NA SAME 119 - Ai Vola Tabu Ena Vakavakadewa Vou

Na Lawa i Jiova (Alefa)

¹ Sa kalougata o ira era sa sega ni beitaki rawa ena dua na ka, Ni ra sa muria na lawa i Jiova.

² Sa kalougata o ira era muria na nona i vakaro, O ira sa vakasaqarai koya ena yalodra taucoko.

³ Era sa sega ni cakava e dua na ka ca; Ni ra sa muria voli ga na sala i Jiova.

⁴ O ni sa solia vei keimami na nomuni lawa Ka tukuna vei keimami me keimami muria ena yalodina.

⁵ Au nuitaka me'u muria ena yalodina na nomuni veivakaro.

⁶ Kevaka au muria kece na nomuni i vakaro, Au na sega sara ni veivutunitaka.

⁷ Ni'u sa vulica na nomuni lewa dodonu, Au na vakacaucautaki kemuni ena yalosavasava.

⁸ Au na talairawarawa ki na nomuni lawa; Ni kakua sara ni biuti au.

Talairawarawa ki na Lawa i Jiova (Beta)

⁹ Ena maroroya vakacava na nona bula na cauravou me na savasava? Ni sa muria ga na nomuni i vakaro.

¹⁰ Au sa tovolea me'u qaravi kemuni ena yaloqu taucoko; Ni vukei au me'u kakua ni talaidredre ki na nomuni i vakaro.

¹¹ Au sa maroroya na nomuni vosa e lomaqu, Me'u kakua kina ni cala vei kemuni.

¹² Au sa vakacaucautaki kemuni Jiova, Ni vakavulici au ena nomuni i vakavuvuli.

¹³ Au na wilika tale vakadomoilevu, Na nomuni lewa kece o ni a solia.

¹⁴ Au marautaka cake vakalevu na muria na nomuni vakaro Mai na levu ni noqu i yau.

¹⁵ Au na vulica na nomuni vakaro, Ka dikeva na nomuni i vakavuvuli.

¹⁶ Au na taleitaka na nomuni vunau, Ka'u na sega sara ni guilecava na nomuni vosa.

Marau ena Lawa i Jiova (Qimela)

¹⁷ Kemuni Jiova, ni yalovinaka vei au na nomuni tamata dauveiqaravi, Me'u bula kina ka muria na nomuni vakavuvuli.

¹⁸ Ni dolava na mataqu me'u raica kina Na veika dina ka talei ena nomuni lawa.

¹⁹ Au sa tiko vakavulagi ga e vuravura, Ni kakua ni vunitaka vei au na nomuni vakaro.

²⁰ Sa mosi mai na yaloqu ena vuku ni noqu gagadre, Ni'u sa vinakata me'u kila na nomuni lewa ena veigauna kecega.

²¹ O ni sa vunauci ira na viavialevu, Era sa kalouca o ira era sa gole tani mai na nomuni i vakaro.

²² Ni vagalalataki au mai na nodra veivakalialiai kei na nodra veibeci, Baleta ni'u sa talairawarawa ki na nomuni lawa.

²³ Dina ga ni ra sa bose na i liuliu ka bukiveretaki au, Oi au na nomuni tamata au na vulica ga na nomuni vakavuvuli.

²⁴ Sa vakamarautaki au na nomuni i vakaro, Era sa noqu daunivakasala.

Yalodina ena Kena Muri na Lawa (Daleca)

²⁵ Au sa davo druka tu ena soso; Ni vakaukauwataki au me vaka na nomuni vosa.”

²⁶ Au na tusanaka kece na veika au a cakava, ka o ni sa rogoci au; Ni qai vakavulici au ena nomuni sala.

²⁷ Ni vukei au me'u bau kila na nomuni lawa, Ka'u na qai vakanananu ena nomuni vakavuvuli talei.

²⁸ Au sa luvuci ena rarawa; Ni vakaukauwataki au, me vaka o ni sa yalataka.

²⁹ Ni tarovi au ena noqu muria na ka lasu, Ena nomuni yalovinaka, ni vakavulici au kina ena nomuni sala.

³⁰ Au sa vakadeitaka oti me'u na talairawarawa; Ka'u sa biuta e mataqu na nomuni lewa.

³¹ Au sa muria na nomuni i vakaro i Jiova, Ni kakua ni laivi au me'u vakamaduataki.

³² Au sa taleitaka na muria na nomuni i vakaro, Baleta ni o ni solia tale vakalevu vei au na kila-ka.

