NA SAME 140 - Ai Vola Tabu Ena Vakavakadewa Vou

A Masu ni Kere Veitaqomaki

Vua na i liuliu ni sere. A Same i Tevita.

¹ Kemuni Jiova, ni vakabulai au mai vei ira na tamata ca; Ni taqomaki au mai vei ira era i tovo kaukauwa.

² Era sa nakita tikoga na veika ca, Ka ra vakavuna me yaco na veivaluvaluti.

³ Sa gata na yamedra me vaka na yame ni gata, Na nodra vosa sa vaka na weli gaga ni gata bati gaga.

⁴ Ni taqomaki au Jiova mai na ligadra na tamata ca, Ka maroroi au mai vei ira na i tovo kaukauwa; Era sa bosea me'u vakacacani.

⁵ Era sa cakava na nodra dai na tamata viavialevu me baleti au; Ka ra tevuka na nodra lawa; Era sa mai cakava e dua na dai ena bati ni sala me ra vesuki au kina.

⁶ Au sa kaya vei Jiova, “Sa i kemuni na noqu Kalou.” I Jiova ni rogoca na noqu tagi ni kere veivuke!

⁷ Kemuni Jiova na noqu Kalou na noqu i vakabula qaqa, O ni a taqomaki au ena i valu.

⁸ Kemuni Jiova, ni kakua ni solia vei ira na tamata ca na ka era vinakata; Ni kakua ni laiva me yaco na nodra i naki ca!

⁹ Ni kakua ni laivi ira na kequ meca me ra qaqa; Ni cakava me lauti ira tale na ka era vosataka.

¹⁰ Me lutuki ira na qilaiso katakata sa waqa tu; Me ra biu ki na dua na qara ka sega tale ni ra lako cake rawa mai kina.

¹¹ Me ra kakua ni rawata e dua na ka na dauveibeitaki vakailasu, Me yacova na tamata i tovo kaukauwa na ka ca ka vakarusai kina.

¹² I Jiova, au sa kila ni o ni na taqomaki ira na vakaloloma, Ka vakataulewa dodonu ena vukudra na dravudravua.

¹³ Era na vakacaucautaki kemuni ga na yalododonu; Era na dau tiko ga ena matamuni na yalosavasava.