NA SAME 76 - Ai Vola Tabu Ena Vakavakadewa Vou

Na Kalou i Isireli - O koya sa Qaqa ka Lewa

Vua na i liuliu: kei na i yaya ni vakatagi vaka-wa. A Same i Esava. A Sere.

¹ Sa kilai vinaka tu e Juta na Kalou; Sa rokovi ga na yacana e Isireli.

² Sa tiko na nona i tikotiko e Jerusalemi Sa tiko mai na ulunivanua o Saioni.

³ Sa musulaka mai kea o koya na nodra gasau ni dakaititi na meca, Na nodra i sasabai, nodra i seleiwau kei na nodra i yaragi kecega.

⁴ O ni sa lagilagi dina na Kalou, O ni sa lagilagi ni o ni sa lesu mai ena veiulunivanua. O ni vakadrukai ira kina na kemuni meca.

⁵ Sa kau tani na nodra i tokinivalu na nodra sotia qaqa Ka ra sa davo matemate tu; Sa sega tale ni dua e vo me vakayagataka na nodra i yaragi.

⁶ Ni o ni sa vosa vei ira na Kalou i Jekope Era sa bale mate na nodra ose kei ira era vodoka.

⁷ Ia, o ni sa rokovi ga ka rerevaki, oi kemuni Jiova. O cei ena tu rawa e matamuni ni o ni sa cudru?

⁸ O ni sa cakava me kilai na nomuni lewa mai lomalagi; Sa taqaya o vuravura ka tu vakadua ena vakadirorogo,

⁹ Ena nomuni sa duri cake mo ni vakatauca na nomuni lewa, Me ra vakabulai kina o ira kece sa vakararawataki e vuravura.

¹⁰ Na cudru ni tamata sa vakavuna ga mo ni dokai vakalevu; O ira era bula ena i valu era dauqarava na nomuni solevu.

¹¹ Ni solia vua na Kalou na ka o ni sa yalataka vua Ni kauta mai vua na nomuni ka ni loloma, na matanitu voleka. Sa vakavuna na Kalou me ra rerevaki koya na tamata kecega.

¹² Sa vakamalumutaki ira na ravouvou dokadoka o koya, Ka vakarerei ira na tui kei vuravura.