A Masu ni Kere Vuku Vakayalo (He)

³³ Kemuni Jiova, ni vakavulici au ena nomuni lawa, Ka'u na muria tiko ena veigauna kecega.

³⁴ Ni vakamacalataka vei au na nomuni lawa Ka'u na maroroya ena lomaqu taucoko.

³⁵ Ni tuberi au ena sala ni nomuni vakaro, Baleta ni'u sa kunea kina na marau.

³⁶ Ni qisi au me'u taleitaka na muria na nomuni lawa, Ka me kakua ga na vutuniyau.

³⁷ Ni tarovi au me'u kakua ni goleva na ka tawayaga; Ni yalovinaka vei au me vaka o ni sa yalataka.

³⁸ Ni vakayacora na nomuni vosa ni yalayala vei au na nomuni tamata, O ni a kaya me baleti ira era rerevaki kemuni.

³⁹ Ni vakabulai au mai na veivakasewasewani au sa rerevaka; Sa ka talei dina na nomuni lewa.

⁴⁰ Au gadreva me'u muria na nomuni vakaro; Ni solia vei au na bula vou, ni o ni sa yalododonu ga.

Vakadinata na Lawa i Jiova (Vau/Wau)

⁴¹ I Jiova, ni vakaraitaka mai vei au na levu ni nomuni lomani au, Ka vakabulai au me vaka na nomuni vosa ni yalayala.

⁴² Au sa na rawa ni qai sauma na nodra vosa era vakasewasewani au; Baleta ni'u sa vakadinata na nomuni vosa.

⁴³ Ni vukei au me'u tukuna na i tukutuku dina ena gauna kecega, Baleta ni sa tu na noqu vakanuinui ki na nomuni lewa.

⁴⁴ Au na dau muria tikoga na nomuni lawa, Ena veigauna kece ka sega ni mudu.

⁴⁵ Au na bula ena galala, Baleta ni'u sa tovolea me'u muria na nomuni vakavuvuli.

⁴⁶ Au na vunautaka na nomuni vakaro vei ira na tui, Ka'u na sega sara ni madua.

⁴⁷ Au marau ni'u sa muria na nomuni vakaro, Baleta ni'u sa taleitaka.

⁴⁸ Au sa rokova ka lomana na nomuni i vakaro. Au na vakanananu ena nomuni i vakavuvuli.

Nuidei ena Lawa i Jiova (Sayini)

⁴⁹ Ni nanuma na nomuni yalayala vei au, na nomuni tamata; Sa solia ga vei au na vakanuinui tudei.

⁵⁰ Ena gauna ni noqu rarawa, au sa dau yalovakacegu ga, Baleta ni sa solia vei au na bula na nomuni vosa ni yalayala.

⁵¹ Era sa beci au na tamata viavialevu, Ia, au sa sega ga ni gole tani mai na nomuni lawa.

⁵² Ni'u dau vakananuma na nomuni vakatulewa e liu, Sa dau veivakacegui dina, i Jiova.

⁵³ Au sa sinai ena cudru, Ni'u raici ira na tamata ca ni ra basuka na nomuni lawa.

⁵⁴ Au a bulia na sere me baleta na nomuni i vakaro, Ena noqu a tu tani voli mai na noqu vale.

⁵⁵ I Jiova, au sa dau vakasamataki kemuni ena bogi, Ka'u sa muria ga na nomuni lawa.

⁵⁶ Sa i koya oqo na ka au marautaka, Me'u maroroya na nomuni vakavuvuli.

Yalodina ki na Lawa i Jiova (Keca)

⁵⁷ Sa i kemuni ga ka'u sa gadreva; Au sa yalataka me'u tugana na nomuni vosa.

⁵⁸ Au sa vakatarotarogi kemuni ena vu ni yaloqu taucoko; Ni yalololoma vei au, me vaka na nomuni vosa ni yalayala!

⁵⁹ Au sa liaca na noqu i vakarau, Ka'u sa yalataka me'u na muria na nomuni i vakasala.

⁶⁰ Au sa sega tale ni wawa, au sa vakatotolo sara ga Me'u muria na nomuni i vakaro.

⁶¹ Era sa vesuki au sara vakaukauwa na tamata ca ena nodra dali, Ia, au sa sega ga ni guilecava na nomuni vunau.

⁶² Au sa yadra cake ena lomaloma ni bogi Me'u vakacaucautaki kemuni ena vuku ni nomuni lewa dodonu.

