NA SAME 146 - Ai Vola Tabu Ena Vakavakadewa Vou

Me Laveti ka Rokovi na Kalou na i Vakabula

¹ Me vakacaucautaki ko Jiova! Me vakacaucautaki Jiova, na yaloqu!

² Au na vakacaucautaki Jiova ga ni se tiko na i cegu ni bula; Au na sere vua na noqu Kalou ena noqu bula taucoko.

³ Ni kakua ni vakararavi vei ira na luvenitui, Se vua tale e dua sa sega ni rawata me veivakabulai.

⁴ Ni ra sa mate, era sa suka lesu tale ki na qele, Ka sa cava ena siga o ya na nodra i naki kecega.

⁵ Sa kalougata na tamata sa nona i vukevuke na Kalou i Jekope, Ka vakararavi vei Jiova na nona Kalou,

⁶ O koya sa bulia na lomalagi, na vuravura kei na wasawasa kei na veika kecega sa tu kina. Sa dau vakayacora ga o koya na veika sa yalataka;

⁷ Sa dau lewa vakadodonu ena vukudra era vakararawataki, Ka solia na kedra era viakana. Sa sereki ira era vesu tu ko Jiova,

⁸ Ka dolava na matadra era mataboko. Sa vueti ira cake era tabaki sobu; Sa lomani ira na nona tamata yalododonu.

⁹ Sa taqomaki ira na kai tani ko Jiova Sa vukei ira na yada kei na luveniyali, Ia sa vakarusa na nodra i naki na tamata ca.

¹⁰ Ena Tui ko Jiova ka na sega ni mudu! Na nomu Kalou, i Saioni, ena veiliutaki ena veigauna kecega. Me vakacaucautaki ga ko Jiova!