NA SAME 83 - Ai Vola Tabu Ena Vakavakadewa Vou

A Masu ni Kere Veivuke ena Nodra Vakadrukai na Meca i Isireli

A Sere. A Same i Esava.

¹ Kemuni na Kalou, mo ni kakua ni tiko lo; Ni kakua ni vakanomodi se tu vakadua!

² Raica, era sa maue na nomuni meca, Ka ra sa veisaqasaqa mai o ira era sa cati kemuni.

³ Era sa tuva eso na vere vuni me ravuti ira na nomuni tamata; Ka bosea na ka me vakaleqai kina o ira o ni sa taqomaka.

⁴ Era sa tukuna, “Mai, me da mai vakawabokotaka na nodra matanitu, Me kakua kina ni nanumi vakadua tale o Isireli.”

⁵ Era sa lomavata ena ka era sa bosea; Ka ra duavata me ra saqati kemuni:

⁶ Oqo o ira na kai Itomi kei ira na luve i Isimeli; Na kai Moapi kei ira na luve i Akiri;

⁷ Na tamata mai Kipali, kei Amoni, kei Amaleki; O ira na kai Filisitia kei Taia.

⁸ Sa cokovata talega kei ira o Asiria Me vakaukauwataki ira na kai Amoni kei Moapi, ka ra kawa kece i Loti.

⁹ Mo ni vakayacora vei ira na ka o ni a kitaka vei ira na kai Mitiani, Me vaka o ni a kitaka vei Sisera kei Japini mai na uciwai o Kisoni.

¹⁰ Era a vakarusai mai Edoa, Ka sa vuca na yagodra e dela ni qele.

¹¹ Mo ni vakayacora ga vei ira na nodra i liuliu na veika o ni a vakayacora vei rau o Orepi kei Siepi; Me vakarusai kece na nodra i liuliu me vakataki Sepa kei Salimuna,

¹² o iratou ka kaya, “Tou na taura me nodatou Na vanua sa vakarautaki me nona na Kalou.”

¹³ Kemuni na Kalou, ni ceburaki ira me vaka na kuvu, Me vaka na vu ni sila mamaca sa kauta yani na cagi.

¹⁴ Me vaka na bukawaqa sa vakama na veikau, Me vaka na yameyame ni buka sa vakacaudreva na veiulunivanua,

¹⁵ mo ni cemuri ira laivi ena nomuni cava kaukauwa Ka vakarerei ira ena nomuni cagi rerevaki.

¹⁶ I Jiova, mo ni tabonaka na matadra ena madua, Ka vakavuna me ra liaca na nomuni kaukauwa.

¹⁷ Me ra vakadrukai ka loma taqaya me tawamudu; Ka me ra mate ena dela ni madua levu.

¹⁸ Ia me ra kila ni yacamuni ko Jiova, O koya na ledua sa Cecere Sara e vuravura taucoko.