⁶³ Au sa nodra i tokani na tamata kecega era qaravi kemuni, O ira kece era muria na nomuni lawa.

⁶⁴ I Jiova, sa sinai ga o vuravura ena nomuni loloma tudei; Ni vakavulici au ena nomuni i vakaro.

Na Yaga ni Lawa i Jiova (Teca)

⁶⁵ I Jiova, o ni sa vakayacora tikoga na nomuni vosa ni yalayala, Ka yalovinaka vei au na nomuni tamata.

⁶⁶ Ni solia vei au na vuku kei na kila-ka, Baleta ni'u sa vakadinata na nomuni vakaro.

⁶⁷ Ni se bera ni o ni a totogitaki au e liu, au a daucakava ga na veika ca, Ia oqo, au sa talairawarawa ga ki na nomuni vosa.

⁶⁸ O ni sa yalovinaka ka i tovo vinaka, Ni vakavulici au ena nomuni i vakaro.

⁶⁹ Era sa tukuna na veika lasu na tamata viavialevu me baleti au, Ia au sa muria tikoga na nomuni vakavuvuli ena lomaqu taucoko.

⁷⁰ Era sa sega ni yalomatua na tamata oqo, Ia, au sa rekitaka ga na nomuni vunau.

⁷¹ Sa yaga sara vei au na kequ i totogi, Baleta ni sa vakavulici au me'u kila na nomuni i vakaro.

⁷² Sa vakaibalebale cake vakalevu vei au na lawa o ni solia Mai na udolu na tiki ni koula kei na siliva.

Na Dodonu ni Lawa i Jiova (Yota)

⁷³ O ni a buli au ka taqomaki au tiko; Ni solia vei au na kila-ka, ka me'u na vulica rawa kina na nomuni lawa.

⁷⁴ Era na marau ni ra raici au o ira kece era rerevaki kemuni, Baleta ni'u sa vakanuinui ga ki na nomuni vosa.

⁷⁵ Au sa kila, i Jiova, ni sa dodonu na nomuni lewa, Ka o ni sa totogitaki au ena vuku ni nomuni yalodina.

⁷⁶ Me qai vakacegui au na nomuni loloma tudei, Me vaka o ni sa yalataka vei au na nomuni tamata.

⁷⁷ Ni yalololoma vei au, ka'u na qai bula kina; Ena vuku ni noqu sa rekitaka na nomuni lawa.

⁷⁸ Me ra vakamaduataki na tamata viavialevu ena nodra beitaki au vakailasu; Ia oi au, au na dau vakananuma ga na nomuni vakavuvuli.

⁷⁹ Me ra lako mai vei au na rerevaki kemuni Kei ira era kila na nomuni vakaro.

⁸⁰ Me'u na muria sara vakavinaka na nomuni vakaro Ka vagalalataki au mai na madua ni druka.

A Masu ni Kere Veisereki (Kafa)

⁸¹ I Jiova, au sa oca mai, ni'u sa waraka na nomuni veivakabulai; Au sa vakadinata ga na nomuni vosa.

⁸² Sa oca mai na mataqu ena vakaraica tiko na ka o ni a yalataka, Ka'u sa taroga, “O ni na qai vukei au ni naica?”

⁸³ Au sa vaka na bolaniwai kuli ni manumanu sa sega na kena yaga; Ia, au sa sega ga ni guilecava na nomuni vakaro.

⁸⁴ Ena vakacava soti na dede ni noqu wawa? O ni na qai totogitaki ira era vakararawataki au ena gauna cava?

⁸⁵ Era sa keli qara, era sa vesuki au, O ira na tamata viavialevu era sega ni muria na nomuni lawa.

⁸⁶ Sa dina na nomuni i vakaro kecega; Era sa vakacacani au ena veika lasu!

⁸⁷ Era sa voleka sara ni rawata me ra vakamatei au, Ia, au sa sega ga ni vakanadakuya na nomuni i vakaro.

⁸⁸ Ni maroroya na noqu bula ena nomuni loloma tudei, Me'u na muria kina na nomuni lawa.

Vakadinata na Lawa i Jiova (Lameta)

⁸⁹ Kemuni Jiova, ena tudei na nomuni vosa ka sega ni mudu; Sa vakataudeitaki mai lomalagi.

⁹⁰ Sa tudei na nomuni yalodina me yacova na veitabatamata kecega; O ni sa vakatikora na vuravura ena tikina me tu kina, ka sa tudei tu ga kina.

