NA SAME 7 - Ai Vola Tabu Ena Vakavakadewa Vou

Kere Bula mai vei Ira na Dauveivakacacani

A sere sa lagata o Tevita vei Jiova me baleti Kusa na kawa i Penijamini.

¹ I Jiova na noqu Kalou, au sa lako mai vei kemuni oqo me'u taqomaki; Ni vueti au ka vakabulai au mai vei ira kecega sa vakacemuri au.

² De ra na colati au yani me vaka e dua na laione, Ki na dua na vanua sa sega na tamata me vakabulai au rawa kina; Ka ra qai dresulaki au vakamatailalai mai kea.

³ I Jiova na noqu Kalou, ke'u sa vakayacora oqo, Kevaka sa tiko ena ligaqu na ca:

⁴ Ke'u sa sauma ga na ca vua na noqu i tokani, Se i tovo kaukauwa vua na noqu meca ka sa segai na vuna;

⁵ Me ra qai vakasavi au na noqu meca ka ra vesuki au, Me ra qai laivi au me'u davo matemate koto ena dela ni qele.

⁶ Me toro cake na nomuni cudru Jiova, Ka saqata na nodra cudru na noqu meca. Ni yadra mai ka vukei au, Baleta ni o ni sa dau vinakata na dodonu.

⁷ Ni kauti ira vata mai na tamata, Era tu wavokiti kemuni ka mo ni vakatulewa tiko vei ira mai cake.

⁸ Jiova sai kemuni na nodra turaganilewa na tamata kecega; Ni tauca na nomuni lewa vei au, Me vakatau ga ki na noqu i vakarau ni'u sa yalododonu ka vinaka.

⁹ Ni tarova na nodra i valavala ca na tamata ca, Ka'u kerei kemuni mo ni saumi ira na yalododonu. Sa i kemuni na Kalou yalosavasava, O ni sa dau vakatovolea na vakasama kei na yalo.

¹⁰ Sa noqu dauveitaqomaki na Kalou, Sa dau vakabulai ira era talairawarawa vua.

¹¹ Sa turaganilewa dodonu na Kalou, Ka sa dau cudruvi ira tikoga na tamata i valavala ca.

¹² Kevaka era sega ni veivutuni na tamata, Ena vagata sara na nona vosa na Kalou. Sa loveca na nona dakaititi ka vakarau tu;

¹³ Sa taura cake na nona i yaragi ni veivakamatei Ka vakadodonutaka na nona gasau ni dakaititi sa waqa tu.

¹⁴ Raica mada na i tovo ni nona vakasamataka na ka ca na tamata i valavala ca; Sa bukiveretaka na lewa, Ka vakayacora na veivakacalai.

¹⁵ Sa kelia e dua na qara titobu ki na qele Ia sa qai lutu talega ki na nona qara!

¹⁶ Ia sa totogitaki koya ga na nona ca Ka sa vakaleqai koya ga na nona i tovo kaukauwa.

¹⁷ Au na vakavinavinakataki Jiova ena vuku ni nona lewa dodonu, Ka'u na lagata na veisere ni veivakacaucautaki vei Jiova na Kalou cecere.