NA SAME 51 - Ai Vola Tabu Ena Vakavakadewa Vou

A Masu ni Veivosoti kei na Veivakasavasavataki

Vua na i liuliu ni sere. A Same i Tevita, ni sa lako mai vua o Necani na parofita, ni sa cala vata kei Vaciseva.

¹ Ni yaloveivosoti vei au, na Kalou, me vaka na nomuni loloma tudei. Ni bokoca laivi na noqu i valavala ca me vaka na levu ni nomuni yalololoma.

² Ni savai au mai na noqu i tovo vakasisila, Ka vakasavasavataki au mai na noqu i valavala ca.

³ Au sa raica rawa na noqu caka cala, Ka sa tu ga e mataqu na noqu i valavala ca.

⁴ Au sai valavala ca vei kemuni, vei kemuni taudua ga, Ka vakayacora na veika e cala vei kemuni. Sa i koya o ni sa dodonu kina mo ni veilewaitaki au; Ka dodonu talega na nomuni lewa.

⁵ Raica, au a sucu vata ga mai kei na i valavala ca, A tamata daucaka cala mai na gauna e kunekunetaki au kina o tinaqu.

⁶ Na ka o ni vinakata sai koya na yalodina kei na cakacaka vakadodonu; Mo ni qai vakasinaiti au sara ena yalomatua.

⁷ Ni savai au mai noqu i valavala ca, ka'u na qai savasava; Ni vui au, kau na qai vulavula cake mai na uca cevata.

⁸ Ni solia vei au me'u rogoca na domo ni reki kei na marau, Me marau kina na suiqu o ni sa musulaka.

⁹ Ni tabonaka na matamuni mai na noqu i valavala ca Ka bokoca laivi na noqu caka cala kecega.

¹⁰ Ni bulia e lomaqu e dua na yalo e savasava na Kalou Ka tugana e dua na yalo vou ka yalodina e lomaqu.

¹¹ Ni kakua ni biuti au tani mai na matamuni; Ni kakua ni kauta tani na nomuni Yalo Tabu mai vei au.

¹² Ni solia tale mada vakadua vei au na reki, Io, na reki sa vu mai na nomuni veivakabulai, Ka solia talega vei au na yalo ni talairawarawa.

¹³ Au na vakavulici ira na i valavala ca ena nomuni veivakaro, Era na qai lesu tale mai vei kemuni.

¹⁴ Ni vakavotaka na noqu bula na Kalou, na noqu i vakabula, Au na qai dautukuna voli ena reki na nomuni yalododonu.

¹⁵ Ni vukei au na Turaga, me'u vosa Ka me'u na vakacaucautaki kemuni.

¹⁶ O ni sa sega ni vinakata na i soro De'u na qai vakacabora; O ni sega talega ni taleitaka na i soro kama.

¹⁷ Na yalo sa dasila sai koya na i soro e vinakata na Kalou; Na yalomalumalumu kei na yalo ni veivutuni sa sega ni cata na Kalou.

¹⁸ Kemuni na Kalou, ni yalovinaka vei Saioni ka vukea; Ni tara vou tale mada na bai kei Jerusalemi.

¹⁹ O ni na qai taleitaka na veisoro e dodonu, Se i soro kama se na i soro eso sa vakamai taucoko; Ena qai cabori na bulumakau ena nomuni i cabocabonisoro.