NA SAME 16 - Ai Vola Tabu Ena Vakavakadewa Vou

A Masu ni Vakararavi vua na Kalou

A Same i Tevita.

¹ Ni taqomaki au na Kalou Ni'u sa lako mai vei kemuni me'u vakarurugi.

² Au sa kaya vei Jiova, “Sa i kemuni na noqu Turaga. Na veika vinaka kece e tu vei au sa taka mai vei kemuni.”

³ Sa na vakacava na nodra vinaka na tamata yalodina ni Turaga! Na ka au taleitaka vakalevu duadua sai koya me'u tiko kei ira.

⁴ O ira era muri ira na veikalou tani Era sa kauta ga mai vei ira na leqa. Au na sega ni vakaitavi ena nodra i soro Ka'u na sega ni qaravi ira na nodra kalou.

⁵ Sa i kemuni ga Jiova na ka kece au sa gadreva; Sa tu ga na noqu bula ena ligamuni.

⁶ Sa talei dina na veisolisoli o ni solia vei au; Era sa uasivi dina.

⁷ Au na vakacaucautaki Jiova baleta ni sa vakasalataki au, Ia ena bogi sa tuberi au na yaloqu.

⁸ Au sa dau kauwaitaka ni sa tiko voli kei au ko Jiova. Sa dau voleka tikoga o koya ka sega na ka me yavalati au.

⁹ Sa i koya oqo au sa sinai tu ga kina ena reki kei na marau, Kau vakila ni'u sa taqomaki tu;

¹⁰ Baleta ni o ni na sega ni laivi au me'u lako yani ki na nodra vanua na mate. O ni na sega ni laivi koya o ni sa lomana Me lako ki na boto ni qara.

¹¹ O ni na vakaraitaka vei au na sala sa basika ki na bula; Na nomuni tu voleka sa vakasinaiti au ena reki Ka sa kauta mai na marau tawa mudu na nomuni veivuke.