NA SAME 34 - Ai Vola Tabu Ena Vakavakadewa Vou

Vakacaucautaka na Vinaka ni Kalou

A Same i Tevita, ni sa via vaka na tamata lialia ena mata i Apimeleki, o koya ka sa vakatalai koya tani, ka sa qai lako yani.

¹ Au na dau vakavinavinakataki Jiova ena gauna kecega, Ena sega ni mudu na noqu vakamolimoli vua.

² Au na vakacaucautaki koya ena vuku ni ka sa cakava, Me ra reki ka marau kina o ira kece era vakararawataki ka sa rogoca.

³ Ni mai duavata kei au ena vakacaucautaki Jiova, Me da vakacaucautaka vata kece na yacana!

⁴ Au a masu vei Jiova, ka sa rogoci au o koya; A sa sereki au mai na noqu rere kecega.

⁵ Era sa tacake vua o ira era vakararawataki ka ra sa marau; Ka ra na sega ni vakamaduataki.

⁶ Sa kaci yani vua na tamata dravudravua oqo, ka sa rogoci koya ko Jiova; A sa vakabulai koya mai na nona leqa kecega.

⁷ Na nona agilosi sa taqomaki ira era sa rerevaki koya, Ka vakabulai ira mai na leqa.

⁸ Tovolea mada ka raica na vinaka i Jiova! Ni sa kalougata na tamata sa vakarurugi mai vua.

⁹ Ni rerevaki Jiova, oi kemuni kece na nona tamata yalosavasava, Ni o ira kece sa rerevaki Jiova ena sega ni dua na ka me yali vei ira.

¹⁰ Era na malumalumu mai ka viakana na laione, Ia, o ira sa vakasaqarai Jiova, era na kunea ga na vinaka.

¹¹ Ni lako mai, ragone, ka vakarorogo vei au Ka'u na vakavulici kemuni mo ni rerevaki Jiova.

¹² O vinakata li mo marautaka na bula? O vinakata li na bula balavu kei na bula mamarau?

¹³ Ia mo qai tarova kina na yamemu mai na veika ca Ka muduka na vosa lasu.

¹⁴ Mo gole tani mai na ca ka cakava na ka vinaka; Mo vakasaqara ga na bula vakacegu kei na sautu.

¹⁵ Sa dau wanonovi ira na yalododonu ko Jiova, Ka rogoca na nodra masu;

¹⁶ Ia, sa saqati ira ga era sa dau caka ca, Me ra kakua ni nanumi tale e vuravura.

¹⁷ Era sa tagi vei Jiova na yalododonu, ka sa rogoci ira ko Jiova; Ka sa vakabulai ira mai na nodra leqa kecega.

¹⁸ Sa dau tu voleka ko Jiova vei ira sa mavoa na yalodra Ka sa vakabulai ira sa oti vakadua na nodra i nuinui.

¹⁹ Sa sotava e vuqa na leqa na tamata yalododonu, Ia sa vakabulai koya ko Jiova mai na leqa kece oqori;

²⁰ Sa maroroi koya vinaka sara na Turaga Ka sa sega ni ramusu e dua na nona sui.

²¹ Na ca ena vakamatei ira na i valavala ca; O ira sa cata na cakacaka dodonu era na totogitaki.

²² Sa voli ira vakadua na nona tamata ko Jiova; Era na vakabulai o ira kecega sa gadreva na nona veitaqomaki.