Neumi 3 - Ai Vola Tabu Ena Vakavakadewa Vou

Sa Rusa o Ninive

¹ Sa rusa na koro lasulasu dauvakadave dra, Sa sinai ena i yau me kovei tani yani!

² Rogoca! Na cacarubirubi ni kuita, Na rorogo ni yava ni qiqi, Na rorogo ni yava ni ose, Na tavaladelade ni qiqinivalu!

³ Era sa kaba na mataivalu vodo ose, Na i seleiwau tatalivaliva, na moto tatatibitibi! Sa veitaqataqai cake na mate, Sa sega ni wiliki rawa na yagodra — Era sa tarabe kina na tamata!

⁴ O Ninive na yalewa dautagane sa cudruvi. A dau veisiwati ka sinai sara ena ka ni veitemaki, A sa dau ia na cakacaka ni daurairai Ka vakabobulataki ira kina na veimatanitu.

⁵ A kaya ko Jiova ni lewevuqa, “I Ninive, au na cudruvi iko! Au na cakava mo luvawale Me ra raici iko kina na veimatanitu, Ka sarava na nomu madua.

⁶ Au na vakalolovirataki iko Ka'u na ubi iko ena benu vakasisila. Era na vakaraici iko ena domobula na tamata.

⁷ O ira kece sa raici iko era na kidroa. Era na kaya, ‘Sa rusa o Ninive! O cei beka ena lomani koya? O cei beka ena bau via vakacegui koya?’ ”

⁸ I Ninive, o sa uasivi cake li mai na koro o Tepisi na koro turaga kei Ijipita? O koya talega e tiko na nona uciwai me taqomaki koya me vaka na bainivalu — ni sa kena bai ga na uciwai na Naile.

⁹ A sa liutaki Eciopea kei Ijipita o koya, ka sa sega na i yalayala ni nona kaukauwa; a sa nona i to tale o ira na kai Libiya.

¹⁰ Ia o ira na kai Tepisi era a qai kau vakabobula. Era a vakamatei na luvedra lalai ena veitutu ni sala. Era a vesuki ena sinucodo o ira na nodra qase ka ra sa wasewasei ena kedra maliwa na tamata era vesuki ira mai.

¹¹ I Ninive, o iko talega o na vakamatenitaki ka vunitaki! O iko talega o na vakasaqara e dua na i vakaruru mai vei ira na kemu meca.

¹² Era na vaka na vunilolo sa dreu na vuana na nomu koronivalu kecega: ni kevaka sa kureitaki, era na lulutu sara mai na vuana ki na gusumuni!

¹³ Raica, o ira na nomu sotia era sa vaka na yalewa ka sa tadola levu tu na matamata ni nomuni vanua vei ira na kemuni meca. Ena vakacacani ena bukawaqa na bai kaukamea ni nomuni matamata.

¹⁴ Ni la'ki taki wai rawa mai ena vakavakarau ni kena buku na druadrua ka vakadeitaka na nomuni bainivalu! Ni buturaka na qele dregadregata me buli kina na biriki ka vakarautaka rawa na lovo ni biriki!

¹⁵ E veitalia sara na ka o na cakava, o na kama mate ga ena bukawaqa se mate ena buca ni valu. O na vakawabokotaki me vaka kakana sa laukana mai na vodre. O sa lewe vuqa sara me vaka na vodre!

¹⁶ O sa vakalewevuqataki ira na nomu dauveivoli ka lailai tale na i wiliwili ni kalokalo mai lomalagi! Ia oqo, o sa yali sara yani, me vaka na vodre sa dodoka na tabana ka vuka tani yani.

¹⁷ O ira na nomu vakailesilesi era sa vaka na i binibini vodre sa kabita tu na lalaga ena siga liliwa. Ia ni sa basika cake mai na matanisiga, era sa qai vuka yani ka sa sega ni dua e kila na vanua era sa lako kina!

¹⁸ Vei iko na tui Asiria, era sa mate kece na nomu vakailesilesi vakamatanitu, era sa moce vakadua talega na nomu tamata dokai ka rogo! Era sa veiseyaki o ira na nomu tamata ki na veiulunivanua ka sa sega e dua me la'ki kauti ira lesu tale mai.

¹⁹ Sa sega sara na i wali ni nomu rarawa ka sa sega ni mavo rawa na nomu mavoa. Era sa vakasausau ga ena marau o ira kecega era sa rogoca na i tukutuku ni nomu vakacacani. O cei li e sa bau dro bula mai na nomu dau veivakatotogani sa sega ni mudu rawa?