NA SAME 65 - Ai Vola Tabu Ena Vakavakadewa Vou

Na Vakacaucau kei na Vakavinavinaka

Vua na i liuliu ni sere. A Same i Tevita. A Sere.

¹ Kemuni na Kalou, sa dodonu ga mo ni vakacaucautaki mai Saioni, Ka me keimami maroroya na neimami yalayala vei kemuni,

² Baleta ni o ni sa dau sauma na masu. Era na lako mai vei kemuni na tamata ni veivanua kecega

³ ena vuku ni nodra i valavala ca. Sa vakadrukai keimami na neimami i tovo ca, Ia, o ni sa vosoti keimami ga.

⁴ Era sa kalougata na tamata o ni sa digitaka O ira sa kau vakavoleka mai me ra tiko ena nomuni vale tabu.

⁵ O ni sa dau sauma na neimami masu mai na nomuni dausolia na qaqa ena i valu, Ka dau vakayaco-ka me keimami vakabulai kina. Na tamata ena dela i vuravura taucoko Kei ira mai na wasawasa vakayawa era vakadinati kemuni.

⁶ O ni sa vakatikora donu na veiulunivanua ena nomuni kaukauwa, Me vakaraitaka na nomuni kaukauwa levu.

⁷ O ni sa vakamaravutaka na seuseua ni wasawasa Kei na rorogo ni vadugu ni veibiau; O ni sa vakamaravutaka talega na nodra maue na tamata.

⁸ Sa tucake ena qoroqoro o vuravura taucoko, Baleta na veika lelevu o ni sa vakayacora. Sa vakavuna na kaila ni marau na nomuni cakacaka, Mai na dua na yasa i vuravura me yaco ki na yasana kadua.

⁹ O ni sa vakaraitaka na nomuni kauwaitaki vuravura Ena nomuni vakatauca na uca; O ni sa vakavutuniyautaka na qele ka vakabulabulataka. O ni sa tawana na veiuciwai lalai ena wai; Ka vakarautaka na vuata e vuravura. Sa vaka oqo na veika o ni sa cakava:

¹⁰ O ni sa vakatauca vakalevu na uca ena veivanua sa siviyara tu, Ka vakasuasuataka ena wai; O ni sa vurulaka na qele ena uca mirimiri Ka vakavuna me ra tubu cake na i tei.

¹¹ Sa vua ni qele vinaka dina na veika e vakarautaka na nomuni yalovinaka! E basika na sautu ena vanua kecega o ni lako kina.

¹² Sa vakasinaita na vanua veico na qele ni manumanu; Sa sinai ena reki na veiyasa ni ulunivanua.

¹³ Sa robota na veivanua lala na sipi, Ka sa sinai na veibuca ena witi; Era sa kaila ga ka sere ena reki na ka kecega.