⁹¹ Sa tudei tu ga na veika kece me yacova na siga edaidai ena vuku ni nomuni i vakaro; Baleta ni ra sa nomuni dauveiqaravi kecega.

⁹² Kevaka me a sega ni vu ni noqu marau na nomuni lawa, Ke'u a sa mate ena noqu yalorarawa.

⁹³ Au na sega sara ni guilecava na nomuni vakaro, Baleta ni o ni sa solia kina vei au na bula.

⁹⁴ Au sa nomuni, ni vakabulai au! Au sa tovolea me'u muria na nomuni vakaro.

⁹⁵ Era sa wawa tiko na tamata ca me ra vakamatei au, Ia, au na vakanananu ga ena nomuni lawa.

⁹⁶ Au sa vulica rawa ni sa vakaiyalayala na veika kecega; Ia, na nomuni vakaro sa sega ni vakaiyalayala.

Taleitaka na Lawa i Jiova (Memi)

⁹⁷ Au sa taleitaka dina na nomuni vunau! Au sa vakanananu ga kina ena veisiga taucoko sara.

⁹⁸ Sa tiko kei au na nomuni i vakaro ena veigauna kecega, Ka sa vakavukui au cake mai vei ira kece na kequ meca.

⁹⁹ Sa levu cake na ka au sa kila mai vei ira na noqu qasenivuli, Baleta ni'u sa dau vakanananu ena nomuni i vakaro.

¹⁰⁰ Au sa vuku cake vakalevu mai vei ira na qase, Baleta ni'u sa muria na nomuni vakaro.

¹⁰¹ Au sa tarovi au mai na i tovo ca kecega, Baleta ni'u sa gadreva me'u muria na nomuni vosa.

¹⁰² Au sa sega ni guilecava na nomuni vakaro, Baleta ni sai kemuni o ni a vakavulici au.

¹⁰³ Sa kamikamica dina na nomuni i vakaro, Io, sa kamikamica cake mai na deni oni!

¹⁰⁴ Au sa rawata na vuku mai na nomuni lawa, Ka'u sa cata kina na veitovo ca kecega.

Na Rarama mai na Lawa i Jiova (Nuni)

¹⁰⁵ Na nomuni vosa sa vaka na cina ki na yavaqu Kei na rarama ki na noqu sala.

¹⁰⁶ Au na vakayacora na veika ka'u sa yalataka, Me'u muria kina na nomuni i vakaro dodonu.

¹⁰⁷ Au sa vakararawataki vakalevu sara, Jiova; Ni vakabulai au me vaka o ni sa yalataka.

¹⁰⁸ Ni vakadonuya mada Jiova na noqu masu ni vakavinavinaka, Ka vakavulici au ena nomuni i vakaro.

¹⁰⁹ Au sa dau vakarau tu ga me'u taqomaka na noqu bula; Au sega sara ni guilecava na nomuni lawa.

¹¹⁰ Era sa cakava e dua na dai na tamata ca me baleti au, Ia au sa sega sara ni talaidredre ki na nomuni vakaro.

¹¹¹ Sa noqu i votavota ka sega ni mudu na nomuni i vakaro, Era sa ka ni reki ga ki lomaqu.

¹¹² Au sa vakatulewataka me'u muria na nomuni lawa, Me yacova na siga au sa na mate kina.

Maroroi ka Taqomaki ena Lawa i Jiova (Sameki)

¹¹³ Au sa cati ira era sa sega ni yalodina vei kemuni, Ia, au sa taleitaka ga na nomuni vunau.

¹¹⁴ Sa i kemuni o ni sa dau maroroi au, ka taqomaki au, Au sa vakanuinui ki na nomuni vosa ni yalayala.

¹¹⁵ Ni lako tani mai vei au na tamata i valavala ca, Au na muria ga na nona i vakaro na noqu Kalou.

¹¹⁶ Ni solia vei au na kaukauwa me vaka o ni sa yalataka, me'u bula kina; Ni kakua ni laiva me'u vakamaduataki ena ka au sa nuitaka!

¹¹⁷ Ni tauri au, au na qai taqomaki vinaka, Ka'u na qai dau goleva tikoga na nomuni i vakaro.

¹¹⁸ O ni sa cati ira kece era cata na nomuni lawa; Ka sa tawayaga na nodra veinaki ca.

¹¹⁹ O ni sa okati ira kecega na tamata ca me vaka na benu, Ia, au sa lomana ga na nomuni i vakaro.

