NA SAME 144 - Ai Vola Tabu Ena Vakavakadewa Vou

A Masu ni Vakavinavinaka Vua na Kalou

A nei Tevita.

¹ Me vakacaucautaki ko Jiova, o koya sa dautaqomaki au; Sa vakavulici au ena vuku ni veivaluvaluti, Ka vakarautaki au vinaka me'u ia na i valu.

² Sa noqu i sasabai ka dauveimaroroi o koya, Sa i koya na noqu i vakaruru ka noqu i vakabula, Ka'u sa vakararavi kina me'u taqomaki. Sa vakamalumalumutaki ira na veimatanitu vei au.

³ Kemuni Jiova, A cava na tamata mo ni kauwaitaki koya kina; Na tamata ka sa vakaicavacava ga na nona bula, mo ni qai nanumi koya kina?

⁴ Sa vaka wale ga e dua na i cegu cagi o koya; Na nona veisiga sa vaka na takali yani ni yaloyalo ni dua na ka.

⁵ Ni biliga sobu na lomalagi, i Jiova, ka lako sobu mai; Ni tara na veiulunivanua, ka ra na qai kubou yani.

⁶ Ni tala mai na yameyame ni livaliva me vakasavi ira na meca; Ni vanataka na nomuni dakaititi, ka vakacicivi ira tani yani.

⁷ Ni dodoka sobu mai na ligamuni mai lomalagi, Ka vueti au mai na wai titobu, ka vakabulai au; Ni vakabulai au mai na ligadra na kai tani,

⁸ O ira era sega ni bau dau tukuna na ka dina, Ka ra dau lasu sara mada ga ni ra bubului.

⁹ Au na seretaka vei kemuni na Kalou e dua na sere vou; Au na qiria na api ka sere vei kemuni.

¹⁰ O ni sa solia na qaqa vei ira na tui eso Ka vakabula na nomuni dauveiqaravi o Tevita.

¹¹ Ni vakabulai au mai vei ira na kai tani Era sega ni dau tukuna na ka dina, Ka dau lasu sara mada ga ni ra bubului.

¹² Me ra na kau tubu kaukauwa cake Na luve i keimami tagane ena nodra gauna ni cauravou. Me ra vaka na vatu ni vakananumi ena veivale ni tui Na neimami goneyalewa.

¹³ Me sinai na neimami lololo Ena veimataqali vua ni qele kecega. Me udolu vakaudolu na luve ni sipi Ena neimami vanua.

¹⁴ Me vakaluveni vakalevu sara na neimami bulumakau Ka me ra kakua ni vakalutu se mate. Me kakua ni dua na tagi ni rarawa me rogo ena neimami veigaunisala.

¹⁵ Sa kalougata na matatamata sa yaco dina kina na ka oqo; Sa kalougata na matatamata sa nodra Kalou ga ko Jiova.