NA SAME 84 - Ai Vola Tabu Ena Vakavakadewa Vou

Na Talei ni Qaravi Kalou e Nona vale tabu

Vua na i liuliu ni sere; me vaka Na Kitica. A nodra Same na luve i Kora.

¹ Au sa gadreva na nomuni vale tabu, Jiova ni lewevuqa! Au sa gadreva dina me'u tiko kina!

² Sa guta vakalevu sara na yaloqu na tiko kina! Io, na tiko ena lomanibai ni vale tabu i Jiova. Na noqu bula taucoko sa sere voli ga ena reki vua na Kalou bula.

³ O ira sara mada ga na siparo era cakava e dua na nodra sova, Ka dui tu na nodra vale na kakabace; Era sa maroroya na luvedra volekata na nomuni cabocabonisoro, I Jiova ni lewevuqa, na noqu Tui ka noqu Kalou.

⁴ Sa kalougata o ira era tiko ena nomuni vale tabu, Era sa dau laga sere tikoga ena vakacaucautaki kemuni.

⁵ Sa kalougata o ira o ni sa vu ni nodra kaukauwa, O ira era sa gadreva me ra lako ki na ulunivanua o Saioni.

⁶ Ia ni ra lakova na buca mamaca o Baka, Sa mani yaco kina me vanua e levu kina na mataniwai, Ka sa vakatawana na veimataniwai na uca taumada.

⁷ Sa toso cake ga na nodra kaukauwa ni ra lako voli, Ka ra na raica na Kalou ni veikalou mai Saioni.

⁸ Ni rogoca na noqu masu, i Jiova ni lewevuqa; Ni vakarorogo mada na Kalou i Jekope!

⁹ Kemuni na Kalou, ni vakalougatataka na neimami tui, Na tui o ni a digitaka!

¹⁰ Sa vinaka cake na noda tiko siga dua ena nomuni Valenisoro Mai na noda tiko siga dua na udolu ena duatani tale na vanua. E vinaka cake me'u tiko ena matamata ni vale ni Kalou Mai na tiko ena nodra vale na tamata ca.

¹¹ Sa dau taqomaki keda ko Jiova na Tui dokai, Ka sa vakalougatataki keda ena vinaka kei na lagilagi. Sa sega ni bureitaka e dua na ka, Vei ira era sa cakava na ka e dodonu.

¹² I Jiova ni lewevuqa, Sa kalougata ga na tamata era sa vakararavi vei kemuni.