¹²⁰ Au sa sega sara ni rere ena vukumuni, Ia, au sa sinai ga ena vakarokoroko ena vuku ni nomuni lewa.

Talairawarawa ki na Lawa i Jiova (Ayini)

¹²¹ Au sa vakayacora na ka sa dodonu ka vinaka; Ni kakua ni biuti au vei ira na kequ meca!

¹²² Ni yalataka mada ni o ni na vukea na nomuni tamata; Ni kakua ni laivi ira na tamata ca me ra vakaleqai au!

¹²³ Sa oca na mataqu ena vakaraica toka na nomuni veivakabulai, Na veisereki o ni a yalataka.

¹²⁴ Ni vakayaco lomamuni ga vua na nomuni tamata me vaka na nomuni loloma tudei, Ka vakavulici au ena nomuni i vakaro.

¹²⁵ Oi au na nomuni tamata dauveiqaravi, ni solia vei au na kila-ka; Me'u kila kina na nomuni vakavuvuli.

¹²⁶ Kemuni Jiova, sa kena gauna oqo mo ni cakacaka kina, Baleta ni ra sa sega ni muria na tamata na nomuni lawa.

¹²⁷ Au sa lomana vakalevu cake na nomuni lawa mai na koula, Ka vakalevu cake mai na koula dina.

¹²⁸ Ia au sa muria kece na nomuni vakasala; Au sa cata na veika kecega e cala.

Gadreva mo Muria na Lawa i Jiova (Pe)

¹²⁹ Sa ka talei na nomuni i vakavuvuli Ka'u sa muria ena yaloqu taucoko.

¹³⁰ Na vakamacalataki ni nomuni vakavuvuli sa solia na rarama, Ka solia na yalomatua vei ira na lecaika.

¹³¹ Au sa dalaga ena cegu oca, Ena noqu gadreva voli na nomuni i vakaro.

¹³² Ni vuki mai vei au ka yalololoma vei au, Me vaka o ni sa dau vakayacora vei ira era lomani kemuni.

¹³³ Ni maroroi au me'u kakua ni bale, me vaka o ni yalataka; Ni kakua ni laiva me vakadrukai au na ca.

¹³⁴ Ni vakabulai au mai vei ira era vakararawataki au, Me'u muria kina na nomuni vakaro.

¹³⁵ Me serauna mada na nomuni tamata na matamuni, Ka vakavulici au ena nomuni lawa.

¹³⁶ Sa drodro mai na wai ni mataqu me vaka na uciwai, Baleta ni ra sa sega ni muria na tamata na nomuni lawa.

Na Dodonu ni Lawa i Jiova (Sade)

¹³⁷ I Jiova, o ni sa yalododonu ga, Ka sa dodonu na nomuni vakataulewa.

¹³⁸ Na lawa o ni sa solia sa vinaka ka dodonu taucoko sara.

¹³⁹ Sa waqa tiko e lomaqu na noqu lomakatakata me vaka na buka Ni ra sa sega ni kauwaitaka na nomuni i vakaro na kequ meca.

¹⁴⁰ Sa ka dina na nomuni vosa ni yalayala, Ka sa lomana sara vakalevu na nomuni tamata.

¹⁴¹ Au sa tamata wale ga ka beci, Ia, au sa sega ga ni cakitaka na nomuni vakavuvuli.

¹⁴² Ena tudei na nomuni yalosavasava ka sega ni mudu, Ena dina tikoga na nomuni vunau.

¹⁴³ Au sa vakasinaiti ena leqa kei na rarawa, Ia, sa vakamarautaki au ga na nomuni i vakaro.

¹⁴⁴ Sa dodonu na nomuni i vakavuvuli ka sega ni mudu; Ni solia vei au na kila-ka, au sa na qai bula.

A Masu ni Kere Veisereki (Kofa)

¹⁴⁵ Au sa masu yani vei kemuni Jiova ena yaloqu taucoko, Ni sauma mai na noqu masu Turaga, au na qai muria na nomuni vakaro.

¹⁴⁶ Au sa masu vei kemuni, Ni vakabulai au, au na qai muria na nomuni lawa.

¹⁴⁷ Ni bera ni cabe na siga au sa masuta yani na nomuni veivuke, Au sa vakanuinui sara ga ki na nomuni vosa ni yalayala.

¹⁴⁸ Au davo ka yadra tu ga ena bogi taucoko, Me'u vakanananu ena nomuni vakaro.

