taravi koya o Paruki na luve i Sapai. A sa tekivu viri bai mai na i takelo ni bai ka yaco ki na katuba ni vale nei Ilaiasipi na bete levu.

²¹ E taravi koya o Meremoce na luve i Uraia ka makubui Akosi. A sa tomana yani na viri bai me la'ki yaco ki na mua ni vale e muri nei Ilaiasipi.

²² E taravi koya na nodra cakacaka ni viri bai na bete: O ira na bete mai na veiyasana e Jerusalemi sa viria na tikina e tarava:

²³ O Penijamini kei Esupi erau sa viria na tikina e tarava, a sa donumaka ga na nodrau vale. E taravi koya o Asaraia na luve i Maseia ka makubui Ananaia, ka sa viria na tikina e tarava sa donumaka ga na nona vale.

²⁴ E tarava yani o Pinui na luve i Enatati, ka viria na tikina e tarava me tekivu mai na vale i Asaraia me yaco ki na i takelo ni bai.

²⁵ O Palali na luve i Usei e tarava, ka viri bai me tekivu mai na i takelo ni bai, ka sa donumaka oqo na vale cere-i-cake e tu veidonui kei na valenitui, ka sa toka ravita na nodra lomanibai na dauyadra.

²⁶ E taravi koya o Pitaia na luve i Parosi kei ira na dauqarava na vale ni Kalou era vakaitikotiko ena dela i Ofeli. Era a viria na tikina e tarava, me yaco oqo ki na dua na tikina ena tokalau sa toka volekata na Matamata ni Wai kei na vale cere-i-cake sa yadrava na Valenisoro.

²⁷ E taravi koya o ira na kai Tikoa, ai karua ni tikina era sa qarava, me tekivu mai na dua na tikina sa veibasai kei na vale cere-i-cake sa yadrava na Valenisoro me la'ki yacova na bai mai Ofeli.

²⁸ Era sa viria na tikina e tarava eso na bete, me tekivu mai na Matamata ni Ose ka gole yani vaka ki na vualiku, ka ra dui cakacaka ga ena mata ni nodra dui veivale.

²⁹ A taravi ira o Setoki na luve i Ima ka viri bai taudonuya ga na nona vale. A sa qarava na cakacaka ni viri bai ena tikina e tarava o Semaia na luve i Sekonaia, na i vakatawa ni Matamata ena Tokalau.

³⁰ E taravi koya na nodrau viri bai o Ananaia na luve i Silimaia kei Anuni na i kaono ni luve i Salafi tagane. E taravi rau oqo o Mesulame na luve i Berekaia ka vakavoutaki bai taudonuya ga na nona i tikotiko.

³¹ E tarava oqo na viri bai nei Malikaia, e dua vei ira na daucaka i yaya koula. A vakavinakataki bai o koya me yaco yani ki na nodra vale na dau qarava na Valenisoro kei na nodra vale na dauveivoli, me taudonuya na Matamata o Mifikati ka yaco yani ki na tutu ni bai ka toka kina na rumu e cake.

³² Mai na tutu ni bai oqo me yaco tale ki na Matamata ni Sipi, era a viri bai kina o ira na daucaka i yaya koula kei ira na dauveivoli.