NA SAME 22 - Ai Vola Tabu Ena Vakavakadewa Vou

Na Tagi ni Rarawa kei na Sere ni Vakacaucau

Vua na i liuliu: me vaka na i lagalaga ni sere “Na Dia ni Mataka.” A Same i Tevita.

¹ Noqu Kalou, Noqu Kalou, a cava o ni sa biuti au kina? Au sa tagica vakalevu sara na nomuni veivuke, Ia, o ni sa sega ga ni rogoci au mai!

² Au a masu vei kemuni na noqu Kalou ena siga, Ia, o ni sa sega ga ni sauma mai; Au a masu ena bogi, Ka'u a sega ga ni kunea e dua na vakacegu.

³ Ia, o ni sa vakatikori me vaka na Le Dua Yalosavasava, O koya era sa dau vakacaucautaka na Isireli.

⁴ O ira na neimami qase era sa vakadinati kemuni; Era a vakararavi vei kemuni, ia o ni a vakabulai ira.

⁵ Era sa masu vei kemuni ka dro tani mai na leqa; Era sa vakadinati kemuni ka ra sa sega ni vakamaduataki.

⁶ Ia, au sa qai sega tale ni tamata, a bacaniqele ga, Ka'u sa beci ka vakasewasewani mai na lewe vuqa!

⁷ O ira kece era raici au era sa vakalialiai au, Era sa vakavevea na gusudra ka kuretaka na uludra.

⁸ Era a kaya, “O sa dau vakararavi vua na Kalou, A cava ga e sega ni vakabulai iko kina o koya? Kevaka e vinakati iko na Kalou, Na cava ga e sega ni vukei iko kina?”

⁹ Sa i kemuni ga o ni a vakabulai au mai na gauna ni noqu sucu, O ni a taqomaki au talega ena gauna ni noqu gone lailai.

¹⁰ Au a dau vakararavi tikoga vei kemuni me tekivu sara mai na gauna au a sucu kina, Ka o ni sa noqu Kalou tikoga me tekivu sara ni'u a sa qai sucu mai.

¹¹ Ni kakua ni yawa tani mai vei au. Sa tu voleka sara na leqa, Ka sa sega ni dua me veivuke.

¹² Sa lewe vuqa sara na meca era wavokiti au ka ra vaka na bulumakau tagane; Era sa wavokiti au kece, ka ra sa vaka na bulumakau tagane rerevaki ni Pasani.

¹³ Era sa dolava na gusudra vei au Na laione dautagi ka dauveidresulaki.

¹⁴ Sa takali na noqu kaukauwa; Sa takali me vaka na wai sa tasova ki na qele. Sa mavule kecega na i sema ni suiqu, Ka sa waicala na utoqu e lomaqu.

¹⁵ Sa mamaca na noqu i tilotilo me vaka na kuvu ni soso, Ka sa kabi na yamequ ki na gadroqu. O ni sa laivi au me'u mate ena soso.

¹⁶ Era sa wavokiti au e dua na i lala tamata ca; Era sa toro volekati au me vaka e dua na i lala koli, Ka ra sa coka na ligaqu kei na yavaqu.

¹⁷ Sa rawa me laurai kece na suiqu. Era sa vakaraici au ka wanonovi au na kequ meca;

¹⁸ Era sa wasea ga vei ira na noqu i sulu, Ka vakawirimadigitaka na noqu i ubi balavu.

¹⁹ Kemuni Jiova ni kakua ni yawa tani mai vei au. Ni totolo mai vei au na noqu i vakabula ka mai vakabulai au.

²⁰ Ni vakabulai au mai na i seleiwau, Ni maroroya na noqu bula mai vei ira na koli oqo.

²¹ Ni vakabulai au mai vei ira na laione oqo; Au sa sega ni cakava rawa e dua na ka ena matadra na bulumakau kila oqo.

²² Au na tukuna vei ira na wekaqu na ka o ni sa cakava, Ka'u na vakacaucautaki kemuni ena nodra soqoni.

²³ “Oi kemuni sa rerevaki Jiova, ni vakacaucautaki koya! Ni rokovi koya, oi kemuni na kawa i Jekope! Ni sokalou vua, oi kemuni na Isireli!

²⁴ Sa sega ni dau guilecavi ira na dravudravua o koya se vakawaletaka na nodra vakararawataki; Sa sega ni dau vuki tani mai vei ira o koya, Ia, sa dau rogoci ira ga ni ra sa kere veivuke vua.”

²⁵ Au na vakacaucautaki kemuni vei ira na i vavakoso levu ena vuku ni veika o ni sa vakayacora. Au na vakacabora vei kemuni na i soro kece au sa yalataka Ena matadra kece era sa dau talairawarawa vei kemuni.

²⁶ Era na kania na dravudravua na levu ga ni ka era via kania. O ira era lako mai vei Jiova era na vakacaucautaki koya. Mo ni tiko vinaka tikoga ka tawa mudu!

²⁷ Na veimatanitu kece era na nanumi Jiova; Era na gole mai vua na veiyasa i vuravura kecega, Era na qaravi koya kecega na veimatatamata.

²⁸ Sa i Jiova na Tui, Ka sa lewa na veimatanitu kecega.

²⁹ Era na cuva vua na tamata viavialevu kece sara, Ka vakarokoroko vua na ka kecega era na lesu tale ki na qele.

³⁰ Era na qaravi koya na veitabatamata e muri, Era na dau tukuna na veika e baleta na Turaga ki na veitabatamata era na muri mai.

³¹ O ira na tamata era se bera ni sucu ena tukuni vei ira, “Sa vakabulai ira na nona tamata na Turaga.”