NA SAME 46 - Ai Vola Tabu Ena Vakavakadewa Vou

Sa Tiko kei Keda na Kalou

Vua na i liuliu ni sere. A nodra na luve i Kora. A Sere ena Alamoca.

¹ Sa noda i vakavakaruru ka vu ni noda kaukauwa na Kalou, Ka sa dau tiko voleka me veivuke ena veigauna ni leqa.

² O koya oqo eda na sega kina ni rere, Ka veitalia ga ke sa uneune na vuravura, Ka lutu dromu yani na veiulunivanua ki na veiloma ni wasa liwa titobu;

³ Ena veitalia talega kevaka sa vadugu ka seuseua na wasawasa, Se sa yavala sara vakaukauwa na veidelana.

⁴ Sa dua na uciwai sa kauta mai na marau ki na nona koro na Kalou, Ki na nona vale tabu na Kalou sa Cecere Sara.

⁵ Sa tiko na Kalou ena loma ni koro o ya, Ka na sega sara kina ni vakarusai; Ena sou vakamataka na Kalou me la'ki veivuke.

⁶ Era sa vakarerei na veimatanitu ka yavalati na veivanua; Sa vosa mai na Kalou ka sa waicala na vuravura.

⁷ Sa tiko kei keda ko Jiova ni lewevuqa; Sa nodra i drodro na Kalou i Jekope.

⁸ Ni lako mai ka raica na ka sa cakava ko Jiova. Ni mai raica mada na veika veivakurabuitaki sa cakava e vuravura o koya.

⁹ Sa muduka o koya na i valu e vuravura taucoko Sa musulaka na dakaititi, vakarusa na moto Ka vakama na i sasabai ena buka.

¹⁰ A sa kaya o koya, “Ni muduka na nomuni veivaluvaluti ka kila ni sai au ga na Kalou, Ka'u sa qaqa ena kedra maliwa na veimatanitu Ka qaqa e vuravura taucoko.”

¹¹ Sa tiko vata ga kei keda ko Jiova ni lewevuqa Sa noda i drodro na Kalou i Jekope.