NA SAME 55 - Ai Vola Tabu Ena Vakavakadewa Vou

A Masu ni Tamata sa Veidabuitaki mai Vua na Nona i Tokani

Vua na i liuliu ni sere; kei na i yaya ni vakatagi vaka-wa. A Masikili i Tevita.

¹ Ni rogoca na noqu masu na Kalou; Ni kakua ni gole tani mai na noqu kerekere!

² Ni rogoci au ka sauma mai na noqu masu; Au sa vakaleqai mai na noqu lomaocaoca.

³ Sa yavalati au na nodra vosa na kequ meca, ka'u sa rere, Ka sa vakararawataki au na nodra sasaga na tamata ca. Era kauta mai vei au na leqa; Era sa cudruvi au ka cati au vakaukauwa.

⁴ Sa tuburi au ga na rere, Ka sa bikai au na rerevaka na mate.

⁵ Sa vesuki au vakaukauwa na rere kei na sautaninini; Ka sa luvuci au na domobula.

⁶ Au sa kaya, “Au diva mada ga me'u vakatabana vaka na ruve! Au na vuka tani sara kina ka kune vakacegu.

⁷ Au na vuka vakayawa sara yani, Ka cakava na noqu i tikotiko ena vanua dravuisiga.

⁸ Au na qai vakatotolo yani ki na noqu i vakaruru Me taqomaki au mai na cagi kaukauwa kei na cava.”

⁹ Turaga, ni vakarusai ira ka vakasesea na nodra vosa; Ni'u sa kunea na i valavala kaukauwa kei na veivala ena koro.

¹⁰ Era sa lako wavokita na dela ni bainikoro ena siga kei na bogi; Ka sa sinai kina na i tovo ca kei na leqa.

¹¹ Sa tu na veivakarusai ena veiyasana kecega, Ka sinai na veitolo ni sala ena veivakasaurarataki kei na cakacaka vakatawadodonu ni butako.

¹² Kevaka me a vakalialia au e dua na meca, Ena rawa vei au me'u vosota voli; Kevaka me a dua ka cati au sa vakalevulevui koya vei au, Ena rawa vei au me'u vunitaki au mai vua.

¹³ Ia, sai iko ga oqo, na noqu i tokani, Na noqu lewenisala kei na noqu i tau voleka sara.

¹⁴ E daru sa dau veivosaki vakavinaka sara, Ka daru dau sokalou vata ena Vale ni Kalou.

¹⁵ Me ra qai mate na kequ meca ni bera ni cava nodra gauna; Me ra lako bula sobu bulabula ki na nodra vuravura na mate! Sa tiko ga na ca ena nodra vale kei na vu ni yalodra.

¹⁶ Ia, ka'u sa masu ga vei Jiova na Kalou me veivuke mai, Ka sa na vakabulai au o koya.

¹⁷ Sa lako cake vua na Turaga na noqu kudru kei na tagi Io, ena mataka kei na sigalevu ka vakakina ena bogi, Ka sa na rogoca o koya na voqa ni domoqu.

¹⁸ Ena kauti au lesu bula mai o koya Mai na i valu kece sara au sa vala kina, Ni ra sa lewe levu na kequ meca.

¹⁹ Na Kalou, o koya sa lewa tiko mai na i vakatekivu, Ena rogoci au ka vakadrukai ira; Ni ra sa besetaka ga me ra veisau, Ka ra sa sega ni rerevaki koya.

²⁰ Sa veivala kei ira na nona i lawalawa o noqu i tokani makawa; Ka sa voroka na nona vosa ni yalayala.

²¹ Sa yagoyago vinaka cake mai na bata na nona vosa, Ia, sa tiko ga e lomana na yalo ca ni veicacati; Sa yagoyago vinaka me vaka na waiwai na nona vosa, Ia, era sa veivakamavoataki me vaka na i seleiwau gata.

²² Mo laiva ga na nomu leqa vei Jiova, Ena vukei iko o koya; Sa sega ni dau laivi ira na daucakacaka vakadodonu o koya me ra vakadrukai.

²³ Ia, oi kemuni na Kalou, o ni na viritaki ira sobu na daulaba kei na tamata lasulasu ki na nodra i bulubulu Ni se bera ni oti na veimama ni nodra bula; Ia oi au, au na vakadinati kemuni tikoga.