NA SAME 69 - Ai Vola Tabu Ena Vakavakadewa Vou

A Tagi ni Kere Veivuke

Vua na i liuliu ni sere: me vaka na i lagalaga ni “Viavia.” A nei Tevita.

¹ Ni vakabulai au na Kalou! Sa yaco sara ga na wai ki domoqu;

² Au sa lutu dromu ena vanua lolobo, Ka sa sega na vanua me'u tu rawa kina. Au sa yaco ki na vanua titobu Ka ra sa vakarau dromuci au na ua.

³ Au sa oca mai ena tagica na veivuke, Ka sa mosi mai na noqu i tilotilo, Sa malumalumu mai na kaukauwa ni mataqu, Ena vakaraica tiko na nomuni veivuke.

⁴ O ira era sa cati au wale ga ka sega na vuna Era sa lewe vuqa cake ka lailai na drau ni uluqu; Era sa tamata qaqa na via vakarusai au, O ira era sa ravuti au ena lasu. Era sa vakasuka tale na veika au a sega ni butakoca.

⁵ Kemuni na Kalou, Sa sega ni vunitaki vei kemuni na noqu i valavala ca; O ni sa kila deivaki na noqu lecaika!

⁶ Ni kakua ni laivi au me'u vakavuna na nodra madua na tamata era sa vakadinati kemuni, Na Turaga ko Jiova ni lewevuqa! Ni kakua ni laivi au me'u vakavuna na nodra madua na tamata era sa dau sokalou vei kemuni, Oi kemuni na Kalou ni Isireli!

⁷ Ena vukumuni ga au sa vakacacani kina Ka sa luvuci kina ena madua.

⁸ Au sa vaka na vulagi vei ira na taciqu, Ka vaka e dua na kai tani mai na noqu vuvale.

⁹ Sa kama voli ga e lomaqu me vaka na bukawaqa na noqu gagadre kaukauwa ena vuku ni nomuni vale tabu; Ka sa tau vei au na nodra vosa ca o ira sa vakacacani kemuni.

¹⁰ Au sa vakayalomalumalumutaki au ena lolo; Ka ra sa vakacacani au na tamata.

¹¹ Au sa vakaisulutaki au ena i sulu ni vakaloloku, Ka ra sa vakalialiai au.

¹² Era sa veivosakitaki au ena veigaunisala, Ka ra bulia na kequ sere na daumateni.

¹³ Ia oi au, au na masu ga vei kemuni Jiova, Ni rogo mai, na Kalou, ena gauna ga o ni digitaka. Ni rogoci au mai ena vuku ni nomuni loloma tudei, Ni o ni sa yalodina ki na nomuni i yalayala mo ni veivakabulai.

¹⁴ Ni vakabulai au mai na noqu lutu dromu ki na vanua lolobo; Ni taqomaki au mai vei ira na kequ meca kei na wai titobu.

¹⁵ Ni kakua ni laiva na waluvu me luvuci au; Ni kakua ni laivi au me'u lutu dromu ena wai titobu, Se me sogolati au ena loma ni bulubulu.

¹⁶ Ni sauma mai na noqu masu, i Jiova, ni sa rui uasivi ga na nomuni loloma tudei; Ni golevi au mai me vaka na levu ni nomuni yaloveivosoti.

¹⁷ Ni kakua ni vunitaki kemuni mai vei au na nomuni dauveiqaravi; Sa tarai au na leqa levu — mo ni rogoci au totolo mada mai!

¹⁸ Ni lako mai vei au ka mai vakabulai au; Ni sereki au mai vei ira na kequ meca.

¹⁹ O ni sa kila na noqu vakacacani, Na noqu vakamaduataki ka beci; O ni sa raici ira kecega na kequ meca.

²⁰ Sa voroka na yaloqu na veivakacacani, Ka'u sa malumalumu sara kina Au a nuitaka me'u bau lomani, ia sa qai sega ni vakakina; Au a vaqara na vakacegu, ia au sa sega ga ni kunea.

²¹ Ni'u a viakana, era a qai solia vei au na ka gaga; Ni'u a viagunu, era a qai solia vei au na wai wiwi.

²² Me qai yaco me vu ni nodra rusa na nodra kana magiti, Kei na nodra solevu me vu ni nodra bale.

²³ Ni vakamatabokotaki ira me ra kua ni rai rawa! Ni cakava na dakuna me malumalumu tikoga!

²⁴ Ni sovaraka vei ira na nomuni cudru; Ka me qai vakatauci vei ira na nomuni cudru waqawaqa.

²⁵ Me biu lala tu mai na nodra keba; Ka me sega ni dua me vo bula ena nodra valelaca!

²⁶ Era sa vakararawataki na tamata o ni sa totogitaka; Ka veivosakitaka na nodra rarawa o ira o ni sa vakamavoataka.

²⁷ Ni maroroya na i tukutuku kece ni nodra i valavala ca; Kakua ni vakatara me ra vakaivotavota ena nomuni veivakabulai.

²⁸ Me bokoci laivi na yacadra mai na i Vola ni Bula, Ka me ra kakua ni volai ena kedra i vola na nomuni tamata.

²⁹ Ia oi au, au sa vakaloloma ka levu na noqu mosi; Ni vueti au cake, oi kemuni na Kalou, ka vakabulai au!

³⁰ Au na vakacaucautaka ga na Kalou ena sere; Ka'u na tusanaka na nona cecere ena noqu vakavinavinaka vua.

³¹ Oqo ena vakalomavinakataki Jiova vakalevu cake Ka lailai na kena vakacabori e dua na bulumakau ki vua, Se na kena cabori vua e dua na bulumakau levu ka taucoko.

³² Ni ra sa raica o ira na vakaloloma na ka oqo, era na marau; Era na vakayaloqaqataki o ira na dau cuva vua na Kalou.

³³ Sa dau rogoci ira sa vakaleqai ka gagadre voli ko Jiova, Ka sega ni guilecavi ira na nona tamata era sa tiko vakavesu.

³⁴ Me vakacaucautaka na Kalou o lomalagi kei na vuravura, Na wasawasa kei na veika bula kecega sa tu kina.

³⁵ Ni na vakabulai Saioni na Kalou, Ka tara cake tale na veikoro e Juta; Era na tiko kina na nona tamata ka taukena na vanua.

³⁶ O ira na nona kawa na nona dauveiqaravi era na taukena, Ka ra na vakaitikotiko e kea o ira era sa lomani koya.