NA SAME 4 - Ai Vola Tabu Ena Vakavakadewa Vou

Na Masu ni Kere Veivuke

Vua na i liuliu ni sere: kei na wa ni vakatagi. A Same i Tevita.

¹ Mo ni rogoci au mada ni'u sa masu, Oi kemuni na noqu Kalou, na noqu i sasabai! Ena gauna ni noqu leqa, o ni a qai vukei au. Ni yalovinaka ka rogoca na noqu masu.

² A cava soti na kena dede, oi kemudou na luve ni tamata, Mo dou na vakamaduataki au tiko kina? A cava soti na kena dede Mo dou na taleitaka tikoga kina na veika tawayaga ka goleva na veika lasu?

³ Mo ni nanuma matua ni sa digitaka ko Jiova na tamata yalodina me nona, Ka sa rogoci au ni'u sa masu vua.

⁴ Ni rere ga ka muduka na nomuni kitaka tiko na i valavala ca; Ni vakasamataka vakatitobu sara na ka oqo, Ena gauna o ni tiko vakanomodi kina ena nomuni i mocemoce.

⁵ Ni vakacabora na i soro sa dodonu vei Jiova, Ka vakadinati koya.

⁶ Ni sa lewe levu era sa masu vakaoqo: “I Jiova, ni solia vakalevu mai vei keimami na nomuni veivakalougatataki. Ni raici keimami mai ena mataloloma!”

⁷ Ia na reki o ni sa solia vei au Sa levu cake sara mai na nodra marau Ni sa levu na kedra sila kei na medra waini.

⁸ Ni'u sa davo sobu, au na moce ga ena vakacegu, Ni sai kemuni ga, i Jiova, sa dau maroroi au vinaka.