NA SAME 141 - Ai Vola Tabu Ena Vakavakadewa Vou

A Masu ni Kere Veitaqomaki mai na Veika Ca

A Same i Tevita

¹ Kemuni Jiova, Au kerei kemuni mo ni vakatotolo mai ka mai vukei au. Ni rogoci au ena gauna au masu kina vei kemuni.

² Ni ciqoma na noqu masu me vaka na ka boi vinaka, Kei na dulaki cake ni ligaqu me vaka na i soro ni yakavi.

³ Kemuni Jiova, ni lesia e dua na yadra me tiko e gusuqu. E dua me yadrava na katuba ni tebe ni gusuqu.

⁴ Ni maroroi au me'u kakua ni gadreva na vakayacora na ka ca, Se me'u vakailala vata kei ira na tamata ca ena nodra i tovo ca. Me'u kakua ni vakaitavi ena nodra veisolevu.

⁵ Ena totogitaki au ka vunauci au na tamata vinaka ena yalovinaka, Ia, au na sega ga ni laiva vua na tamata ca me lumuta na uluqu, Ni'u sa dau masulaka tikoga na vakarusai ni i tovo ca.

⁶ Ni ra sa na viritaki sobu o ira na nodra i liuliu ki na vanua veivatu, O ira na tamata era na qai vakadinata na dina ni noqu vosa.

⁷ Me vaka na kau sa vidavidai ka musumusulaki, Era na veibiuyaki vakakina na suidra ena bati ni bulubulu.

⁸ Ia, oi au, kemuni na Kalou, Au sa vakararavi tikoga vei kemuni; Au sa vakasaqara ga na nomuni veitaqomaki; Mo ni kakua kina ni laivi au me'u mate!

⁹ Ni taqomaki au mai na dai era sa cakava me baleti au, Kei na i vadi ca ni tamata ca o ya.

¹⁰ Me ra coko ga na tamata ca ena dai era sa cakava, Ka me'u na dro bula duaduaga oi au.