¹⁴⁹ Ni rogoci au, i Jiova, ena nomuni loloma tudei; Ni vakatakila na nomuni yalololoma, ka maroroya na noqu bula!

¹⁵⁰ Era sa voleka mai na dauveivakararawataki ca sara, O ira na tamata era sega ni muria na nomuni lawa.

¹⁵¹ Ia, o ni sa voleka ga vei au, i Jiova, Ka sa dina na nomuni vosa ni yalayala kecega.

¹⁵² Au sa kila makawa toka na nomuni i vakaro, O ni sa vakadeitaka me na sega sara ni mudu.

Kerea na Veivakabulai (Resi)

¹⁵³ Ni raica mada na noqu rarawa, ka vakabulai au, Baleta ni'u sa sega ni cakitaka na nomuni vunau.

¹⁵⁴ Ni taqomaka na veika e baleti au, ka vakabulai au; Ni vakabulai au me vaka na nomuni vosa ni yalayala.

¹⁵⁵ Era na sega ni vakabulai na tamata ca, Baleta ni ra sega ni muria na nomuni lawa,

¹⁵⁶ Ni sa levu sara, i Jiova, na nomuni yalololoma; Ni vakabulai au me vaka ga na nomuni lewa dodonu.

¹⁵⁷ Sa lewa na kequ meca kei ira era vakararawataki au, Ia au sa sega sara ni gole tani mai na nomuni lawa.

¹⁵⁸ Au sa raici ira na tamata sega ni yalodina ena cudru, Baleta ni ra sega ni muria na nomuni i vakaro.

¹⁵⁹ I Jiova, ni raica mada na noqu lomana na nomuni i vakaro; Ni qai vakabulai au me vaka na nomuni loloma tudei.

¹⁶⁰ Na uto ni nomuni vunau sai koya na dina, Ka sega ni mudu na nomuni lewa dodonu.

Yalodina ki na Lawa i Jiova (Sini)

¹⁶¹ Era sa vakacacani au vakatawadodonu na tamata, Ia, au sa doka duadua ga na nomuni lawa.

¹⁶² Au sa rekitaka na nomuni vosa ni yalayala, Me vaka na nona marau e dua sa kunea na i yau levu.

¹⁶³ Au sa cata ka vakasisilataka na ka lasu kecega, Ia, au sa lomana ga na nomuni vunau.

¹⁶⁴ Au sa vakavinavinaka vakavitu vei kemuni ena dua na siga, Ena vuku ni nomuni lewa dodonu.

¹⁶⁵ Sa ka taucoko na nodra taqomaki o ira sa lomana na nomuni lawa, Ka sa sega ni dua na ka e rawa ni vakabalei ira.

¹⁶⁶ Au sa waraki kemuni, i Jiova, mo ni vakabulai au, Ka'u sa vakayacora na nomuni i vakaro.

¹⁶⁷ Au sa muria na nomuni i vakaro, Ka lomana ena yaloqu taucoko.

¹⁶⁸ Au sa muria na i vakaro kei na nomuni vakasala; O ni sa raica na ka kecega au cakava.

A Masu ni Kere Veivuke (Tau)

¹⁶⁹ I Jiova, au sa kerea me na yaco sara yani vei kemuni na noqu masu ni kere veivuke oqo! Ni qai solia vei au na kila-ka, me vaka o ni sa yalataka.

¹⁷⁰ Ni rogoca mada na noqu masu, Ka vakabulai au me vaka na nomuni vosa ni yalayala!

¹⁷¹ Au na dau vakacaucautaki kemuni tikoga, Baleta ni o ni sa vakatavulica vei au na nomuni vunau.

¹⁷² Au na seretaka na veika me baleta na nomuni lawa, Baleta ni sa dina ga ka dodonu na nomuni i vakaro.

¹⁷³ Ni vakarau tu ga mo ni vukei au Baleta ni'u sa muria na nomuni i vakaro.

¹⁷⁴ Au sa gadreva na nomuni veivakabulai Jiova, Ka'u sa kunea na marau ena nomuni vunau.

¹⁷⁵ Ni solia vei au na bula me'u vakacaucautaki kemuni kina, Me vukei au na nomuni vakasala.

¹⁷⁶ Au sa veilakoyaki voli me vaka na sipi sa sese, Ia ni lako mai mo ni vaqarai au na nomuni tamata, Baleta ni'u sa sega ni guilecava na nomuni vakaro.