Neumi 1 - Ai Vola Tabu Ena Vakavakadewa Vou

¹ Oqo na i vola ni raivotu i Neumi na kai Elikoso me baleta na leqa bibi sa vakarau yacovi Ninive tiko.

Na Cudru ni Kalou

² Sa cata na Kalou ko Jiova me dua e qati koya; Sa totogitaki ira era sa saqati koya, Ka sauma lesu vei ira na nodra ca ena nona cudru.

³ Sa dau berabera ni cudru ko Jiova, Ia sa ka levu sara na nona kaukauwa Ka sa sega ni vakalaiva na tamata ca me galala mai na nona cudru. Na sala i Jiova sa tiko ena covulaca kei na cava, Na veio sai koya na kuvu ni soso ni yavana!

⁴ Sa vakarota na wasawasa ka sa di caracara! Sa cakava me mamaca na veiuciwai kecega. Na veibuca mai Pasani era sa raqosa, Sa bobota sara o Ulu i Kameli, Ka sa seavu na roka ni veisenikau ni Lepanoni.

⁵ Era sakure na veiulunivanua ena vuku i Jiova, Ka waicala na veidelana e matana. Sa uneune na vanua ni sa basika ko Jiova; Sa sautaninini ga o vuravura kei ira kece sa tiko kina.

⁶ O cei ena bula rawa ni sa cudru ko Jiova? O cei ena dro bula mai na nona cudru waqawaqa? Sa sovaraka yani o koya na nona cudru katakata; Sa kakavuruvuru ga e matana na veivatu.

⁷ Sa vinaka ko Jiova; Sa karoni ira na nona tamata ena gauna ni leqa; Ka sa vakarurugi ira sa vakararavi vua.

⁸ Sa vaka na coka ni dobui na nona vakarusai ira kece na kena meca; Sa vaqeyavutaki ira sa saqati koya.

⁹ Na vere cava dou sa bulia me coko kina ko Jiova? Ena vakarusai kemudou ga o koya. Sa sega ni dua ena rawa ni saqati koya vakarua.

¹⁰ Me vaka na veitaba ni soni sa vakatavivigi kei na co mamaca, O ni na vakamai me vakakina oi kemudou na daumateni!

¹¹ E a sega li ni cavutu mai vei iko Ninive e dua na tamata, ka sinai tu ena i naki ca ka via veretaki kina ko Jiova.

¹² Sa kaya vakaoqo ko Jiova vei ira na nona tamata na Isireli: “Sa dina era sa kaukauwa sara ka ra lewe vuqa na kai Asiria, ia era na moku kecega ka vakarusai. Kemuni na noqu tamata, E dina ni'u sa vakararawataki kemuni tiko, ia au na sega ni vakararawataki kemuni tale.

¹³ Ia oqo, au sa na muduka laivi na kaukauwa i Asiria vei kemuni, ka'u na sereki kemuni mai na nomuni tu vakabobula.”

¹⁴ Sa i koya oqo na lewa i Jiova ka tauca me baleti ira na kai Asiria: “Ena sega sara ni tubu tale e dua na nomuni kawa; Au sa na tamusuka laivi mai na nomuni bure kalou, na matakau ceuceu, kei na matakau buli. Ka'u na kelia na kemuni i bulubulu, ni o ni sa rui vakasisila.”

¹⁵ Raica, sa lako mai na i talai ka sa siro tiko mai na ulunivanua me mai kacivaka na qaqa! Kemuni na Juta, ni vakayacora na nomuni veisolevu tabu ka cabora vua. Era na sega tale vakadua ni kaba na nomuni vanua na tamata ca. Era sa vaqeyavutaki oti vakadua sara!