NA SAME 26 - Ai Vola Tabu Ena Vakavakadewa Vou

Na Masu ni Tamata Vinaka

A nei Tevita.

¹ I Jiova, mo ni vakatakila ni sa sega na noqu cala, Baleta ni'u sa cakava na ka e dodonu, Ka vakadinati kemuni ena yaloqu taucoko.

² Ni dikevi au ka vakatovolei au Jiova, Ka mo ni vakataulewa ki na noqu gagadre kei na vakasama.

³ Sa dau tuberi au voli ga na nomuni loloma tudei, Ka sa liutaki au tikoga na nomuni yalodina.

⁴ Au sa sega ni lasa kei ira na tamata tawayaga Ka sega ni dau tiko kei ira na dauveivakaisini.

⁵ Au sa cata na nodra i soqosoqo na tamata ca, Ka sega ni lasa kei ira na i valavala ca.

⁶ Kemuni Jiova au sa vuluvulu me'u vakaraitaka kina ni'u sa tawa cala, Ka lako yani me'u qaravi kemuni ena nomuni cabocabonisoro.

⁷ Au sa lagata e dua na sere ni vakavinavinaka Ka tusanaka na nomuni cakacaka veivakurabuitaki.

⁸ Kemuni Jiova au sa taleitaka na vale o ni tiko kina, Na vanua sa tiko kina na nomuni lagilagi.

⁹ Ni kakua ni vakarusai au vata kei ira na tamata i valavala ca; Ni vakabulai au mai na veika rerevaki e dodonu me nodra na daulaba.

¹⁰ O ira era cakava na ka ca ena veigauna kecega sa dau nodra i vakarau Me ra saumi ira na tamata me ra cakava na ka ca.

¹¹ Ia oi au, au sa dau cakava na ka e dodonu; Ni lomani au ka vakabulai au.

¹² Au sa galala mai na leqa kecega; Ka'u sa dauvakacaucautaki Jiova ena veisoqoni vakalotu vakaivavakoso.