NA SAME 129 - Ai Vola Tabu Ena Vakavakadewa Vou

A Masu me Vakadrukai na Meca

A Sere ni cabecabe.

¹ I Isireli, mo tukuna mada na nodra vakararawataki iko na kemu meca, Me tekivu mai na gauna o a se gone kina.

² “Me tekivu sara ga mai na gauna au se gone kina, Era sa dau vakararawataki au vakaca sara na kequ meca, Ia, era sega ga ni vakadrukai au.

³ Era sa vakamavoataka sara vakaca na dakuqu, Ka cakava me vaka e dua na buca sa siviyara tu.

⁴ Ia, sa qai sereki au ga ko Jiova, o koya na yalosavasava, Ni sa vagalalataki au mai na veivakabobulataki.”

⁵ Me ra vakadrukai ka vakasavi lesu, O ira kece era cati Saioni.

⁶ Me ra vaka na co era tubu tu ena dela ni vale, Ena nodra sa malai ni ra se bera ni musu.

⁷ Sa sega ni dua me kumuna vata, Se colata tani yani ena kena i vau.

⁸ Ena sega ni dua me na lako sivita me na kaya, “Me vakalougatataki kemuni ko Jiova! Keimami sa vakalougatataki kemuni ena yaca i Jiova.”