NA SAME 74 - Ai Vola Tabu Ena Vakavakadewa Vou

A Masu ni Kere Veivuke ni Vakamadualaki na Matanitu

A Masikili i Esava.

¹ Kemuni na Kalou, a cava o ni sa biuti keimami kina vakaoqo? O ni na cudruvi ira tikoga li na nomuni tamata ka sega ni mudu?

² Ni nanumi ira mada na nomuni tamata, O ira o ni a digitaka me ra nomuni ena gauna makawa sara, Io, na kawa tamata o ni a vakabula me nomuni yavusa digitaki. Ni nanuma na Ulunivanua o Saioni, na vanua o ni a dautiko kina.

³ Ni vakalakova mada na veika kece sa rusa tu oqo; Era sa vakacacana na neimami meca na ka kecega ena Valenisoro!

⁴ Era sa kaila ga ena qaqa na kemuni meca ena nomuni vale tabu; Ka ra sa vakaduria kina na nodra drotini me dusia na nodra sa qaqa.

⁵ Era sa vaka na i rairai ni tamata daumusu kau Era sa musumusulaka sobu na veikau ena nodra i matau.

⁶ Era sa musulaka na kau kece sa ceuti Ena nodra matau kei na i tukituki.

⁷ Era sa vakacacana na nomuni Valenisoro ka vakama ena buka; Ka ra sa vakadukadukalitaka sara na vanua o ni dau qaravi kina.

⁸ Era sa vinakata talega me ra vakarusai keimami vakadua; Era sa vakama kece na veivanua tabu ena vanua oqo.

⁹ Sa yali kece na neimami vakatakarakara tabu; Sa sega tale ni qai vo e dua na parofita, Ka sa sega ni bau dua e kila se cava na dede ni veika oqo.

¹⁰ Ena vakacava soti na kena dede, kemuni na Kalou, era na vakalialiai keimami tikoga kina na neimami meca? Era na vakacacana tikoga li na yacamuni me tawa mudu?

¹¹ Na cava o ni bese tiko kina ni vukei keimami? Na cava o ni biuta tiko kina na ligamuni ki na dakumuni?

¹² Ia o ni sa neimami tui na Kalou mai na i vakatekivu, O ni sa qaqa vakavuqa e vuravura.

¹³ O ni sa wasea rua na wasawasa ena nomuni kaukauwa levu Ka vorolaka na uludra na drakoni e loma ni wasa.

¹⁴ O ni sa vorolaka na ulu i Livaiacani, Ka solia na yagona me kedra era sa tiko ena vanua dravuisiga.

¹⁵ O ni sa cakava na mataniwai kei na tobu wai; Ka vakamacara na veiuciwai lelevu.

¹⁶ Sa nomuni na siga, ka sa nomuni talega na bogi; O ni sa vakatikora na siga kei na vula ena kedrau dui i tutu;

¹⁷ O ni sa yalana na i yalayala kei vuravura. Ka o ni sa lesia na vula i katakata kei na vula i batabata.

¹⁸ Ia, mo ni nanuma ga, i Jiova, Ni ra sa dau veiwalitaki kemuni o ira na nomuni meca; Era sa tamata tawa vakabauta ga ka beca na yacamuni.

¹⁹ Ni kakua ni biuti ira tu na nomuni tamata malumalumu vei ira na kedra meca i tovo kaukauwa; Ni kua ni guilecavi ira na nomuni tamata era sa vakararawataki.

²⁰ Ni nanuma na veiyalayalati o ni sa cakava kei keimami. Sa tu na i tovo kaukauwa ena veiyasana butobuto ni vanua oqo.

²¹ Ni kakua ni laivi ira era vakararawataki me ra vakadrukai, Ni laivi ira ga na dravudravua ka vakaloloma me ra vakacaucautaki kemuni.

²² Mo ni tucake na Kalou, ka taqomaka na nomuni dodonu! Mo ni dau nanuma ni ra sa ia ga na veiwalitaki kemuni na tamata lecaika ena veisiga yadua.

²³ Ni kua ni guilecava na nodra kaila ni vakacudrucudru na kemuni meca, Na rorogo sa sega ni mudu rawa mai vei ira era saqati kemuni.